'ಬಾಹುಬಲಿ-2' ಮೇಕ್ ಇನ್ ಇಂಡಿಯಾಗೆ ಅದ್ಭುತ ಉದಾಹರಣೆ: ವೆಂಕಯ್ಯ ನಾಯ್ಡು

ನವದೆಹಲಿ: ಚಿತ್ರರಂಗದಲ್ಲಿ ಈ ವರೆಗೂ ಇದ್ದ ಎಲ್ಲ ದಾಖಲೆಗಳನ್ನು ಬದಿಗೊತ್ತಿ ಮುಂದೆ ಸಾಗುತ್ತಿರುವ ರಾಜಮೌಳಿ ನಿರ್ದೇಶನದ 'ಬಾಹುಬಲಿ-2'ಸಿನಿಮಾ ಮೇಕ್ ಇನ್ ಇಂಡಿಯಾಗೆ ಅದ್ಭುತ ಉದಾಹರಣೆಯಾಗಿದೆ ಎಂದು ಕೇಂದ್ರ ಸಚಿವ ವೆಂಕಯ್ಯ ನಾಯ್ಡು ಅವರು ಹೇಳಿದ್ದಾರೆ. 

ದೆಹಲಿಯ ವಿಜ್ಞಾನಭವನದಲ್ಲಿ ನಡೆದ 64ನೇ ರಾಷ್ಚ್ರೀಯ ಚಲನಚಿತ್ರ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಮಾತನಾಡಿರುವ ಅವರು, 'ಬಾಹುಬಲಿ-2 ಚಿತ್ರವನ್ನು ಕೊಂಡಾಡಿದ್ದಾರೆ. 

ಬಾಹುಬಲಿ ಚಿತ್ರ ಇಡೀ ವಿಶ್ವದಾದ್ಯಂತ ಅಲೆಯನ್ನು ಸೃಷ್ಟಿಸುತ್ತಿದೆ. ಪರಿಮಾಣ ಮತ್ತು ಭವ್ಯತೆಗೆ ಸಂಬಂಧಿಸಿದಂತೆ ಇದು ಟ್ರೆಂಡ್ ಸೆಟ್ಟರ್ ಆಗಿದೆ. ಮೇಕ್ ಇನ್ ಇಂಡಿಯಾಗೆ ಇದೊಂದು ಪ್ರಕಾಶಮಾನ ಉದಾಹರಣೆಯಾಗಿದೆ. ದೇಶೀಯ ಪ್ರತಿಭೆಯನ್ನು ಇದು ತೋರಿಸುತ್ತದೆ. ಎಲ್ಲರೂ ಹೆಮ್ಮಪಡುವಂತೆ, ಉತ್ತಮ ಕೌಶಲ್ಯಕ್ಕೆ ಉದಾಹರಣೆ ನೀಡಿದ ನಿರ್ದೇಶಕ ರಾಜಮೌಳಿಯವರಿಗೆ ನನ್ನ ಅಭಿನಂದನೆಗಳು ಎಂದು ತಿಳಿಸಿದ್ದಾರೆ.