ಬಾಲಿಕಾ ವಧು ಸಿದ್ದಾರ್ಥ ಖತ್ರೋಂ ಕೆ ಖಿಲಾಡಿ 7ರ ವಿಜೇತ

ಮುಂಬೈ: ಖತ್ರೋಂ ಕೆ ಖಿಲಾಡಿ, ಕಭೀ ಪೀಡಾ ಕಭೀ ಕೀಡಾ 7ನೇ ಆವೃತ್ತಿಯಲ್ಲಿ ಬಾಲಿಕಾ ವಧು ನಟ ಸಿದ್ದಾರ್ಥ ಶುಕ್ಲ ವಿಜೇತರಾಗಿದ್ದಾರೆ.

ಬಾಲಿವುಡ್ ನಟ ಅರ್ಜುನ್ ಕಪೂರ್ ಅವರು ನಡೆಸಿದ ಸೆಲೆಬ್ರಿಟಿ ಸ್ಟಂಟ್ ಅಧಾರಿತ ರಿಯಾಲಿಟಿ ಶೋ ಮೈನವಿರೇಳಿಸುವ ಪ್ರದರ್ಶನದಲ್ಲಿ ಅಂತಿಮ ಹಂತದಲ್ಲಿದ್ದ ಸನಾ ಸಯೀದ್ ಮತ್ತು ಮುಕ್ತಿ ಮೋಹನ್ ಅವರನ್ನು ಸೋಲಿಸುವ ಮೂಲಕ ಸಿದ್ಧಾರ್ಥ ವಿಜಯಿಯಾಗಿದ್ದು, 25 ಲಕ್ಷ ರುಪಾಯಿ ನಗದು ಮತ್ತು ಹೊಸ ಟಾಟಾ ಟಿಯಾಗೊ ಕಾರನ್ನು ಬಾಚಿಕೊಂಡಿದ್ದಾರೆ.

ಅರ್ಜೆಂಟೀನಾದಲ್ಲಿ 8 ವಾರಗಳು ನಡೆದ ಸ್ಟಂಟ್ ಸವಾಲುಗಳಲ್ಲಿ 35ರ ಹರೆಯದ ಶುಕ್ಲ ಗಾಯವಾದರೂ ಬಿಡದೆ ಅಪೂರ್ವ ಮಾನಸಿಕ ಹಾಗೂ ದೈಹಿಕ ದೃಢತೆ ಪ್ರದರ್ಶಿಸಿ ಮೊದಲ ಸ್ಥಾನ ಕಾಯ್ದುಕೊಂಡಿದ್ದರು.

ಅಮೆರಿಕದ ಫಿಯರ್ ಫ್ಯಾಕ್ಟರ್ ರಿಯಾಲಿಟಿ ಶೋದ ರೂಪಾಂತರವಾಗಿದ್ದ ಖತ್ರೋಂ ಕೆ ಖಿಲಾಡಿ ಶೋದಲ್ಲಿ ಅಂತಿಮ ಪ್ರದರ್ಶನದಲ್ಲಂತೂ ಸಿದ್ದಾರ್ಥ ಶುಕ್ಲ ನೀರು, ಗಾಳಿ ಮತ್ತು ಬೆಂಕಿಯ ಮಧ್ಯೆ ವಿವಿಧ ಸ್ಟಂಟ್​ಗಳನ್ನು ಪ್ರದರ್ಶಿಸಿ ನೋಡುಗರಿಗೆ ಮೈ ರೋಮಾಂಚನವಾಗುವಂತೆ ಮಾಡಿದ್ದರು.