ಪಾಕಿಸ್ತಾನ ತಂಡ ಟೀಂ ಇಂಡಿಯಾ ನೋಡಿ ಕಲಿಯುವುದು ಬಹಳಷ್ಟಿದೆ: ಸಲ್ಮಾನ್ ಭಟ್

ದುಬೈ: ಅಭ್ಯಾಸ ಪಂದ್ಯಗಳಲ್ಲಿ ಪಾಕಿಸ್ತಾನ ತಂಡ ಅನುಸರಿಸುತ್ತಿರುವ ವೈಖರಿಯನ್ನು ಆ ದೇಶದ  ಮಾಜಿ ಕ್ರಿಕೆಟಿಗ ಸಲ್ಮಾನ್ ಭಟ್ ತೀವ್ರ ತರಾಟೆಗೆ ತೆಗೆದುಕೊಂಡಿದ್ದಾರೆ. 

ಫಾರ್ಮ್‌ ನಲ್ಲಿ ಇಲ್ಲದ ಆಟಗಾರರಿಗೆ ಅವಕಾಶ ನೀಡದೆ ಅಭ್ಯಾಸ ಪಂದ್ಯಗಳಲ್ಲಿಯೂ ಅಭದ್ರತೆ ಮನಸ್ಥಿತಿಯಿಂದ ಆಡುವುದೆಂದರೆ ಏನು? ಎಂದು ಅವರು ಆಕ್ರೋಶ  ಹೊರಹಾಕಿದ್ದಾರೆ. ಈ ವಿಷಯದಲ್ಲಿ ಟೀಂ ಇಂಡಿಯಾ ನೋಡಿ ಕಲಿಯುವುದು ಬಹಳಷ್ಟಿದೆ ಎಂದು ಚುರುಕು ಮುಟ್ಟಿಸಿದ್ದಾರೆ.

ಟಿ 20 ವಿಶ್ವಕಪ್‌ ಭಾಗವಾಗಿ ಪಾಕಿಸ್ತಾನ  ಸೋಮವಾರ ನಡೆದ ಅಭ್ಯಾಸ ಪಂದ್ಯದಲ್ಲಿ ವೆಸ್ಟ್ ಇಂಡೀಸ್ ತಂಡವನ್ನು ಏಳು ವಿಕೆಟ್ ಗಳಿಂದ ಸೋಲಿಸಿತು. ಆದರೆ, ಬುಧವಾರ ನಡೆದ  ಪಂದ್ಯದಲ್ಲಿ ದಕ್ಷಿಣ ಆಫ್ರಿಕಾ ಎದುರು 6 ವಿಕೆಟ್ ಗಳಿಂದ ಪರಾಭವಗೊಂಡಿತ್ತು.

ಆರಂಭಿಕ ಆಟಗಾರರಾದ ರಿಜ್ವಾನ್, ಬಾಬರ್ ಅಜಮ್, 20 ರನ್ ಕೂಡ ಗಳಿಸದೇ ಪೆವಿಲಿಯನ್ ಸೇರಿದರು. ಫಖರ್ ಜಮಾನ್ ಅರ್ಧಶತಕ ಪೂರೈಸಿ ನಿವೃತ್ತಗೊಂಡು ಇತರರಿಗೆ ಆಡಲು ಅವಕಾಶ ನೀಡಿದ್ದರು.

ದಕ್ಷಿಣ ಆಫ್ರಿಕಾದ ಆಹ್ವಾನದ ಮೇರೆಗೆ ಮೊದಲು ಬ್ಯಾಟ್ ಮಾಡಿದ ಪಾಕಿಸ್ತಾನ 6 ವಿಕೆಟ್ ಕಳೆದುಕೊಂಡು 186 ರನ್ ಗಳಿಸಿತು. ಗುರಿ ಬೆನ್ನಟ್ಟಿದ ದಕ್ಷಿಣ ಆಫ್ರಿಕಾದ ಪ್ರೋಟಿಯಸ್, ವ್ಯಾನ್ ಡೆರ್ ಡಾಸನ್ ಶತಕದೊಂದಿಗೆ ಮಿಂಚಿ ತಂಡ ಗೆಲ್ಲಿಸಿದರು.