ಯಶ್‌ ತಾಯಿ ಎಂಬ ಕಾರಣಕ್ಕೆ ಜನ ಸಿನಿಮಾ ನೋಡಲ್ಲ; ಡ್ರೈವರ್‌ ಅರುಣ್‌ ಕುಮಾರ್‌ ಹೆಂಡತಿಯಾಗಿ ಚಿತ್ರರಂಗಕ್ಕೆ ಬರ್ತಿದ್ದೇನೆ: ಪುಷ್ಪಾ

ರಾಕಿಂಗ್ ಸ್ಟಾರ್ ಯಶ್ ತಾಯಿ ಪುಷ್ಪ ಅರುಣ್ ಕುಮಾರ್ ʻಪಿಎ ಪ್ರೊಡಕ್ಷನ್ಸ್‌ʼ ಹೆಸರಿನ ಹೊಸದೊಂದು ನಿರ್ಮಾಣ ಸಂಸ್ಥೆ ಆರಂಭಿಸಿದ್ದಾರೆ. ಸದ್ಯ ಸಿನಿಮಾದ ಪೋಸ್ಟರ್‌ ಕೂಡ ರಿಲೀಸ್‌ ಅಗಿದೆ. ಈ ಮಧ್ಯೆ “ನಾನು ಡ್ರೈವರ್‌ ಅರುಣ್‌ ಕುಮಾರ್‌ ಅವರ ಹೆಂಡತಿಯಾಗಿ ಇಂಡಸ್ಟ್ರೀಗೆ ಕಾಲಿಡುತ್ತಿದ್ದೇನೆ. ಬದಲಿಗೆ ಸೂಪರ್‌ ಸ್ಟಾರ್‌ ಯಶ್‌ ಅವರ ತಾಯಿಯಾಗಿ ಅಲ್ಲ” ಎಂಬ ಸ್ಟೇಟ್‌ಮೆಂಟ್‌ ಎಲ್ಲರ ಹುಬ್ಬೇರಿಸಿದೆ.

ಶ್ರೀರಾಜ್ ಅವರ ನಿರ್ದೇಶನದ ಚೊಚ್ಚಲ ಚಿತ್ರ ಕೊತ್ತಲವಾಡಿ, ಹಲವು ಕಾರಣಗಳಿಗಾಗಿ ಗಮನ ಸೆಳೆಯುತ್ತಿದೆ. ಈ ಚಿತ್ರದಲ್ಲಿ ಪೃಥ್ವಿ ಅಂಬಾರ್ ನಾಯಕ ಮತ್ತು ಕಾವ್ಯ ಶೈವ ನಾಯಕಿಯಾಗಿ ನಟಿಸಿದ್ದಾರೆ. ಗೋಪಾಲ್ ಕೃಷ್ಣ ದೇಶಪಾಂಡೆ, ರಾಜೇಶ್ ನಟರಂಗ, ಅವಿನಾಶ್ ಮತ್ತು ಮಾನಸಿ ಸುಧೀರ್ ಸೇರಿದಂತೆ ಪ್ರಬಲ ಪೋಷಕ ಪಾತ್ರವರ್ಗವೂ ಇದರಲ್ಲಿದೆ.

ಚಿತ್ರೀಕರಣ ಪೂರ್ಣಗೊಂಡ ನಂತರ, ತಂಡವು ಚಿತ್ರದ ಶೀರ್ಷಿಕೆ, ಪಾತ್ರವರ್ಗ ಮತ್ತು ಸಿಬ್ಬಂದಿಯನ್ನು ಅಧಿಕೃತವಾಗಿ ಘೋಷಿಸಿದೆ. ಅದರ ಜೊತೆಗೆ ಮತ್ತೊಂದು ವಿಷಯಕ್ಕಾಗಿ ಸಿನಿಮಾ ಗಮನ ಸೆಳೆಯುತ್ತಿದೆ. ಕೊತ್ತಲವಾಡಿ ಚಿತ್ರವನ್ನು ಪುಷ್ಪಾ ಅರುಣ್‌ಕುಮಾರ್ ನಿರ್ಮಿಸಿದ್ದಾರೆ, ಅವರು ಪಿಎ ಪ್ರೊಡಕ್ಷನ್ಸ್ ಬ್ಯಾನರ್ ಅಡಿಯಲ್ಲಿ ನಿರ್ಮಾಪಕಿಯಾಗಿ ಚಿತ್ರರಂಗಕ್ಕೆ ಪಾದಾರ್ಪಣೆ ಮಾಡುತ್ತಿದ್ದಾರೆ. ಪುಷ್ಪಾ ಭಾರತದ ಅತ್ಯಂತ ಬೇಡಿಕೆಯ ನಟರಲ್ಲಿ ಒಬ್ಬರಾದ ಯಶ್ ಅವರ ತಾಯಿ.

ಸಿನಿಮಾ ಎಕ್ಸ್ ಪ್ರೆಸ್ ಜೊತೆಗಿನ ಸಂವಾದದಲ್ಲಿ ಮಾತನಾಡಿರುವ ನಿರ್ಮಾಪಕಿ ಪುಷ್ಪಾ ಅರುಣ್‌ಕುಮಾರ್ ತಮ್ಮ ಮೊದಲ ಸಾಹಸದ ಬಗ್ಗೆ ವಿವರಿಸಿದ್ದಾರೆ. ನಾನು ವರನಟ ಡಾ. ರಾಜ್‌ಕುಮಾರ್ ಅವರ ಸ್ವಯಂ ಅಭಿಮಾನಿ ಮತ್ತು ಪ್ರಸಿದ್ಧ ನಿರ್ಮಾಪಕಿ ಪಾರ್ವತಮ್ಮ ರಾಜ್‌ಕುಮಾರ್ ಅವರಿಂದ ಸ್ಫೂರ್ತಿ ಪಡೆದಿದ್ದೇನೆ, ಅವರ ಹಾದಿಯಲ್ಲಿಯೇ ನಡೆಯಲು ಬಯಸುತ್ತೇನೆ ಎಂಬ ಬಯಕೆ ವ್ಯಕ್ತಪಡಿಸಿದ್ದಾರೆ. "ಕನ್ನಡ ಚಿತ್ರರಂಗಕ್ಕೆ ಪಾರ್ವತಮ್ಮ ಅವರ ಕೊಡುಗೆ ಅಪಾರ. ಪಾರ್ವತಮ್ಮ ಅರ್ಥಪೂರ್ಣ, ಕಾದಂಬರಿ ಆಧಾರಿತ ಕಥೆ, ಅವರ ಜರ್ನಿ ನನ್ನ ಈ ಹಾದಿಗೆ ಪ್ರೇರಣೆ, ನಾನು ಪಾರ್ವತಮ್ಮ ಅವರ ಬಗ್ಗೆ ತುಂಬಾ ಓದಿದ್ದೇನೆ. ಅವರು ಮೇಲೇರಲು ಸಾಧ್ಯವಾದರೆ, ನಾವು ಕೂಡ ಮೇಲೇರಬಹುದು ಎಂದು ಅವರ ಪ್ರಯಾಣವು ನಮಗೆ ತೋರಿಸುತ್ತದೆ. ನಾನು ಅವರನ್ನು ಅನುಸರಿಸುತ್ತೇನೆ. ಜೀವನವು ಕೇವಲ ಹಣ ಗಳಿಸುವುದಲ್ಲ, ಹಣವಿದ್ದರೆ ಏನು ಬೇಕಾದರೂ ಮಾಡಬಹುದು ಎಂದು ಭಾವಿಸುವುದು ತಪ್ಪು ಕಲ್ಪನೆ ಎಂದು ಪುಷ್ಪ ಹೇಳಿದ್ದಾರೆ.

ನನ್ನ ಮಗ ಚೆನ್ನಾಗಿ ಕೆಲಸ ಮಾಡುತ್ತಿದ್ದಾನೆ, ಅವನು ಬೆಳೆಯುತ್ತಿದ್ದಾನೆ. ಆದರೆ ನನ್ನ ಉದ್ದೇಶ ಯಾವಾಗಲೂ ಸಿನಿಮಾಗೆ ಅರ್ಥಪೂರ್ಣವಾದದ್ದನ್ನು ಮಾಡುವುದು. ಪ್ರೇಕ್ಷಕರು ನಮ್ಮನ್ನು ಹೇಗೆ ಸ್ವೀಕರಿಸುತ್ತಾರೆ ಎಂಬುದನ್ನು ನೋಡಲು ನಾವು ಕಾಯುತ್ತಿದ್ದೇವೆ , ಪ್ರೇಕ್ಷಕರು ಒಪ್ಪಿಕೊಂಡರೆ ಮಾತ್ರ ನಾವು ಇಲ್ಲಿರಲು ಸಾಧ್ಯ ಎಂದಿದ್ದಾರೆ.

ವಿಶ್ರಾಂತಿ ಪಡೆದು ಹಳ್ಳಿಗೆ ಹೋಗಿ ಕೃಷಿ ಮಾಡಿಕೊಂಡು ಆರಾಮವಾಗಿ ಇರುವಂತೆ ನನ್ನ ಮಗ ಹೇಳುತ್ತಾನೆ. ಆದರೆ ನಾನು ಯಾವಾಗಲೂ ಸಿನಿಮಾಗೆ ಕೊಡುಗೆ ನೀಡಲು ಬಯಸುತ್ತೇನೆ, ವಿಶೇಷವಾಗಿ ಹೊಸಬರಿಗೆ. ಯಶ್ ಇನ್ಮುಂದೆ ಸಣ್ಣ ಚಿತ್ರಗಳನ್ನು ಮಾಡುತ್ತಾರೋ ಇಲ್ಲವೋ ನನಗೆ ಗೊತ್ತಿಲ್ಲ. ಆದರೆ ನಾನು ಹೊಸಬರಿಗೆ ಅವಕಾಶ ನೀಡಲು ಬಯಸುತ್ತೇನೆ, ಜನ ನಮ್ಮನ್ನು ಹೇಗೆ ಸ್ವೀಕರಿಸುತ್ತಾರೆ ಎಂಬುದನ್ನು ಕಾದು ನೋಡುತ್ತೇನೆ ಎಂದಿದ್ದಾರೆ.

ನಾನು ಯಶ್ ಅವರ ತಾಯಿಯಾಗಿ ಅಲ್ಲ, ಚಾಲಕ ಅರುಣ್ ಕುಮಾರ್ ಅವರ ಪತ್ನಿಯಾಗಿ ಉದ್ಯಮಕ್ಕೆ ಪ್ರವೇಶಿಸುತ್ತಿದ್ದೇನೆ, ನನ್ನ ಮಗನನ್ನೂ ಒಳಗೊಂಡಂತೆ ಎಲ್ಲರ ಕೆಲಸವನ್ನು ನಾನು ಗಮನಿಸುತ್ತೇನೆ ಮತ್ತು ಗೌರವಿಸುತ್ತೇನೆ. ಅವರ ಸಮರ್ಪಣೆ ಮತ್ತು ತಾಳ್ಮೆ ಸ್ಪೂರ್ತಿದಾಯಕವಾಗಿದೆ. ನಾವು ಪರಸ್ಪರರ ವೃತ್ತಿಪರ ಮಾರ್ಗಗಳಲ್ಲಿ ಹಸ್ತಕ್ಷೇಪ ಮಾಡದಿದ್ದರೂ, ನಮಗೆ ಪರಸ್ಪರ ನಂಬಿಕೆ ಇದೆ. ಅವರು ದೊಡ್ಡ ಬಜೆಟ್ ಚಿತ್ರ ಮಾಡುತ್ತಿದ್ದಾರೆ, ನಾನು ಸೆಟ್‌ಗೆ ಭೇಟಿ ನೀಡಿಲ್ಲ. ನನ್ನ ಅಭಿಪ್ರಾಯದಲ್ಲಿ, ನಾನು ಯಶ್ ಅವರ ತಾಯಿ ಎಂಬ ಕಾರಣಕ್ಕಾಗಿ ಯಾರೂ ನಮ್ಮ ಚಿತ್ರವನ್ನು ನೋಡುವುದಿಲ್ಲ, ಕಥೆ ಚೆನ್ನಾಗಿದ್ದರೆ ಮಾತ್ರ ಬರುತ್ತಾರೆ ಎಂದು ಪುಷ್ಪಾ ತಿಳಿಸಿದ್ದಾರೆ.

ಮಕ್ಕಳು ಸೆಟಲ್ ಆಗಿದ್ದಾರೆ, ಹೀಗಾಗಿ ನಾನು ಏನಾದರೂ ಮಾಡಬೇಕೆಂದು ಚಿತ್ರರಂಗಕ್ಕೆ ಬರುತ್ತಿದ್ದೇನೆ. ಪಾರ್ವತಮ್ಮ ರಾಜ್‌ಕುಮಾರ್ ಅನೇಕ ಕಲಾವಿದರಿಗೆ ಜೀವನ ನೀಡಿದ್ದಾರೆ. ನನ್ನ ಕೈಲಿ ಸಾಧ್ಯವಾದರೆ, ನಾನು ಸಂತೋಷಪಡುತ್ತೇನೆ. ಹೊಸ ಪ್ರತಿಭೆಗಳಿಗೆ ಅವಕಾಶ ನೀಡಲು ಈ ವೇದಿಕೆಯನ್ನು ಬಳಸೋಣ. ಯಶ್ ಗೆ ಕೂಡ ಯಾರೋ ಒಬ್ಬರು ಅವಕಾಶ ನೀಡಿದ್ದರಿಂದ ಬೆಳೆದರು ಎಂದಿದ್ದಾರೆ.

ಆರಂಭದಲ್ಲಿ, ನಿರ್ದೇಶಕರು ದೊಡ್ಡ ಬಜೆಟ್ ಕಥೆಯನ್ನು ಪ್ರಸ್ತಾಪಿಸಿದರು. ಆದರೆ ನನಗೆ ಸಮಾಜಕ್ಕೆ ಸಂದೇಶ ನೀಡುವ ಚಿತ್ರ ಬೇಕಾಗಿತ್ತು. ನನ್ನ ದೃಷ್ಟಿಗೆ ಹೊಂದಿಕೆಯಾಗುವ ಮತ್ತೊಂದು ಕಥೆಯನ್ನು ಹೊಂದಿದ್ದರು. ನಾನು ಪ್ರತಿಯೊಂದು ವಿವರದಲ್ಲೂ ತೊಡಗಿಸಿಕೊಂಡಿದ್ದೇನೆ ಮತ್ತು ತಂಡವು ಅದನ್ನು ಎಚ್ಚರಿಕೆಯಿಂದ ನಿರ್ವಹಿಸಿದೆ. ಯಶ್ ಅವರ ಕೆಲಸಕ್ಕೆ ಮನೆಯಲ್ಲಿ ಟೀಕೆ ಇರುವಂತೆ, ಅವರು ನಮ್ಮ ದೊಡ್ಡ ವಿಮರ್ಶಕರೂ ಆಗುತ್ತಾರೆ. ನನ್ನ ಮೊದಲ ಯೋಜನೆಗೆ ಯಶ್ ಅವರಿಂದ ನನಗೆ ಎಷ್ಟು ಮೆಚ್ಚುಗೆ ಸಿಗುತ್ತದೆ ಎಂದು ನನಗೆ ತಿಳಿದಿಲ್ಲ, ಆದರೆ ಅತ್ಯಂತ ಮುಖ್ಯವಾದದ್ದು ಪ್ರೇಕ್ಷಕರು ಎಂದಿದ್ದಾರೆ.

ನಾನು ಕೌಟುಂಬಿಕ ಕಥೆಗಳ ಅಭಿಮಾನಿ. ವಿಷ್ಣುವರ್ಧನ್, ಅನಂತ್ ನಾಗ್ ಮತ್ತು ರಮೇಶ್ ಅರವಿಂದ್ ಅಭಿನಯದ ಚಿತ್ರಗಳನ್ನು ನೋಡುವುದು ನನಗೆ ತುಂಬಾ ಇಷ್ಟ. ನಾನು ಎಂದಿಗೂ ಮಾಸ್ ಚಿತ್ರಗಳತ್ತ ಒಲವು ತೋರಲಿಲ್ಲ, ಆದರೆ ಇಂದಿನ ಪ್ರವೃತ್ತಿಗಳು ನಾವು ಹೊಂದಿಕೊಳ್ಳಬೇಕೆಂದು ಒತ್ತಾಯಿಸುತ್ತವೆ. ಅಂತಿಮವಾಗಿ, ಅದು ಮನರಂಜನೆಯಾಗಿರಬೇಕು.

ಚಾಮರಾಜನಗರ ಮತ್ತು ಗುಂಡ್ಲುಪೇಟೆಯ ನಡುವೆ ಇರುವ ಕೊತ್ತಲವಾಡಿ ಎಂಬ ಸ್ಥಳದ ಹೆಸರು ಇಡಲಾಗಿದೆ ಎಂದು ನಿರ್ದೇಶಕ ಶ್ರೀರಾಜ್ ತಿಳಿಸಿದ್ದಾರೆ. ಈ ಚಿತ್ರವು ಆ ಪ್ರದೇಶದ ಕಥೆಯನ್ನು ಹೇಳುತ್ತದೆ, ನಮ್ಮ ಸಮುದಾಯಗಳಲ್ಲಿ ಮುಗ್ಧತೆಯನ್ನು ಹೆಚ್ಚಾಗಿ ಹೇಗೆ ಬಳಸಿಕೊಳ್ಳಲಾಗುತ್ತದೆ ಎಂಬುದರ ಬಗ್ಗೆ ಕತೆ ಇದೆ ಎಂದಿದ್ದಾರೆ.