ಬ್ರಿಟನ್ ನಲ್ಲಿ ಸರಿ ಸುಮಾರು 3 ಮಿಲಿಯನ್ ಯೂರೋಪಿನ ಇತರ ದೇಶದ ಜನರು ವಾಸಿಸುತ್ತಿದ್ದಾರೆ. ಹಾಗೆಯೇ ಬ್ರಿಟನ್ ನಲ್ಲಿ ಜನಿಸಿದ 1.3 ಮಿಲಿಯನ್ ಬ್ರಿಟಿಷರು ಯೂರೋಪಿನ ಇತರ ದೇಶದಲ್ಲಿ ಬದುಕು ಕಂಡು ಕೊಂಡಿದ್ದಾರೆ. ಅಂದರೆ ಒಕ್ಕೂಟದಿಂದ ಹೊರ ಹೋಗುವ ನಿರ್ಧಾರ ಸರಿ ಸುಮಾರು 5 ಮಿಲಿಯನ್ ಜನರ ಬದುಕಲ್ಲಿ ತಲ್ಲಣ ಉಂಟುಮಾಡಲಿದೆ. ಇಲ್ಲಿಯವರನ್ನು ಅಲ್ಲಿಗೆ ವಾಪಸ್ ಕಳಿಸುವುದು, ಅಲ್ಲಿನವರನ್ನು ಇಲ್ಲಿಗೆ ಕರೆಸಿಕೊಳ್ಳುವುದು ಸುಲಭದ ಮಾತಲ್ಲ. ಅಲ್ಲದೆ NHS (ನ್ಯಾಷನಲ್ ಹೆಲ್ತ್ ಸರ್ವಿಸ್) ನಲ್ಲಿ ಕೆಲಸ ಮಾಡುವ ಸಿಬ್ಬಂದಿಯಲ್ಲಿ 5 ಪ್ರತಿಶತ ಯೂರೋಪಿನ ಇತರ ದೇಶದ ಪ್ರಜೆಗಳು ಇವರ ಕೆಲಸ ಬದುಕು ವಲಸೆ ನೀತಿ ಅವಲಂಬಿಸಿದೆ. ಒಕ್ಕೂಟದಿಂದ ಹೊರಬಂದ ನಂತರ ವಲಸೆ ನೀತಿ ಬದಲಾದರೆ, 5 ಪ್ರತಿಶತ ಸಿಬ್ಬಂದಿ ತಮ್ಮ ದೇಶಕ್ಕೆ ಮರಳಿದರೆ, ಹೆಲ್ತ್ ಸರ್ವಿಸ್ ನಲ್ಲಿ ಅಸಮತೋಲನ ಏರ್ಪಡುವುದನ್ನು ತಪ್ಪಿಸಲಾಗುವುದಿಲ್ಲ.