ತಂತ್ರಜ್ಞಾನ ದೈತ್ಯ ಗೂಗಲ್ ತನ್ನ ಕಾರ್ಯಪಡೆಯನ್ನು ಪುನರ್ರಚಿಸುತ್ತಿರುವುದರಿಂದ ಮತ್ತು ಸಂಪನ್ಮೂಲಗಳನ್ನು ಕೃತಕ ಬುದ್ಧಿಮತ್ತೆ(AI) ಹಾಗೂ ಕ್ಲೌಡ್ ಕಂಪ್ಯೂಟಿಂಗ್ ಗೆ ಹೆಚ್ಚು ಆದ್ಯತೆ ನೀಡುತ್ತಿರುವುದರಿಂದ, ಗೂಗಲ್ ತನ್ನ ಉದ್ಯೋಗಿಗಳಿಗೆ ಸ್ವಯಂಪ್ರೇರಿತವಾಗಿ ಕೆಲಸ ಬಿಡುವಂತೆ ಸೂಚಿಸಿದೆ.
ಜೂನ್ 2025 ರಲ್ಲೇ ಜಾರಿಗೆ ಬಂದ ಈ ಸ್ವಯಂಪ್ರೇರಿತ ನಿವೃತ್ತಿ ಘೋಷಣೆ ಪ್ಯಾಕೇಜ್ ಅನ್ನು ಗೂಗಲ್ ಇದೀಗ ಐದು ದೇಶಗಳಿಗೆ ವಿಸ್ತರಿಸಿದೆ. ಕೆನಡಾ, ಫ್ರಾನ್ಸ್, ಜರ್ಮನಿ, ಜಪಾನ್ ಮತ್ತು ಸ್ವಿಟ್ಜರ್ಲೆಂಡ್‌ನಲ್ಲಿರುವ ಉದ್ಯೋಗಿಗಳಿಗೆ ಸ್ವಯಂಪ್ರೇರಿತ ನಿರ್ಗಮನ ಕೊಡುಗೆಗಳನ್ನು ವಿಸ್ತರಿಸಿದೆ.
ಉದಯೋನ್ಮುಖ ತಂತ್ರಜ್ಞಾನಗಳಲ್ಲಿ ಹೆಚ್ಚುತ್ತಿರುವ ಹೂಡಿಕೆಗಳ ಮಧ್ಯೆ ಕಾರ್ಯಾಚರಣೆಗಳನ್ನು ಸುಗಮಗೊಳಿಸಲು ಮತ್ತು ವೆಚ್ಚಗಳನ್ನು ನಿಯಂತ್ರಿಸಲು ಗೂಗಲ್ ಪ್ರಯತ್ನಿಸುತ್ತಿದ್ದು, ಕಂಪನಿಯನ್ನು ಸ್ವಯಂಪ್ರೇರಣೆಯಿಂದ ತೊರೆಯಲು ಉದ್ಯೋಗಿಗಳಿಗೆ ಆರ್ಥಿಕ ಪ್ರೋತ್ಸಾಹ ನೀಡುತ್ತಿದೆ.
ಆದಾಗ್ಯೂ, ಎಷ್ಟು ಉದ್ಯೋಗಿಗಳು ಈ ಕೊಡುಗೆಯನ್ನು ಸ್ವೀಕರಿಸಿದ್ದಾರೆ ಎಂಬುದನ್ನು ಗೂಗಲ್ ಇನ್ನೂ ಹಂಚಿಕೊಂಡಿಲ್ಲ.
2025ರ ಆರಂಭದಲ್ಲಿ ಕೆಲವು ತಂಡಗಳಲ್ಲಿ ಇದೇ ರೀತಿಯ ಕಾರ್ಯಕ್ರಮಗಳನ್ನು ಪರಿಚಯಿಸಲಾಗಿತ್ತು. ನಂತರ ಜೂನ್‌ನಲ್ಲಿ ಹೆಚ್ಚಿನ ದೇಶಗಳಿಗೆ ವಿಸ್ತರಿಸಲಾಯಿತು ಎಂದು ಕಂಪನಿ ವಕ್ತಾರರು ರಾಯಿಟರ್ಸ್‌ಗೆ ದೃಢಪಡಿಸಿದ್ದಾರೆ.
ಈ ಕೊಡುಗೆಗಳು ಗೂಗಲ್‌ನ ವ್ಯವಹಾರದ ಎಲ್ಲಾ ಭಾಗಗಳಲ್ಲಿ ಲಭ್ಯವಿಲ್ಲ. ಕಂಪನಿಯ AI ಸಂಶೋಧನಾ ವಿಭಾಗವಾದ ಡೀಪ್‌ಮೈಂಡ್ ಮತ್ತು ಗೂಗಲ್ ಕ್ಲೌಡ್ ಈ ಕಾರ್ಯಕ್ರಮದ ಹೊರಗಿವೆ. ಗೂಗಲ್ ತನ್ನ AI ಮತ್ತು ಕ್ಲೌಡ್ ವ್ಯವಹಾರಗಳನ್ನು ಬಲಪಡಿಸುವ ಕೆಲಸ ಮಾಡುತ್ತಿದೆ. ಈ ಕ್ಷೇತ್ರಗಳಲ್ಲಿ ಹೆಚ್ಚು ನೇಮಕಾತಿ ನಡೆಯುತ್ತಿದೆ. ಆದ್ದರಿಂದ ಭವಿಷ್ಯದ ಯೋಜನೆಗಳಿಗೆ ಮುಖ್ಯವಾದ ತಂಡಗಳಲ್ಲಿ ಹೂಡಿಕೆ ಮುಂದುವರಿಸುತ್ತಲೇ, ಕೆಲವು ಇತರ ಕ್ಷೇತ್ರಗಳಲ್ಲಿ ಕಾರ್ಯಪಡೆಯನ್ನು ಕಡಿಮೆ ಮಾಡಲು ಅಥವಾ ಮರುಸಂಘಟಿಸಲು ನೋಡುತ್ತಿದೆ.
