ತಮಿಳುನಾಡು ಮುಖ್ಯಮಂತ್ರಿ ವಿಜಯ್ ಅವರ ಪುತ್ರ ಜೇಸನ್ ಸಂಜಯ್, ನಟನಾಗಿ ಚಿತ್ರರಂಗಕ್ಕೆ ಪದಾರ್ಪಣೆ ಮಾಡಲು ಸಜ್ಜಾಗುತ್ತಿದ್ದಾರೆ ಎಂದು ವರದಿಯಾಗಿದೆ. ಈ ಯೋಜನೆಗೆ ಖ್ಯಾತ ನಿರ್ದೇಶಕ ಹಾಗೂ ಸಿಎಂ ವಿಜಯ್ ಆಪ್ತ ಅಟ್ಲೀ ಬೆಂಬಲ ನೀಡುತ್ತಿದ್ದಾರೆ ಎನ್ನಲಾಗಿದೆ.
'ಡ್ಯೂಡ್' (Dude) ಚಿತ್ರದ ಮೂಲಕ ಗುರುತಿಸಿಕೊಂಡ ನಿರ್ದೇಶಕ ಕೀರ್ತಿಶ್ವರನ್ ಅವರು ಈ ಚಿತ್ರವನ್ನು ನಿರ್ದೇಶಿಸುವ ಸಾಧ್ಯತೆಯಿದೆ.
ಆರಂಭದಲ್ಲಿ ಚಲನಚಿತ್ರ ನಿರ್ಮಾಣದತ್ತ ಆಸಕ್ತಿ ಹೊಂದಿದ್ದ ಜೇಸನ್, ಸಂದೀಪ್ ಕಿಶನ್ ನಟನೆಯ 'ಸಿಗ್ಮಾ' ಚಿತ್ರದ ಮೂಲಕ ನಿರ್ದೇಶಕರಾಗಿ ಚಿತ್ರರಂಗ ಪ್ರವೇಶಿಸಿದ್ದರು. ಆದರೆ, ಸಿಗ್ಮಾ ಹೀನಾಯ ಸೋಲು ಕಂಡ ನಂತರ ನಟನೆಯತ್ತ ಗಮನಹರಿಸಲು ಸಿದ್ಧರಾಗುತ್ತಿದ್ದು, ಇದು ಅವರ ವೃತ್ತಿಜೀವನದ ಯೋಜನೆಗಳಲ್ಲಿನ ಪ್ರಮುಖ ಬದಲಾವಣೆಯಾಗಿದೆ.
ಅತ್ಯಂತ ಕುತೂಹಲಕಾರಿ ಸಂಗತಿಯೆಂದರೆ, ದಳಪತಿ ವಿಜಯ್ ಅವರ ಆಪ್ತ ಮಿತ್ರ ಹಾಗೂ ಭಾರತೀಯ ಚಿತ್ರರಂಗದ ಪ್ರಸಿದ್ಧ ನಿರ್ದೇಶಕ ಅಟ್ಲಿ ಅವರು ಈ ಚಿತ್ರವನ್ನು ನಿರ್ಮಿಸಲು ಮುಂದೆ ಬಂದಿದ್ದಾರೆ. ಇತ್ತೀಚೆಗಷ್ಟೇ ನಿರ್ಮಾಪಕನಾಗಿ ಯಶಸ್ಸನ್ನು ಅನುಭವಿಸಿರುವ ಅಟ್ಲಿ ಅವರು ಸಂಜಯ್ ಅವರನ್ನು ಕಾಲಿವುಡ್‌ನ ಮುಂದಿನ ಸೂಪರ್‌ಸ್ಟಾರ್ ಆಗಿ ರೂಪಿಸಲು ವೈಯಕ್ತಿಕವಾಗಿ ಆಸಕ್ತಿ ವಹಿಸುತ್ತಿದ್ದಾರೆ ಎನ್ನಲಾಗಿದೆ.
ಜೇಸನ್ ಸಂಜಯ್ ಅವರ ನಿರ್ದೇಶನದ ಚೊಚ್ಚಲ ಚಿತ್ರವನ್ನು ನಿರ್ಮಿಸಿದ್ದ ‘ಲೈಕಾ ಪ್ರೊಡಕ್ಷನ್ಸ್’ ಸಂಸ್ಥೆಯೇ ಅವರ ನಟನೆಯ ಚೊಚ್ಚಲ ಚಿತ್ರವನ್ನೂ ನಿರ್ಮಾಣ ಮಾಡಲಿದೆ ಎಂದು ಆರಂಭದಲ್ಲಿ ವರದಿಯಾಗಿತ್ತು. ಆದರೆ ‘ಸಿಗ್ಮಾ’ ಚಿತ್ರದ ಫಲಿತಾಂಶದ ನಂತರ ಯೋಜನೆಯಲ್ಲಿ ಬದಲಾವಣೆಯಾಗಿದೆ ಎನ್ನಲಾಗುತ್ತಿದೆ. ವಿಜಯ್ ಅವರ ಪುತ್ರನ ನಟನೆಯ ಎಂಟ್ರಿ ಕುರಿತು ಸೋಶಿಯಲ್ ಮೀಡಿಯಾದಲ್ಲಿ ವಿವಿಧ ಅಭಿಪ್ರಾಯಗಳು ವ್ಯಕ್ತವಾಗುತ್ತಿದೆ.
ಕುತೂಹಲಕಾರಿ ಸಂಗತಿಯೆಂದರೆ, ನಿರ್ದೇಶಕ ಕೀರ್ತಿಶ್ವರನ್ ಈಗಾಗಲೇ ಸಿಲಂಬರಸನ್ ಟಿ.ಆರ್. (STR) ಅವರೊಂದಿಗೆ ಒಂದು ಚಿತ್ರ ಮಾಡಲು ಒಪ್ಪಂದ ಮಾಡಿಕೊಂಡಿದ್ದಾರೆ. ಜೇಸನ್ ಸಂಜಯ್ ಅವರನ್ನು ನಿರ್ದೇಶಿಸುವ ಅವಕಾಶದ ಬಗ್ಗೆ ಅವರು STR ಅವರಿಗೆ ತಿಳಿಸಿದ್ದು, ಅದಕ್ಕೆ STR ಕೂಡ ಸಮ್ಮತಿ ಸೂಚಿಸಿದ್ದಾರೆ ಎಂದು ವರದಿಯಾಗಿದೆ.
ತಮಿಳು ಚಿತ್ರರಂಗದಲ್ಲಿ ಅಟ್ಲೀ ಅವರಿಗಿರುವ ಸ್ಥಾನಮಾನವನ್ನು ಗಮನಿಸಿದರೆ, ಅವರ ಈ ಸಹಭಾಗಿತ್ವವು ಈ ಬೆಳವಣಿಗೆಯ ಬಗ್ಗೆ ಇನ್ನಷ್ಟು ಕುತೂಹಲ ಮೂಡಿಸಿದೆ. ಅಟ್ಲೀ ಅವರು ವಿಜಯ್ ಅವರೊಂದಿಗೆ ಮೂರು ಬೃಹತ್ ಬ್ಲಾಕ್‌ಬಸ್ಟರ್ ಚಿತ್ರಗಳನ್ನು ನೀಡಿದ್ದರು; ಇವು ವಿಜಯ್ ಅವರ ತಾರಾ ವರ್ಚಸ್ಸನ್ನು ಬದಲಾಯಿಸುವಲ್ಲಿ ಮತ್ತು ಅಂತಿಮವಾಗಿ ಅವರು ರಾಜಕೀಯ ಯಶಸ್ಸನ್ನು ಕಾಣುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದವು. ಹಾಗಾಗಿ, ಜೇಸನ್ ಸಂಜಯ್ ಅವರ ವಿಷಯದಲ್ಲೂ ಅಟ್ಲೀ ಅಂತಹದ್ದೇ ಪ್ರಯತ್ನಕ್ಕೆ ಮುಂದಾಗಿರಬಹುದು.
