ಶ್ರೀಧರ್ ಶಿಕಾರಿಪುರ ಅವರ ಚೊಚ್ಚಲ ನಿರ್ದೇಶನದ ಧರಣಿ ಮಂಡಲ ಮಧ್ಯದೊಳಗೆ ಸಿನಿಮಾ ಈ ವಾರ ಬಿಡುಗಡೆಯಾಗುತ್ತಿದೆ. ಪ್ರಸಿದ್ಧ ಜಾನಪದ ಗೀತೆಯಾದ ಪುಣ್ಯಕೋಟಿ ಗೀತೆಯ ಸಾಲಿನಿಂದ ಚಿತ್ರದ ಶೀರ್ಷಿಕೆಯನ್ನು ಆಯ್ದುಕೊಳ್ಳಲಾಗಿದೆ. ಇದು 24 ಗಂಟೆಗಳ ಅವಧಿಯಲ್ಲಿ ಬೆಂಗಳೂರು ನಗರ ಮತ್ತು ಸುತ್ತಮುತ್ತಲಿನಲ್ಲಿ ನಡೆದ ಘಟನೆಯನ್ನು ಆಧರಿಸಿದೆ.
ಚಿತ್ರದ ಬಿಡುಗಡೆಗೆ ಮುನ್ನ ಮಾತನಾಡಿದ ನಿರ್ದೇಶಕರು, 'ಹೈಪರ್‌ಲಿಂಕ್‌ಗಳನ್ನು ಬಳಸಿ ಧರಣಿ ಮಂಡಲಕ್ಕೆ ವಿಭಿನ್ನ ರೀತಿಯ ಚಿತ್ರಕಥೆಯನ್ನು ಬರೆದಿದ್ದು, ಕನ್ನಡ ಚಿತ್ರರಂಗದಲ್ಲಿ ಇದೊಂದು ಅಪರೂಪದ ಪ್ರಯತ್ನ. ಇಂತಹ ಚಿತ್ರಕಥೆಯನ್ನು ಕ್ರ್ಯಾಶ್, ಅಮೋರಾಸ್ಪೆರೋಸ್ ಮತ್ತು ಬಾಬೆಲ್‌ನಂತಹ ವಿಶ್ವದ ಸಿನಿಮಾಗಳಲ್ಲಿ ಅನ್ವೇಷಿಸಲಾಗಿದೆ. ತೆಲುಗಿನ ವೇದಂ ಮತ್ತು ತಮಿಳಿನ ಅರಣ್ಯಕಾಂಡಂ ಚಿತ್ರಗಳಲ್ಲೂ ಇದೇ ರೀತಿಯ ಬರವಣಿಗೆಯನ್ನು ನೋಡಿದ್ದೇವೆ. ಕನ್ನಡದಲ್ಲಿ ಈ ರೀತಿಯ ಕಥೆಗಳು ತುಂಬಾ ಕಡಿಮೆ' ಎಂದು ಶ್ರೀಧರ್ ಹೇಳುತ್ತಾರೆ.
'ನಾನು ಬೆಳೆಯುತ್ತಾ ಇಂತಹ ಚಿತ್ರಗಳನ್ನು ನೋಡುತ್ತಿದ್ದೆ. ಅವು ನನ್ನ ಮೇಲೆ ಹೆಚ್ಚಿನ ಪ್ರಭಾವ ಬೀರಿದವು. ನನ್ನ ಚಿತ್ರದಲ್ಲಿ ಐದು ಸಮಾನಾಂತರ ಕಥೆಗಳಿವೆ. ಡಿಸೈನರ್ ಆಗಿ ನನ್ನ ಹಿಂದಿನ ವೃತ್ತಿಯು ಮತ್ತು ಇತರ ಇಬ್ಬರು ವೃತ್ತಿಪರರ ಸಹಾಯದಿಂದ ಇದನ್ನು ಸಾಧಿಸಲು ಸಾಧ್ಯವಾಯಿತು ಎಂದು ನಿರ್ದೇಶಕರು ಬಹಿರಂಗಪಡಿಸುತ್ತಾರೆ. ಧರಣಿ ಮಂಡಲ ಮಧ್ಯದೊಳಗೆ ಸಿನಿಮಾ ಪೋಸ್ಟರ್‌ಗಳ ಮೂಲಕವೂ ವೀಕ್ಷಕರ ಗಮನ ಸೆಳೆದಿದೆ.
ಹದಿಮೂರು ವರ್ಷಗಳ ಹಿಂದೆ ನಾನು ಡಿಸೈನರ್ ಆಗಿ ಚಿತ್ರರಂಗಕ್ಕೆ ಕಾಲಿಟ್ಟಿದ್ದೆ. ಆಗ ನಾನು ಯೋಗರಾಜ್ ಭಟ್ ಅವರ ಬಳಿ ಕೆಲಸ ಮಾಡಬೇಕೆಂದು ಬಯಸಿದ್ದೆ, ಏಕೆಂದರೆ ನಾನು ಅವರ ಮುಂಗಾರು ಮಳೆ ಚಿತ್ರದ ದೊಡ್ಡ ಅಭಿಮಾನಿಯಾಗಿದ್ದೆ. ಆ ಚಿತ್ರದಲ್ಲಿ ನಿರ್ದೇಶಕರೇ ಹೀರೋ ಅಂತ ಅನಿಸಿತು. ನಿರ್ದೇಶನದ ಕಡೆಗೆ ನನ್ನ ಉತ್ಸಾಹ ಅಲ್ಲಿಂದ ಶುರುವಾಯಿತು. ಆದರೆ, ಅವರಿಂದ ಸಿನಿಮಾದ ಬಗ್ಗೆ ಕಲಿಯಲು ನನಗೆ ಅವಕಾಶಗಳು ಸಿಗಲಿಲ್ಲ. ಹಾಗಾಗಿ ನನ್ನ ಡಿಸೈನ್ ಕೌಶಲ್ಯದ ಮೇಲೆ ಕೆಲಸ ಮಾಡುವುದನ್ನು ಮುಂದುವರೆಸಿದೆ. ನಂತರ, ರಾಜೇಂದ್ರ ಸಿಂಗ್ ಬಾಬು, ಘೌಸ್ ಪೀರ್, ಅನಂತ್ ಅರಸ್ ಮತ್ತು ಪುರಿ ಜಗನ್ನಾಥ್ ಅವರಂತಹ ನಿರ್ದೇಶಕರ ಜೊತೆ ಸಹಾಯಕನಾಗಿ ಕೆಲಸ ಮಾಡುವ ಮೂಲಕ ನಾನು ಸನಿರ್ದೇಶನವನ್ನು ಕಲಿತಿದ್ದೇನೆ' ಎಂದು ಅವರು ಹೇಳುತ್ತಾರೆ.
ಕಮರ್ಷಿಯಲ್ ಸಿನಿಮಾ ನಿರ್ದೇಶಕರೊಂದಿಗೆ ಕೆಲಸ ಮಾಡಿದ್ದರೂ ಶ್ರೀಧರ್, ವಿಶ್ವ ಸಿನಿಮಾದ ಅಭಿಮಾನಿಯಾಗಿದ್ದರು. 'ಆದಾಗ್ಯೂ, ಧರಣಿ ಮಂಡಲದ ಮೇಕಿಂಗ್... ಪುರಿ ಜಗನ್ನಾಥ್ ಚಿತ್ರಗಳ ಛಾಯೆಯನ್ನು ಹೊಂದಿರುತ್ತದೆ. ಚಿತ್ರವು ಕಾಕತಾಳೀಯವಾಗಿದೆ, ಇದು ವಾಸ್ತವವಾಗಿ ಧರಣಿ ಮಂಡಲ ಮಧ್ಯದೊಳಗಿನ ಮುಖ್ಯ ವಿಷಯವಾಗಿದೆ. ಸಿನಿಮಾದಲ್ಲಿ ತಾತ್ವಿಕ ಅಂಶವೂ ಇದೆ' ಎಂದು ಅವರು ಹೇಳುತ್ತಾರೆ.
ನವೀನ್ ಶಂಕರ್, ಐಶಾನಿ ಶೆಟ್ಟಿ ಮತ್ತು ಯಶವಂತ್ ಶೆಟ್ಟಿ ಮುಖ್ಯಭೂಮಿಕೆಯಲ್ಲಿರುವ ಈ ಚಿತ್ರದಲ್ಲಿ ಜಯಶ್ರೀ ಆರಾಧ್ಯ, ಸಿದ್ದು ಮೂಲಿಮನಿ ಮತ್ತು ಓಂಕಾರ್ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ.
ಧರಣಿ ಮಂಡಲ ಮಧ್ಯದೊಳಗೆ ಸಿನಿಮಾಗೆ ಕೀರ್ತನ್ ಪೂಜಾರಿಯವರ ಛಾಯಾಗ್ರಹಣ ಮತ್ತು ಉಜ್ವಲ್ ಚಂದ್ರ ಅವರ ಸಂಕಲನವಿದೆ. ರೋಣದ ಬಕೇಶ್ ಮತ್ತು ಕಾರ್ತಿಕ್ ಚೆನ್ನೋಜಿ ರಾವ್ ಸಂಗೀತ ಸಂಯೋಜಿಸಿದ್ದಾರೆ.
Advertisement