ಪಶ್ಚಿಮ ಏಷ್ಯಾ ಬಿಕ್ಕಟ್ಟಿನ ಪರಿಣಾಮ ಜಾಗತಿಕ ಕಚ್ಚಾ ತೈಲದ ಬೆಲೆ ಏರಿಕೆ ಮತ್ತು ಪೂರೈಕೆ ಸಂಕಷ್ಟದ ನಡುವೆಯೇ ಕೇಂದ್ರ ಸರ್ಕಾರ ಇಂದು ಶುಕ್ರವಾರ ದೇಶಾದ್ಯಂತ ಪೆಟ್ರೋಲ್ ಮತ್ತು ಡೀಸೆಲ್ ದರಗಳನ್ನು ಹೆಚ್ಚಿಸಿದೆ.
ಈ ದರ ಏರಿಕೆಯಿಂದ ಕೆಲವು ನಗರಗಳಲ್ಲಿ ಪೆಟ್ರೋಲ್ ಬೆಲೆ ಪ್ರತಿ ಲೀಟರ್ಗೆ 3 ರೂಪಾಯಿಯಿಂದ 3 ರೂಪಾಯಿ 46ರವರೆಗೆ ಏರಿಕೆಯಾದರೆ, ಡೀಸೆಲ್ ದರವು ಪ್ರದೇಶಾನುಸಾರ 3 ರೂಪಾಯಿಯಿಂದ 3 ರೂಪಾಯಿ 56 ಪೈಸೆಯವರೆಗೆ ಹೆಚ್ಚಾಗಿದೆ.
ಉತ್ಪಾದನಾ ವೆಚ್ಚ ಏರಿಕೆಯಿಂದ ಸರ್ಕಾರಿ ತೈಲ ಕಂಪನಿಗಳು ಭಾರೀ ನಷ್ಟ ಅನುಭವಿಸುತ್ತಿರುವ ಹಿನ್ನೆಲೆಯಲ್ಲಿ ಈ ದರ ಪರಿಷ್ಕರಣೆ ಮಾಡಲಾಗಿದೆ. 2022ರ ಮೇ ತಿಂಗಳಿನಿಂದ ಅಂತಾರಾಷ್ಟ್ರೀಯ ಕಚ್ಚಾ ತೈಲ ಮಾರುಕಟ್ಟೆಯಲ್ಲಿ ಅಸ್ಥಿರತೆ ಇದ್ದರೂ ಪೆಟ್ರೋಲ್ ಮತ್ತು ಡೀಸೆಲ್ ದರಗಳು ಬಹುತೇಕ ಸ್ಥಿರವಾಗಿದ್ದವು. ಇದೀಗ ಇದೇ ಮೊದಲ ದೊಡ್ಡ ಮಟ್ಟದ ದರ ಏರಿಕೆಯಾಗಿದೆ.
ಕರ್ನಾಟಕ ರಾಜಧಾನಿ ಬೆಂಗಳೂರು ನಿವಾಸಿಗಳು ಪ್ರತಿ ಲೀಟರ್ ಪೆಟ್ರೋಲ್ಗೆ 3 ರೂಪಾಯಿ 21 ಪೈಸೆ ಹೆಚ್ಚುವರಿ ಪಾವತಿಸಬೇಕಾಗುತ್ತದೆ. ಡೀಸೆಲ್ ದರ 3 ರೂಪಾಯಿ 11 ಪೈಸೆ ಏರಿಕೆಯಾಗಿದ್ದು, ಪೆಟ್ರೋಲ್ ಮತ್ತು ಡೀಸೆಲ್ ಹೊಸ ದರಗಳು ಕ್ರಮವಾಗಿ 106.17 ರೂಪಾಯಿ ಮತ್ತು 94.10 ರೂಪಾಯಿ ಆಗಿವೆ.
ಮುಂಬೈನಲ್ಲಿ ಪೆಟ್ರೋಲ್ ದರ 3.10 ರೂಪಾಯಿ ಏರಿಕೆಯಾಗಿದ್ದು, ಲೀಟರ್ಗೆ 106.64 ರೂಪಾಯಿಗೆ ತಲುಪಿದೆ. ಡೀಸೆಲ್ ದರ 3.11 ರೂಪಾಯಿ ಹೆಚ್ಚಾಗಿ ಲೀಟರ್ಗೆ 93.14 ರೂಪಾಯಿ ಆಗಿದೆ.
ಭಾರತದ ವಿವಿಧ ನಗರಗಳಲ್ಲಿನ ಹೊಸ ಪೆಟ್ರೋಲ್ ದರ ಹೀಗಿವೆ
ಭಾರತದ ವಿವಿಧ ನಗರಗಳಲ್ಲಿನ ಹೊಸ ಡೀಸೆಲ್ ದರಗಳು ಹೀಗಿವೆ
ದರ ಏರಿಕೆಯ ನಂತರ, ದೇಶದಲ್ಲಿ ಹೈದರಾಬಾದ್ ನಿವಾಸಿಗಳು ಒಂದು ಲೀಟರ್ ಪೆಟ್ರೋಲ್ಗೆ ಅತಿ ಹೆಚ್ಚು 110.89 ರೂಪಾಯಿ ಪಾವತಿಸಬೇಕಾಗಿದೆ. ಈ ನಗರದಲ್ಲಿ ಪೆಟ್ರೋಲ್ ದರವು 3.39 ರೂಪಾಯಿ ಏರಿಕೆಯಾಗಿದೆ. ತಿರುವನಂತಪುರಂನಲ್ಲಿ ಲೀಟರ್ಗೆ 110.75 ರೂಪಾಯಿ ದರದೊಂದಿಗೆ ಎರಡನೇ ಸ್ಥಾನದಲ್ಲಿದೆ.
ಚಂಡೀಗಢದಲ್ಲಿ ಪೆಟ್ರೋಲ್ ದರ ದೇಶದಲ್ಲಿ ಅತಿ ಕಡಿಮೆಯಾಗಿದ್ದು, ಲೀಟರ್ಗೆ 2.97 ರೂಪಾಯಿ ಏರಿಕೆಯಾದರೂ ಹೊಸ ದರ 97.27 ರೂಪಾಯಿ ಆಗಿದೆ. ಲಕ್ನೋ ಮತ್ತು ನೋಯ್ಡಾದಲ್ಲೂ ಪೆಟ್ರೋಲ್ ದರಗಳು ಇತರ ದೊಡ್ಡ ನಗರಗಳಿಗಿಂತ ಕಡಿಮೆಯೇ ಉಳಿದಿದ್ದು, ಕ್ರಮವಾಗಿ 97.58 ರೂಪಾಯಿ ಮತ್ತು 98.04 ರೂಪಾಯಿ ಪ್ರತಿ ಲೀಟರ್ಗೆ ನಿಗದಿಯಾಗಿದೆ.
ಡೀಸೆಲ್ ವಿಚಾರದಲ್ಲಿ, ತಿರುವನಂತಪುರಂ ನಿವಾಸಿಗಳು 3.37 ರೂಪಾಯಿ ಏರಿಕೆ ನಂತರ ಪ್ರತಿ ಲೀಟರ್ಗೆ 99.63 ರೂಪಾಯಿ ಪಾವತಿಸಬೇಕಾಗಿದೆ. ಹೈದರಾಬಾದ್ನಲ್ಲಿ ಡೀಸೆಲ್ ದರ ಲೀಟರ್ಗೆ 98.96 ರೂಪಾಯಿ ಆಗಿದೆ.
ಪ್ರಮುಖ ನಗರಗಳಲ್ಲಿ ಚಂಡೀಗಢದಲ್ಲೇ ಡೀಸೆಲ್ ದರ ಅತಿ ಕಡಿಮೆಯಾಗಿದ್ದು, 2.80 ರೂಪಾಯಿ ಏರಿಕೆ ನಂತರ ಹೊಸ ದರ ಲೀಟರ್ಗೆ 85.25 ರೂಪಾಯಿ ಆಗಿದೆ. ದೆಹಲಿಯಲ್ಲಿ ಡೀಸೆಲ್ ದರ ಬೇರೆ ನಗರಗಳಿಗೆ ಹೋಲಿಸಿದರೆ ಕಡಿಮೆಯಾಗಿದ್ದು, ಲೀಟರ್ಗೆ 90.67 ರೂಪಾಯಿ ಆಗಿದೆ.
Advertisement