ಭಾರತೀಯ ಚಿತ್ರರಂಗದ ಬಹುನಿರೀಕ್ಷಿತ ‘ರಾಮಾಯಣ ಪಾರ್ಟ್ 1: ರೈಸ್ ಆಫ್ ಎ ಲೆಜೆಂಡ್’ ಸಿನಿಮಾ ಇಂದು ಜಗತ್ತಿನಾದ್ಯಂತ ಬಿಡುಗಡೆಯಾಗಿದ್ದು ಪ್ರೇಕ್ಷಕರಿಂದ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದೆ. ಶ್ರೀರಾಮನಾಗಿ ರಣಬೀರ್ ಕಪೂರ್, ಸೀತೆಯಾಗಿ ಸಾಯಿ ಪಲ್ಲವಿ ಅತ್ಯುತ್ತಮವಾಗಿ ಅಭಿನಯಿಸಿದ್ದರೇ ರಾವಣನ ಪಾತ್ರದಲ್ಲಿ ಯಶ್ ರುದ್ರವಾತಾರಕ್ಕೆ ಪ್ರೇಕ್ಷಕರ ಮನಸೋತಿದ್ದಾರೆ.
ರಾಮಾಯಣ ಪಾರ್ಟ್ 1 ಚಿತ್ರ ರಾವಣನ ಪ್ರತಿಜ್ಞೆಯಿಂದ ಶುರುವಾದರೇ ಅಂತ್ಯ ಜಟಾಯುವಿನ ಸಾವು, ರಾಮನ ಶಪತದೊಂದಿಗೆ ಅಂತ್ಯವಾಗುತ್ತದೆ. ಇನ್ನು ಚಿತ್ರದಲ್ಲಿ ಕೊನೆಯಲ್ಲಿ ಪ್ರೇಕ್ಷಕರಿಗೆ ಪ್ರಮುಖ ಸರ್‌ಪ್ರೈಸ್ ಸಿಕ್ಕಿದೆ. ಹನುಮಂತನ ಪಾತ್ರ ಅನಾವರಣಗೊಂಡಿದ್ದು ಎರಡನೇ ಭಾಗಕ್ಕೆ ಭರ್ಜರಿ ಮುನ್ನುಡಿ ಸಿಕ್ಕಿದೆ. ಇನ್ನು ಸಿನಿಮಾ ಮುಗಿಯಿತೆಂದು ಎದ್ದು ಹೋಗಲು ರೆಡಿಯಾದ ಪ್ರೇಕ್ಷಕರಿಗೆ ಸನ್ನಿ ಡಿಯೋಲ್ ಅವರ ಹನುಮಂತನ ಅವತಾರ ರೋಮಾಂಚನ ಉಂಟುಮಾಡುತ್ತದೆ.
ಹನುಮಂತ ಗದೆಯನ್ನು ಹಿಡಿದು ಜೈ ಶ್ರೀರಾಮ್ ಎಂದು ಘೋಷಣೆ ಕೂಗುತ್ತಾ ಆಕಾಶಕ್ಕೆ ಹಾರುವ ದೃಶ್ಯ ಪ್ರೇಕ್ಷಕರನ್ನು ಮಂತ್ರ ಮುಗ್ಧಗೊಳಿಸುತ್ತದೆ. ಈ ದೃಶ್ಯದಲ್ಲಿ ಸನ್ನಿ ಡಿಯೋಲ್ ಅವರ ಸಂಪೂರ್ಣ ಮುಖವನ್ನು ಸ್ಪಷ್ಟವಾಗಿ ತೋರಿಸದೆ, ಹನುಮಂತನ ಪಾತ್ರದ ಗಾಂಭೀರ್ಯವನ್ನು ಮಾತ್ರ ಅನಾವರಣಗೊಳಿಸಲಾಗಿದೆ. ಆ ಮೂಲಕ ಕೌತುಕವನ್ನು ಹೆಚ್ಚಿಸಲಾಗಿದೆ. ಇನ್ನು 'ರಾಮಾಯಣ ಪಾರ್ಟ್ 2’ ಬಿಡುಗಡೆಯ ವರ್ಷವನ್ನೂ ಅಧಿಕೃತವಾಗಿ ಘೋಷಿಸಲಾಗಿದೆ. 2027ರ ಬದಲಿಗೆ 2028ರ ದೀಪಾವಳಿಗೆ ಸಿಕ್ವೇಲ್ ಬಿಡುಗಡೆಯಾಗಲಿದೆ.
