'ರಾಮಾಯಣ' ಚಿತ್ರದ ನಿರ್ಮಾಪಕರು ಗಣೇಶ ಚತುರ್ಥಿಯ ಶುಭ ಸಂದರ್ಭದಲ್ಲಿ ಚಿತ್ರದ ಮೊದಲ ಹಾಡಾದ 'ಜೈ ಜೈ ರಾಮ್' ಹಾಡನ್ನು ಬಿಡುಗಡೆ ಮಾಡುವ ಮೂಲಕ ಚಿತ್ರದ ಸಂಗೀತ ಪಯಣಕ್ಕೆ ಚಾಲನೆ ನೀಡಿದರು.
ರಣಬೀರ್ ಕಪೂರ್ ಮತ್ತು ಸಾಯಿ ಪಲ್ಲವಿ ಅಭಿನಯದ ಈ ಪೌರಾಣಿಕ ಮಹಾಕಾವ್ಯ ಆಧಾರಿತ ಸಿನಿಮಾಗೆ ಎ.ಆರ್. ರೆಹಮಾನ್ ಸಂಗೀತ ಸಂಯೋಜನೆ ಮಾಡಿದ್ದಾರೆ.
ಶ್ರೇಯಾ ಘೋಷಾಲ್ ಮತ್ತು ಅರಿಜಿತ್ ಸಿಂಗ್ ಧ್ವನಿ ನೀಡಿರುವ 'ಜೈ ಜೈ ರಾಮ್' ಹಾಡು, ಆರತಿಯ ಆಧ್ಯಾತ್ಮಿಕ ಸ್ವರೂಪ ಮತ್ತು ಸಿನಿಮೀಯ ಸಂಗೀತ ಶೈಲಿಯ ಸಮ್ಮಿಲನವಾಗಿದೆ. ಕುಮಾರ್ ವಿಶ್ವಾಸ್ ರಚಿಸಿರುವ ಇದರ ಸಾಹಿತ್ಯವು ಶ್ರೀರಾಮನ ಕರುಣೆ, ರಕ್ಷಣೆ ಮತ್ತು ಧರ್ಮನಿಷ್ಠೆಯನ್ನು ಪ್ರತಿಬಿಂಬಿಸುತ್ತದೆ; ಜೊತೆಗೆ, ಹಾಡಿನಲ್ಲಿ ಪುನರಾವರ್ತನೆಯಾಗುವ ಸ್ತುತಿಯು ಇದಕ್ಕೆ ಭಕ್ತಿಪೂರ್ಣವಾದ ಆಳವಾದ ಭಾವವನ್ನು ನೀಡುತ್ತದೆ.
'ರಾಮಾಯಣ'ದ ಮೊದಲ ಗೀತೆಯ ಕುರಿತು ಮಾತನಾಡಿರುವ ಎ.ಆರ್. ರೆಹಮಾನ್, "'ಜೈ ಜೈ ರಾಮ್' ಗೀತೆಯ ಮೂಲ ತಿರುಳು ಶ್ರೀರಾಮನ ಹೆಸರಿನ ಸರಳ ಹಾಗೂ ಪ್ರಭಾವಶಾಲಿ ಪುನರಾವರ್ತನೆಯಾಗಿದೆ. ಪ್ರಾರ್ಥನೆಯಲ್ಲಿರುವ ಪಾವಿತ್ರ್ಯ ಮತ್ತು ಆತ್ಮೀಯತೆಯನ್ನು ಉಳಿಸಿಕೊಳ್ಳುತ್ತಲೇ, ಈ ರಚನೆಯನ್ನು ಒಂದು ಚಲನಚಿತ್ರ ಗೀತೆಯ ಮಟ್ಟಕ್ಕೆ ವಿಸ್ತರಿಸುವುದು ಉದ್ದೇಶವಾಗಿತ್ತು. ಗೀತೆಯ ಕೇಂದ್ರಬಿಂದುವಾಗಿರುವ ಭಕ್ತಿಗೆ ಧಕ್ಕೆ ಬಾರದಂತೆ, ಅರಿಜಿತ್ ಸಿಂಗ್ ಮತ್ತು ಶ್ರೇಯಾ ಘೋಷಾಲ್ ಅವರು ಡಾ. ಕುಮಾರ್ ವಿಶ್ವಾಸ್ ಅವರ ಸಾಹಿತ್ಯಕ್ಕೆ ತಮ್ಮದೇ ಆದ ವಿಶಿಷ್ಟ ಭಾವಪೂರ್ಣ ಅಭಿವ್ಯಕ್ತಿಯನ್ನು ನೀಡಿದ್ದಾರೆ." ಎಂದು ಹೇಳಿದ್ದಾರೆ.
ಡಾ. ಕುಮಾರ್ ವಿಶ್ವಾಸ್ ಮಾತನಾಡಿ, "'ಜೈ ಜೈ ರಾಮ್' ಎಂಬುದು ಮೂರು ಸರಳ ಪದಗಳಾದರೂ, ಅವುಗಳಲ್ಲೇ ಒಂದು ಸಂಪೂರ್ಣ ಪ್ರಾರ್ಥನೆ ಅಡಗಿದೆ. ಶ್ರೀರಾಮನನ್ನು ವರ್ಣಿಸುವುದು ನನ್ನ ಪ್ರಯತ್ನವಾಗಿರಲಿಲ್ಲ - ಏಕೆಂದರೆ ಅವರ ಅರ್ಥವನ್ನು ಪದಗಳಲ್ಲಿ ಹಿಡಿದಿಡಲು ಸಾಧ್ಯವಿಲ್ಲ - ಬದಲಾಗಿ, ಪ್ರತಿಯೊಬ್ಬ ಭಕ್ತನೂ ಅವರೊಂದಿಗೆ ಹೊಂದಿರುವ ಸಂಬಂಧವನ್ನು - ಅಂದರೆ ನಮ್ಮ ಮಾರ್ಗದರ್ಶಕ, ನಮ್ಮ ಶಕ್ತಿ ಮತ್ತು ನಮ್ಮ ಆಶ್ರಯದಾತನಾಗಿರುವ ಅವರೊಂದಿಗಿನ ನಂಟನ್ನು ವ್ಯಕ್ತಪಡಿಸುವುದೇ ನನ್ನ ಉದ್ದೇಶವಾಗಿತ್ತು. ಭಾಷೆಯನ್ನು ಸರಳ ಮತ್ತು ನೇರವಾಗಿ ಇರಿಸಲಾಗಿದೆ, ಏಕೆಂದರೆ ನಿಜವಾದ ಭಕ್ತಿಗೆ ಯಾವುದೇ ಅಲಂಕಾರದ ಅಗತ್ಯವಿರುವುದಿಲ್ಲ." ಎಂದು ಹೇಳಿದ್ದಾರೆ.
ನಿತೇಶ್ ತಿವಾರಿ ನಿರ್ದೇಶನದ 'ರಾಮಾಯಣ' ಚಿತ್ರದಲ್ಲಿ ರಣಬೀರ್ ಕಪೂರ್ ಶ್ರೀರಾಮನಾಗಿ, ಸಾಯಿ ಪಲ್ಲವಿ ಸೀತೆಯಾಗಿ, ಯಶ್ ರಾವಣನಾಗಿ, ಸನ್ನಿ ಡಿಯೋಲ್ ಹನುಮಂತನಾಗಿ ಮತ್ತು ರವಿ ದುಬೆ ಲಕ್ಷ್ಮಣನಾಗಿ ನಟಿಸಿದ್ದಾರೆ. ಈ ಚಿತ್ರದ ಬೃಹತ್ ತಾರಾಗಣದಲ್ಲಿ ವಿವೇಕ್ ಒಬೆರಾಯ್, ಅರುಣ್ ಗೋವಿಲ್, ಲಾರಾ ದತ್ತಾ, ಶೀಬಾ ಚಡ್ಡಾ ಮತ್ತು ರಕುಲ್ ಪ್ರೀತ್ ಸಿಂಗ್ ಸೇರಿದಂತೆ ಅನೇಕ ಖ್ಯಾತ ಕಲಾವಿದರು ಇದ್ದಾರೆ.
ನಮಿತ್ ಮಲ್ಹೋತ್ರಾ ಅವರ 'ಪ್ರೈಮ್ ಫೋಕಸ್ ಸ್ಟುಡಿಯೋಸ್' (Prime Focus Studios), 8 ಬಾರಿ ಅಕಾಡೆಮಿ ಪ್ರಶಸ್ತಿ ಗೆದ್ದಿರುವ 'DNEG' ಮತ್ತು ಯಶ್ ಅವರ 'ಮಾನ್ಸ್ಟರ್ ಮೈಂಡ್ ಕ್ರಿಯೇಷನ್ಸ್' (Monster Mind Creations) ಸಹಯೋಗದಲ್ಲಿ ನಿರ್ಮಾಣವಾಗುತ್ತಿರುವ ಹಾಗೂ ಸೋನಿ ಪಿಕ್ಚರ್ಸ್ ಮೂಲಕ ಜಾಗತಿಕವಾಗಿ (ಭಾರತವನ್ನು ಹೊರತುಪಡಿಸಿ) ವಿತರಣೆಯಾಗಲಿರುವ 'ರಾಮಾಯಣ: ಭಾಗ 1' (Ramayana: Part 1), 2026ರ ದೀಪಾವಳಿಯಂದು ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲಿದೆ. ಈ ಚಿತ್ರವು ಮೊದಲು ನವೆಂಬರ್ 6 ರಂದು ವಿದೇಶಗಳಲ್ಲಿ ಮತ್ತು ನಂತರ ನವೆಂಬರ್ 8 ರಂದು ದೇಶೀಯವಾಗಿ ಬಿಡುಗಡೆಯಾಗಲಿದೆ.
