ಬೆಂಗಳೂರು: ಇಬ್ಬರು ಖ್ಯಾತ ನಟರೂ ಅದರಲ್ಲೂ ಅವರಿಬ್ಬರೂ ರಕ್ತ ಸಂಬಂಧಿಗಳಾಗಿರುವಾಗ ಅವರನ್ನು ಒಂದೇ ಸಿನೆಮಾದಲ್ಲಿ ಒಟ್ಟಿಗೆ ನಟಿಸುವಂತೆ ಒಪ್ಪಿಸುವುದು ಧೈರ್ಯವನ್ನು ಬೇಡುತ್ತದೆ. ದೈರ್ಯವಷ್ಟೇ ಸಾಲದು ಪ್ರೇಕ್ಷಕ ಒಪ್ಪಿಕೊಳ್ಳುವಂತಹ ಅತ್ಯುತ್ತಮ ಕಥೆಯನ್ನು ಬೇಡುತ್ತದೆ. ಈ ದೈರ್ಯಕ್ಕೆ ಮುಂದಾಗಿರುವವರು ನಿರ್ದೇಶಕ ರವಿವರ್ಮ. ಇವರ ಮುಂದಿನ ಸಿನೆಮಾದ ನಾಯಕ ನಟರು ಅಣ್ಣ ಶಿವರಾಜ್ ಕುಮಾರ್ ಮತ್ತು ತಮ್ಮ ಪುನೀತ್ ರಾಜಕುಮಾರ್.
ನಿರ್ಮಾಪಕ ಜಯಣ್ಣ ಈ ವಿಷಯವನ್ನು ಧೃಢೀಕರಿಸಿದ್ದು "ನಾನು ಈ ಸಿನೆಮಾವನ್ನು ಜಯಣ್ಣ ಕಂಬೈನ್ಸ್ ಬ್ಯಾನರಿನಡಿ ನಿರ್ಮಿಸುತ್ತಿದ್ದೇನೆ. ಈ ಸಿನೆಮಾ ಇನ್ನು ಸ್ಕ್ರಿಪ್ಟ್ ಹಂತದಲ್ಲಿದೆ, ಚಿತ್ರೀಕರಣ ಜನವರಿ ೨೦೧೬ ರಲ್ಲಿ ಪ್ರಾರಂಭವಾಗಲಿದೆ. ಸದ್ಯಕ್ಕೆ ನಾನು ಜೈ ಮಾರುತಿ ೮೦೦, ಯೋಗಿ ಜಿ ರಾಜ್ ಅವರ 'ಬಂಗಾರ, ಸನ್ ಆಫ್ ಬಂಗಾರದ ಮನುಷ್ಯ' ಸಿನೆಮಾಗಳಲ್ಲಿ ನಿರತನಾಗಿರುವುದರಿಂದ ಈ ವಿಷಯದ ಬಗ್ಗೆ ಹೆಚ್ಚೇನೂ ಹೇಳಿರಲಿಲ್ಲ. ರವಿವರ್ಮ ಅವರ ಈ ಯೋಜನೆಯ ಬಗೆಗೆ ಹಲವಾರು ವದಂತಿಗಳಿವೆ. ಈಗ ನನ್ನ ಹೇಳಿಕೆ ಆ ವದಂತಿಗಳಿಗೆ ತಡೆ ಹಾಗುತ್ತದೆ" ಎನ್ನುತ್ತಾರೆ.
೩೦ ಕೋಟಿ ಬಜೆಟ್ ನಲ್ಲಿ ನಿರ್ಮಾಣವಾಗುತ್ತಿರುವ ಚಿತ್ರ ಇದು ಎಂದು ವದಂತಿಗಳು ಹಬ್ಬಿದ್ದು, ಪುನೀತ್ ಅವರ 'ರಣವಿಕ್ರಮ' ನಿರ್ದೇಶಿಸಿದ್ದ ಪವನ್ ಒಡೆಯರ್ ಸಿನೆಮಾಗೆ ಸಂಭಾಷಣೆ ಬರೆಯಲಿದ್ದಾರೆ ಎಂದು ತಿಳಿದುಬಂದಿದೆ.
