ನಿಶ್ಚಿತಾರ್ಥದ ದಿನ ನಟಿ ಮೇಘನಾ ರಾಜ್ ಸಂಭ್ರಮಕ್ಕೆ ಮತ್ತೆರಡು ಕಾರಣ!

ಬೆಂಗಳೂರು: ನಟ ಚಿರಂಜೀವಿ ಸರ್ಜಾ ಜೊತೆ ಸಪ್ತಪದಿ ತುಳಿಯಲು ಸಿದ್ದವಾಗುತ್ತಿರುವ ಮೇಘನಾ ರಾಜ್ ನಿಶ್ಚಿತಾರ್ಥ ಅಕ್ಟೋಬರ್ 22ರಂದು ನಡೆಯಲಿದೆ. ಮೇಘನಾ ಖುಷಿಗೆ ಇದೊಂದೇ ಕಾರಣವಲ್ಲ, ತಮ್ಮ ನಿಶ್ಚಿತಾರ್ಥದ ದಿನವೇ ಮೇಘನಾ ನಟನೆಯ 2 ಸಿನಿಮಾಗಳ ಮುಹೂರ್ತ ಕೂಡ ನಡೆಯಲಿದೆ.

ಈ ಬಗ್ಗೆ ಸಿಟಿ ಎಕ್ಸ್ ಪ್ರೆಸ್ ಜೊತೆ ಮಾತನಾಡಿರುವ ಮೇಘನಾ ತಮ್ಮ ಸಂಭ್ರಮವನ್ನು ಹಂಚಿಕೊಂಡಿದ್ದಾರೆ, ಎರಡು ಸಿನಿಮಾಗಳ ಮುಹೂರ್ತ ತನ್ನ ಮದುವೆ ನಿಶ್ಚಿತಾರ್ಥದ ದಿನವೇ ನಡೆಯುತ್ತಿರುವುದಕ್ಕೆ ಸಂತಸ ವ್ಯಕ್ತಪಡಿಸಿದ್ದಾರೆ. 

ಜಲ್ಸಾ ಸಿನಿಮಾ ನಿರ್ದೇಶಕ ಕಂತ ಕನ್ನಾಲಿ ಈ ಸಿನಿಮಾ ನಿರ್ದೇಶನ ಮಾಡುತ್ತಿದ್ದಾರೆ, ಕಾಪೋರೇಟ್ ವಲಯದಲ್ಲಿ ಏನಾದರು ಸಾಧನೆ ಮಾಡಬೇಕೆಂದು ಕೊಂಡಿರುವ ಐಟಿ ಉದ್ಯೊಗಿಯ ಪಾತ್ರದಲ್ಲಿ ಮೇಘನಾ ರಾಜ್ ಕಾಣಿಸಿಕೊಳ್ಳಲಿದ್ದಾರೆ. ನಿರ್ದೇಶಕರು ಕಥೆ ಹೇಳಿದಾಗ, ಅದನ್ನು ಕೇಳಿ ತುಂಬ ಇಷ್ಟಪಟ್ಟು ಈ ಸಿನಿಮಾ ಮಾಡುವುದಕ್ಕೆ ಅವರು ಒಪ್ಪಿಕೊಂಡಿದ್ದಾರಂತೆ. ‘ಇಂದಿನ ಅಧುನಿಕ ಬದುಕಿಗೆ ಒಗ್ಗಿ ಹೋಗಿರುವಂತಹ ಹುಡುಗಿಯಾಗಿ ಮೇಘನಾ ಕಾಣಿಸಿಕೊಳ್ಳಲಿದ್ದಾರೆ.  ಈ ಸಿನಿಮಾದ ಶೂಟಿಂಗ್ ಅಕ್ಟೋಬರ್ 22 ರಂದು ಆರಂಭವಾಗಲಿದ್ದು, ನವೆಂಬರ್ ಮೊದಲ ವಾರದಲ್ಲಿ ತಾವು ಚಿತ್ರೀರಣದಲ್ಲಿ ಭಾಗಿಯಾಗುವುದಾಗಿ ತಿಳಿಸಿದ್ದಾರೆ.

ಮುಸ್ಸಂಜೆ ಮಹೇಶ್ ಜೊತೆ ಮಾಡುತ್ತಿರುವ ಮತ್ತೊಂದು ಸಿನಿಮಾದ ಮುಹೂರ್ತ ಕೂಡ ಅಕ್ಟೋಬರ್ 22 ರಂದೇ ಆರಂಭವಾಗಲಿದೆ. ಹೀಗಾಗಿ ಮೇಘನಾ ರಾಜ್ ಸಖತ್ ಖುಷಿಯಾಗಿದ್ದಾರೆ.