ನವದೆಹಲಿ: ಖ್ಯಾತ ನಟ ಕಮಲ್ ಹಾಸನ್ ಅವರ ಹಿರಿಯ ಸೋದರ, ನಿರ್ಮಾಪಕ ಚಂದ್ರಹಾಸನ್ ಹೃದಯಾಘಾತದಿಂದ ನಿಧನರಾಗಿದ್ದಾರೆ. ಚಂದ್ರಹಾಸನ್ ಅವರಿಗೆ 82 ವರ್ಷ ವಯಸ್ಸಾಗಿತ್ತು.
ಇತ್ತೀಚೆಗೆ ಚಂದ್ರಹಾಸನ್ ಅವರು ಲಂಡನ್‌ಗೆ ತೆರಳಿದ್ದು ಅಲ್ಲಿ ಮಗಳು ಅನು ಹಾಸನ್ ಜೊತೆ ನೆಲೆಸಿದ್ದರು. ಅನು ಹಾಸನ್ ನಿವಾಸದಲ್ಲಿ ಅವರು ಹೃದಯಾಘಾತದಿಂದ ಕೊನೆಯುಸಿರೆಳೆದಿದ್ದಾರೆ. ಕಳೆದ ಜನವರಿ ತಿಂಗಳಿನಲ್ಲಿಯಷ್ಟೇ ಚಂದ್ರಹಾಸನ್ ಅವರ ಪತ್ನಿ ಗೀತಾಮಣಿ ನಿಧನರಾಗಿದ್ದರು.
ವೃತ್ತಿಯಲ್ಲಿ ವಕೀಲರಾಗಿದ್ದ ಚಂದ್ರಹಾಸನ್ ತಮ್ಮ ಸ್ವಂತ ನಿರ್ಮಾಣ ಸಂಸ್ಥೆಯಾದ ರಾಜ್‍ಕಮಲ್ ಫಿಲ್ಮ್‌ ಇಂಟರ್‌‌ನ್ಯಾಷನಲ್‌ನನ್ನು ನೋಡಿಕೊಳ್ಳುತ್ತಿದ್ದರು. ಕಮಲ್ ಹಾಸನ್ ಅವರ 'ವಿಶ್ವರೂಪಂ', ತೂಂಗಾವನಂ' ಮತ್ತು 'ಶಬಾಷ್‌ ನಾಯ್ಡು' ಸಿನಿಮಾಗಳ ನಿರ್ಮಾಣದಲ್ಲಿ ಚಂದ್ರಹಾಸನ್ ಕಾರ್ಯವಹಿಸಿದ್ದರು.
ಚಂದ್ರ ಹಾಸನ್ ಅವರ ಪುತ್ರಿ ಅನುಹಾಸನ್ ಖ್ಯಾತ ಟಿವಿ ನಿರೂಪಕಿಯಾಗಿದ್ದಾರೆ. ಚಂದ್ರ ಹಾಸನ್ ಅವರ ನಿಧನದಿಂದ ಕಮಲ್ ಹಾಸನ್ ಅವರ ನಟನೆಯ ಶಹಬಾಸ್ ನಾಯ್ಡು ಸಿನಿಮಾ ಶೂಟಿಂಗ್ ಅನ್ನು ಅನಿರ್ಧಿಷ್ಟಕಾಲ ಮುಂದೂಡಲಾಗಿದೆ.
