ಬಾಲಿವುಡ್ ಸಂಗೀತ ದಂತಕತೆ ಆರ್ ಡಿ ಬರ್ಮನ್ ಸ್ಮರಣಾರ್ಥ ಗೂಗಲ್ ಡೂಡಲ್

ಮುಂಬೈ: ಬಾಲಿವುಡ್ ಸಂಗೀತದ ದಂತಕಥೆ ರಾಹುಲ್ ದೇವ್ ಬರ್ಮನ್ ಅವರ 77ನೇ ಜನ್ಮ ದಿನಾಚರಣೆಯ ಸಂದರ್ಭದಲ್ಲಿ ಡೂಡಲ್ ಬಿಡಿಸಿ ಮುಖಪುಟದಲ್ಲಿ ಪ್ರಕಟಿಸುವ ಮೂಲಕ ಸರ್ಚ್ ದೈತ್ಯ ಗೂಗಲ್ ಸಂಗೀತ ರಸಿಕರ ಹೃದಯಗಳನ್ನು ಗೆದ್ದಿದೆ. 

ಜೂನ್ 27 1939 ರಲ್ಲಿ ಕೋಲ್ಕತ್ತಾದಲ್ಲಿ ಜನಿಸಿದ ಆರ್ ಡಿ ಬರ್ಮನ್, ತಮ್ಮ ವೃತ್ತಿಜೀವನದ ಶಿಖರಪ್ರಾಯದಲ್ಲಿದ್ದಾಗಲೇ ತಮ್ಮ 54ನೇ ವಯಸ್ಸಿನಲ್ಲಿ 1994 ಜನವರಿ 4 ರಂದು ನಿಧನರಾಗಿದ್ದರು. 

ಎಂದಿಂದಿಗೂ ನೆನಪಿನಲ್ಲುಳಿಯುವ ಅಸಂಖ್ಯಾತ ಸಿನೆಮಾ ಹಾಡುಗಳಿಗೆ ಟ್ಯೂನ್ ಒದಗಿಸಿದ್ದ ಆರ್ ಡಿ ಬರ್ಮನ್ ಅವರ ತಂದೆ ಸಚಿನ್ ದೇವ್ ಬರ್ಮನ್ ಕೂಡ ಖ್ಯಾತ ಸಂಗೀತ ನಿರ್ದೇಶಕ. 

"ವಿಶ್ವದ ಎಲ್ಲ ರೀತಿಯ ಸಂಗೀತದಿಂದ ಸ್ಫುರ್ತಿ ಪಡೆದಿದ್ದ ಆರ್ ಡಿ ಬರ್ಮನ್ ಬಾಲಿವುಡ್ ನಲ್ಲಿ ಕ್ರಾಂತಿ ಕಹಳೆ ಊದಿದವರು" ಎಂದು ಗೂಗಲ್ ಹೇಳಿದೆ. 

ಅವರು ಸ್ವತಂತ್ರವಾಗಿ ಸಂಗೀತ ನೀಡಿದ್ದ 'ಛೋಟೆ ನವಾಬ್' 1961 ರಲ್ಲಿ ತೆರೆ ಕಂಡಿತ್ತು. ನಂತರ 350ಕ್ಕೂ ಹೆಚ್ಚು ಸಿನೆಮಾಗಳಿಗೆ ಸಂಗೀತ ನೀಡಿದ ಬರ್ಮನ್ 'ಶೋಲೆ', 'ಕಟಿಪತಂಗ್', 'ತೀಸ್ರಿ ಮಂಜಿಲ್', 'ಸನಮ್ ತೇರೇ ಕಸಮ್', 'ಸತ್ತೆ ಪೆ ಸತ್ತಾ', 'ರಾಕಿ', 'ಆಪ್ ಕಿ ಕಸಮ್' ಮುಂತಾದ ಬ್ಲಾಕ್ ಬಸ್ಟರ್ ಸಿನೆಮಾಗಳ ಸಂಗೀತ ನಿರ್ದೇಶಕ.