ಇಪ್ಪತ್ತೈದು ಸಿನಿಮಾಗಳ ನಂತರ ಪ್ರಜ್ವಲ್ ದೇವರಾಜ್ ತಮ್ಮ ವೃತ್ತಿಜೀವನವನ್ನು ಮತ್ತೊಂದು ಮೈಲಿಗಲ್ಲಿನತ್ತ ಕೊಂಡೊಯ್ಯಲು ಬಯಸಿದ್ದಾರೆ. ಇನ್ನು ಮುಂದೆ ಹೊಸ ಪಾತ್ರಗಳು ಮತ್ತು ವಿಶಿಷ್ಟ ಸಿನಿಮಾಗಳಲ್ಲಿ ನಟಿಸಲು ಪ್ರಜ್ವಲ್ ದೇವರಾಜ್ ಮುಂದಾಗಿದ್ದಾರೆ.
ದಿನಕರ್ ತೂಗುದೀಪ ಅವರ ಲೈಫ್ ಜೊತೆ ಒಂದು ಸೆಲ್ಫಿ ಸಿನಿಮಾದ ಶೂಟಿಂಗ್ ಮುಗಿಸಿರುವ ಪ್ರಜ್ವಲ್, ಇದೀಗ ಇನ್ಸ್ ಪೆಕ್ಟರ್ ವಿಕ್ರಮ್ ಚಿತ್ರದಲ್ಲಿ ನಟಿಸುತ್ತಿದ್ದಾರೆ. ವಿಖ್ಯಾತ್ ಪ್ರೊಡಕ್ಷನ್ ನಡಿ ನರಸಿಂಹ ಇದನ್ನು ನಿರ್ದೇಶಿಸುತ್ತಿದ್ದಾರೆ.
ನಂತರ ಪ್ರಜ್ವಲ್ ಅವರು ಅರ್ಜುನ್ ಗೌಡ ಎಂಬ ಸಿನಿಮಾದಲ್ಲಿ ನಟಿಸಲಿದ್ದು, ರಾಮು ಪ್ರೊಡಕ್ಷನ್ ನಡಿ ಲಕ್ಕಿ ಶಂಕರ್ ನಿರ್ದೇಶಿಸಲಿದ್ದಾರೆ. ಚಿತ್ರಕ್ಕೆ ಅರ್ಜುನ್ ಗೌಡ ಎಂದು ಹೆಸರಿಡಲಾಗಿದ್ದು ಇದು ತೆಲುಗಿನ ಬ್ಲಾಕ್ ಬಸ್ಟರ್ ಚಿತ್ರ ಅರ್ಜುನ್ ರೆಡ್ಡಿಯನ್ನು ನೆನಪಿಸುತ್ತದೆ. ಆದರೆ ತೆಲುಗು ಸಿನಿಮಾಕ್ಕೆ ಇದು ಯಾವುದೇ ಸಂಬಂಧ ಹೊಂದಿಲ್ಲ.
ಅರ್ಜುನ್ ಗೌಡದಲ್ಲಿ ಪ್ರಜ್ವಲ್ ಕೋಪಿಷ್ಟ ಯುವಕನ ಪಾತ್ರ ನಿರ್ವಹಿಸಲಿದ್ದಾರೆ. ಇದಕ್ಕಾಗಿ ತಮ್ಮ ನೋಟವನ್ನು ಬದಲಾಯಿಸಿಕೊಳ್ಳಲಿದ್ದಾರೆ ಪ್ರಜ್ವಲ್. ಇನ್ಸ್ ಪೆಕ್ಟರ್ ವಿಕ್ರಮ್ ಚಿತ್ರದ ಮೊದಲ ಶೆಡ್ಯೂಲ್ ಮುಗಿಸಿರುವ ಪ್ರಜ್ವಲ್ ಅವರ ಅರ್ಜುನ್ ಗೌಡ ಸಿನಿಮಾ ಏಪ್ರಿಲ್ ನಲ್ಲಿ ಶೂಟಿಂಗ್ ಆರಂಭವಾಗಲಿದೆ.
Advertisement