ಇಶಾನ್ ಮುಂದಿನ ಸಿನೆಮಾ 'ಪಿಚ್ಚೈಕ್ಕಾರನ್' ರಿಮೇಕ್?

ಬೆಂಗಳೂರು: ಇಶಾನ್ ಕೆಲವು ತಿಂಗಳ ಹಿಂದೆ ಬಿಡುಗಡೆಯಾದ ಪೂರಿ ಜಗನ್ನಾಥ್ ನಿರ್ದೇಶನದ 'ರೋಗ್' ಸಿನೆಮಾದ ಮೂಲಕ ಪಾದಾರ್ಪಣೆ ಮಾಡಿದವರು. ಕನ್ನಡ ಮತ್ತು ತೆಲುಗು ಭಾಷೆಗಳಲ್ಲಿ ಮೂಡಿಬಂದಿದ್ದ ಈ ಸಿನೆಮಾ ನಿರೀಕ್ಷಿತ ಮಟ್ಟಕ್ಕೆ ಸದ್ದು ಮಾಡಲು ವಿಫಲವಾಯಿತು. ಈಗ ನಟ ಮುಂದಿನ ಸಿನೆಮಾಗೆ ಕಥೆಗಳನ್ನು ಕೇಳುತ್ತಿದ್ದಾರೆ ಎನ್ನಲಾಗಿದ್ದು, ತಮಿಳು ಹಿಟ್ ಚಲನಚಿತ್ರ 'ಪಿಚ್ಚೈಕ್ಕಾರನ್'ನ ರಿಮೇಕ್ ನಲ್ಲಿ ನಟಿಸುವುದನ್ನು ಪರಿಗಣಿಸಿದ್ದಾರೆ ಎನ್ನಲಾಗಿದೆ. ಸಸಿ ನಿರ್ದೇಶನದ ಈ ತಮಿಳು ಸಿನೆಮಾದಲ್ಲಿ ವಿಜಯ್ ಆಂಟನಿ ಮುಖ್ಯ ಪಾತ್ರದಲ್ಲಿ ನಟಿಸಿದ್ದರು. 

ಈ ಸಿನೆಮಾದ ರಿಮೇಕ್ ಹಕ್ಕುಗಳು ಸದ್ಯಕ್ಕೆ ದ್ವಾರಕೀಶ್ ಅವರ ಪುತ್ರ ಯೋಗಿಯವರ ಬಳಿಯಿದ್ದು, ಇದನ್ನು ಅವರೇ ನಿರ್ಮಿಸಲಿದ್ದಾರೆಯೇ ಅಥವಾ ನಟನ ಸಹೋದರ ಸಂಬಂಧಿ ಸಿ ಆರ್ ಮನೋಹರ್ ಅವರ ಒಡೆತನದ ತನ್ವಿ ಪ್ರೊಡಕ್ಷನ್ಸ್ ಸಂಸ್ಥೆಗೆ ಮಾರಲಿದ್ದಾರೆಯೇ ಎಂದು ತಿಳಿಯಬೇಕಿದೆ. ಈ ಸಿನೆಮಾವನ್ನು ಮೊದಲಿಗೆ ಕೃಷ್ಣ ಅಜಯ್ ರಾವ್ ಜೊತೆ ಮಾಡಬೇಕಿತ್ತು ಆದರೆ ಇದರ ಬಗ್ಗೆ ಯಾವ ಧೃಢೀಕರಣ ಸಿಕ್ಕಿಲ್ಲ. 

ಮೂಲಗಳು ತಿಳಿಸುವ ಪ್ರಕಾರ "ಸಿನೆಮಾ ನೋಡಿದ ಇಶಾನ್ ಕಥೆಗೆ ಮಾರುಹೋಗಿದ್ದಾರೆ, ತಾಯಿ ಕೋಮಾದಿಂದ ಹೊರಬರಲು ನಾಯಕನಟ ಬಿಕ್ಷುಕನಾಗಿ ಬೇಡುವ ಭಾಗ ಅವರಿಗೆ ಬಹಳ ಇಷ್ಟವಾಗಿದೆ" ಎನ್ನುತ್ತವೆ. 

ಪಿಚ್ಚೈಕಾರನ್ ತಮಿಳು ಮತ್ತು ತೆಲುಗು ಭಾಷೆಗಳಲ್ಲಿ ಬಾಕ್ಸ್ ಆಫಿಸ್ ನಲ್ಲಿ ಉತ್ತಮ ಗಳಿಕೆ ಕಂಡಿತ್ತು. ಈಗ ಕನ್ನಡ ಅವತಾರಿಣಿಕೆಗೆ ನಿರ್ದೇಶಕ, ತಾರಾಗಣ ಮತ್ತು ತಂತ್ರಜ್ಞರನ್ನು ಅಂತಿಮಗೊಳಿಸಬೇಕಿದೆ. ಮುಂದಿನ ಎರಡು ವಾರಗಳಲ್ಲಿ ಈ ಕೆಲಸ ಮುಗಿಯಲಿದ್ದು ಜುಲೈ ಅಂತ್ಯಕ್ಕೆ ಸಿನೆಮಾ ಚಿತ್ರೀಕರಣ ಪ್ರಾರಂಭಿಸಲಿದೆ ಎನ್ನಲಾಗಿದೆ. 

ಈಮಧ್ಯೆ ಮತ್ತೊಂದು ತೆಲುಗು ಸಿನೆಮಾಗೆ ನಟ ಸಿದ್ಧನಾಗುತ್ತಿದ್ದು, ವಿಜಯ್ ಕುಮಾರ್ ಕೊಂಡ ಅವರ ನಿರ್ದೇಶನದಲ್ಲಿ ನಟಿಸಲಿದ್ದಾರಂತೆ. ವಿಜಯ್ ತಮ್ಮ ಸಿನೆಮಾಗಳಾದ 'ಒಕ ಲೈಲಾ ಕೋಸಂ', 'ಗುಂಡೆ ಜಾರಿ ಗಲ್ಲಂತಾಯಿಂದೆ' ಸಿನೆಮಾಗಳಿಗೆ ಹೆಸರುವಾಸಿ.