ಮುಂಬೈ: ಅಂತಾರಾಷ್ಟ್ರೀಯ ಕ್ರಿಕೆಟ್ ಅನ್ನು ಮತಷ್ಟು ರೋಚಕವಾಗಿಸಲು ಅಂತಾರಾಷ್ಟ್ರೀಯ ಕ್ರಿಕೆಟ್ ಸಮಿತಿ ಕ್ರಿಕೆಟ್ ನಿಯಮಗಳಲ್ಲಿ ಮಹತ್ವದ ಬದಲಾವಣೆಗಳನ್ನು ಮಾಡಿದೆ.
ಹೌದು.. ಅಂತರರಾಷ್ಟ್ರೀಯ ಕ್ರಿಕೆಟ್ ಅನ್ನು ಮತ್ತಷ್ಟು ರೋಚಕಗೊಳಿಸುವ ಸಲುವಾಗಿ ಐಸಿಸಿ ತನ್ನ ಹಳೆಯ ನಿಯಮಗಳಲ್ಲಿ ಬದಲಾವಣೆಗಳನ್ನು ತರುವುದರೊಂದಿಗೆ ಹೊಸ ನಿಯಮಗಳನ್ನು ಜಾರಿಗೊಳಿಸುತ್ತಿದೆ. ಆ ಪ್ರಕಾರ, ಟೆಸ್ಟ್ ಕ್ರಿಕೆಟ್ನಲ್ಲಿ ಸಾಕಷ್ಟು ಬದಲಾವಣೆಗಳನ್ನು ಮಾಡಿ ಜಾರಿಗೆ ತಂದಿದ್ದ ಐಸಿಸಿ, ಇದೀಗ ಟಿ20 ಕ್ರಿಕೆಟ್ನ ನಿಯಮದಲ್ಲೂ ಒಂದು ಬದಲಾವಣೆ ಮಾಡಿದೆ.
ಟಿ20 ಪವರ್ ಪ್ಲೇ ನಿಯಮ
ಐಸಿಸಿ ಇದೀಗ ಪುರುಷರ ಅಂತರರಾಷ್ಟ್ರೀಯ ಟಿ20 ಕ್ರಿಕೆಟ್ ಪಂದ್ಯಗಳ ಪವರ್‌ಪ್ಲೇ ನಿಯಮದಲ್ಲಿ ಪ್ರಮುಖ ಬದಲಾವಣೆ ಮಾಡಿದ್ದು, ಐಸಿಸಿ ತಂದಿರುವ ಹೊಸ ಬದಲಾವಣೆಯ ಪ್ರಕಾರ, ಟಿ20 ಅಂತರರಾಷ್ಟ್ರೀಯ ಪಂದ್ಯದಲ್ಲಿ ಮಳೆ ಅಥವಾ ಇನ್ನಾವುದೇ ಕಾರಣದಿಂದಾಗಿ ಇನ್ನಿಂಗ್ಸ್‌ನ ಓವರ್ಗಳನ್ನು ಕಡಿಮೆ ಮಾಡಿದರೆ, ಪವರ್‌ಪ್ಲೇ ಓವರ್ಗಳನ್ನು ಓವರ್‌ಗಳ ಬದಲಿಗೆ ಚೆಂಡುಗಳ ಆಧಾರದ ಮೇಲೆ ನಿರ್ಧರಿಸಲಾಗುತ್ತದೆ.
20 ಓವರ್‌ಗಳ ಇನ್ನಿಂಗ್ಸ್‌ನಲ್ಲಿ ಮೊದಲ 6 ಓವರ್‌ಗಳು ಪವರ್‌ಪ್ಲೇ ಆಗಿದ್ದವು. ಈ 6 ಓವರ್ಗಳಲ್ಲಿ ಫೀಲ್ಡಿಂಗ್ ಮಾಡುತ್ತಿರುವ ತಂಡವು 30 ಯಾರ್ಡ್ ವೃತ್ತದ ಹೊರಗೆ ಇಬ್ಬರಿಗಿಂತ ಹೆಚ್ಚು ಫೀಲ್ಡರ್‌ಗಳನ್ನು ಇರಿಸುವಂತಿಲ್ಲ. ಆ ಬಳಿಕ ಅಂದರೆ 6 ಓವರ್ ಮುಗಿದ ನಂತರ ಉಳಿದ ಓವರ್ಗಳಲ್ಲಿ, 30 ಯಾರ್ಡ್ ವೃತ್ತದ ಹೊರಗೆ ಐದು ಫೀಲ್ಡರ್‌ಗಳನ್ನು ನಿಲ್ಲಿಸಬಹುದು.
ಆದರೆ ಇದೀಗ ಐಸಿಸಿ ತಂದಿರುವ ಹೊಸ ನಿಯಮದ ಪ್ರಕಾರ, ಒಂದು ಇನ್ನಿಂಗ್ಸ್ 5 ಓವರ್‌ಗಳಾಗಿದ್ದರೆ, ಅಂದರೆ ಮಳೆ ಅಥವಾ ಇನ್ನಿತ್ತರ ಕಾರಣದಿಂದ ಉಭಯ ತಂಡಗಳಿಗೆ ಕೇವಲ 5 ಓವರ್ಗಳನ್ನು ನಿಗದಿಪಡಿಸಿದರೆ, ಆಗ ಪವರ್‌ಪ್ಲೇ 1.3 ಓವರ್‌ಗಳಾಗಿರುತ್ತದೆ. ಅಂದರೆ ಈ 9 ಎಸೆತಗಳಲ್ಲಿ ಕೇವಲ ಇಬ್ಬರು ಫೀಲ್ಡರ್ಗಳು ಮಾತ್ರ 30 ಯಾರ್ಡ್ ಸರ್ಕಲ್ನಿಂದ ಹೊರಗೆ ನಿಲ್ಲಬೇಕು. ಹಾಗೆಯೇ ಪಂದ್ಯ 6 ಓವರ್‌ಗಳ ಇನ್ನಿಂಗ್ಸ್‌ನದ್ದಾಗಿದ್ದರೆ, ಪವರ್‌ಪ್ಲೇ 1.5 ಓವರ್‌ಗಳಾಗಿರುತ್ತದೆ.
10 ಓವರ್‌ಗಳದ್ದಾಗಿದ್ದರೆ, ಪವರ್‌ಪ್ಲೇ 3 ಓವರ್‌ಗಳಾಗಿರುತ್ತದೆ. ಒಂದು ವೇಳೆ ಪಂದ್ಯವು 19 ಓವರ್‌ಗಳಾಗಿದ್ದರೆ, ಪವರ್‌ಪ್ಲೇ 5.4 ಓವರ್‌ಗಳಾಗಿರುತ್ತದೆ. ಈಗಾಗಲೇ ಟಿ20 ಬ್ಲಾಸ್ಟ್ ಪಂದ್ಯಾವಳಿಯಲ್ಲಿ ಈ ನಿಯಮವನ್ನು ಜಾರಿಗೆ ತಂದಿದ್ದು. ಇದೀಗ ಅಂತರರಾಷ್ಟ್ರೀಯ ಕ್ರಿಕೆಟ್ನಲ್ಲಿ ಈ ನಿಯಮವನ್ನು ಜುಲೈ 2 ರಿಂದ ಜಾರಿಗೆ ತರಲಾಗುತ್ತಿದೆ.
Stop clock ನಿಯಮ
ಇದೇ ವೇಳೆ ಅಂತಾರಾಷ್ಟ್ರೀಯ ಕ್ರಿಕೆಟ್ ನಲ್ಲಿ ಓವರ್ ರೇಟ್‌ಗಳನ್ನು ಸುಧಾರಿಸುವ ಮತ್ತು ವಿಳಂಬವನ್ನು ಕಡಿಮೆ ಮಾಡುವ ಪ್ರಯತ್ನದಲ್ಲಿ, ಈಗಾಗಲೇ ವೈಟ್-ಬಾಲ್ ಸ್ವರೂಪಗಳಲ್ಲಿ ಪ್ರಯೋಗಿಸಲಾದ ಸ್ಟಾಪ್ ಕ್ಲಾಕ್ ನಿಯಮವನ್ನು ಈಗ ಟೆಸ್ಟ್ ಕ್ರಿಕೆಟ್ನಲ್ಲಿ ಶಾಶ್ವತ ವೈಶಿಷ್ಟ್ಯವಾಗಿಸಲು ಐಸಿಸಿ ನಿರ್ಧಿಸಿದೆ. ಫೀಲ್ಡಿಂಗ್ ತಂಡಗಳು ಹಿಂದಿನ ಓವರ್ ಅನ್ನು ಪೂರ್ಣಗೊಳಿಸಿದ 60 ಸೆಕೆಂಡುಗಳ ಒಳಗೆ ಹೊಸ ಓವರ್ ಅನ್ನು ಪ್ರಾರಂಭಿಸಬೇಕು. ತಂಡಗಳಿಗೆ ಪ್ರತಿ ಇನ್ನಿಂಗ್ಸ್‌ಗೆ ಎರಡು ಎಚ್ಚರಿಕೆಗಳನ್ನು ನೀಡಲಾಗುತ್ತದೆ; ಯಾವುದೇ ಮುಂದಿನ ಉಲ್ಲಂಘನೆಗೆ ಐದು ರನ್‌ಗಳ ದಂಡ ವಿಧಿಸಲಾಗುತ್ತದೆ. ಹೊಸ ಚೆಂಡಿನ ಲಭ್ಯತೆಗೆ ಅನುಗುಣವಾಗಿ ಈ ಎಚ್ಚರಿಕೆಗಳನ್ನು ಪ್ರತಿ 80 ಓವರ್‌ಗಳಿಗೆ ಮರುಹೊಂದಿಸಲಾಗುತ್ತದೆ.
ODI ಪಂದ್ಯಗಳಲ್ಲಿ, ಎರಡು ಚೆಂಡುಗಳ ಬಳಕೆ
ಏಕದಿನ ಕ್ರಿಕೆಟ್ ನಲ್ಲಿ 2 ಚೆಂಡುಗಳ ಬಳಕೆಯನ್ನು ಮೊದಲ 34 ಓವರ್‌ಗಳಿಗೆ ಸೀಮಿತಗೊಳಿಸಲಾಗಿದೆ. ಕೊನೆಯ 16 ಓವರ್‌ಗಳಿಗೆ, ಫೀಲ್ಡಿಂಗ್ ತಂಡವು ಮುಂದುವರಿಸಲು ಎರಡು ಚೆಂಡುಗಳಲ್ಲಿ ಒಂದನ್ನು ಆಯ್ಕೆ ಮಾಡುತ್ತದೆ. ಈ ಕ್ರಮವು ಚೆಂಡಿನ ಸವೆತ ಮತ್ತು ಹರಿದುಹೋಗುವಿಕೆ, ಶೇಪ್ ಕಳೆದುಕೊಳ್ಳುವಿಕೆಯನ್ನು ಹೆಚ್ಚು ಪರಿಣಾಮಕಾರಿಯಾಗಿ ನಿರ್ವಹಿಸುವ ಗುರಿಯನ್ನು ಹೊಂದಿದೆ.
ಹೊಸ ಬೌಂಡರಿ ಕ್ಯಾಚ್ ನಿಯಮ
ಬೌಂಡರಿಯಿಂದ ಸಂಪೂರ್ಣವಾಗಿ ಹೊರಗೆ ಜಿಗಿದು ಹಿಡಿಯುವ ಕ್ಯಾಚ್‌ಗಳನ್ನು ಅಮಾನ್ಯಗೊಳಿಸಲಾಗಿದೆ. ಹೊಸ ನಿಯಮದ ಪ್ರಕಾರ, ಆಟಗಾರ ಬೌಂಡರಿಯಿಂದ ಹೊರಗೆ ಜಿಗಿದು ಚೆಂಡನ್ನು ಒಮ್ಮೆ ಮಾತ್ರ ಮುಟ್ಟಬಹುದು. ನಂತರ ಅವರು ಬೌಂಡರಿಯೊಳಗೆ ನೆಲಕ್ಕೆ ತಾಗಬೇಕು. ಒಂದು ವೇಳೆ ಅವರು ಹಾಗೆ ಮಾಡದಿದ್ದರೆ, ಬೌಂಡರಿ ಎಂದು ಪರಿಗಣಿಸಲಾಗುತ್ತದೆ
ಕನ್ಕ್ಯುಶನ್ ಬದಲಿ ನಿಯಮ ಮತ್ತು ಕಡ್ಡಾಯ ವಿಶ್ರಾಂತಿ
ತಂಡಗಳು ಈಗ ಕನ್ಕ್ಯುಶನ್ ಬದಲಿಗಳನ್ನು ಮೊದಲೇ ನಾಮನಿರ್ದೇಶನ ಮಾಡಬೇಕಾಗುತ್ತದೆ. ಕನ್ಕ್ಯುಶನ್ ಹೊಂದಿರುವ ಯಾವುದೇ ಆಟಗಾರನು ಸ್ಪರ್ಧಾತ್ಮಕ ಆಟಕ್ಕೆ ಮರಳುವ ಮೊದಲು ಕಡ್ಡಾಯವಾಗಿ ಏಳು ದಿನಗಳ ವಿಶ್ರಾಂತಿ ಅವಧಿಯನ್ನು ಪಾಲಿಸಬೇಕು ಎಂದು ಹೇಳಲಾಗಿದೆ.
ವೈಡ್ ಬಾಲ್ ನಿಯಮ ಪ್ರಯೋಗ
ವೈಟ್-ಬಾಲ್ ಕ್ರಿಕೆಟ್ನಲ್ಲಿ ಹೊಸ ವೈಡ್ ಬಾಲ್ ನಿಯಮವನ್ನು ಪ್ರಾಯೋಗಿಕವಾಗಿ ಅನ್ವಯಿಸಲಾಗುತ್ತದೆ. ಬ್ಯಾಟರ್ ಗಳು ವೈಡ್ ಬಾಲ್ ಅನ್ನು ಡಿಆರ್ ಎಸ್ ರೂಪದಲ್ಲಿ ಪ್ರಶ್ನಿಸಬಹುದು. ಬೌಲಿಂಗ್ ಸಮಯದಲ್ಲಿ ಬ್ಯಾಟರ್‌ನ ಸ್ಥಾನದ ಆಧಾರದ ಮೇಲೆ ವೈಡ್ ನಿರ್ಣಯಿಸಲಾಗುತ್ತದೆ. ಬ್ಯಾಟರ್ ಚಲಿಸಿದರೆ ಅಂದರೆ ಚೆಂಡನ್ನು ಬಾರಿಸಲು ಅತ್ತ ಇತ್ತ ಚಲಿಸಿದ ನಂತರದ ಸ್ಥಾನವನ್ನು ವೈಡ್‌ಗಳನ್ನು ನಿರ್ಣಯಿಸಲು ಉಲ್ಲೇಖವಾಗಿ ಬಳಸಲಾಗುವುದಿಲ್ಲ ಎಂದು ಐಸಿಸಿ ಹೇಳಿದೆ.
ಪಾಪಿಂಗ್ ಕ್ರೀಸ್‌ನಲ್ಲಿ ಲೆಗ್ ಸ್ಟಂಪ್ ಮತ್ತು ವಿಸ್ತೃತ ಸಂರಕ್ಷಿತ ಪ್ರದೇಶದ ಮಾರ್ಕರ್ ನಡುವೆ ಹಾದುಹೋಗುವ ಎಸೆತಗಳನ್ನು ಇನ್ನು ಮುಂದೆ ವೈಡ್ ಎಂದು ಕರೆಯಲಾಗುವುದಿಲ್ಲ. ಆದಾಗ್ಯೂ, ಬ್ಯಾಟರ್‌ನ ಕಾಲುಗಳ ಹಿಂದೆ ಹಾದುಹೋಗುವ ಎಸೆತಗಳನ್ನು ವೈಡ್ ಎಂದು ಪರಿಗಣಿಸಬಹುದು. ಅಂಪೈರ್‌ಗಳಿಗೆ ಸಹಾಯ ಮಾಡಲು, ಸಂರಕ್ಷಿತ ಪ್ರದೇಶದ ಮಾರ್ಕರ್ ಅನ್ನು ಈಗ ಪಾಪಿಂಗ್ ಕ್ರೀಸ್‌ಗೆ ವಿಸ್ತರಿಸಲಾಗುತ್ತದೆ ಮತ್ತು ದೃಶ್ಯ ಮಾರ್ಗದರ್ಶಿಯಾಗಿ ಕಾರ್ಯನಿರ್ವಹಿಸುತ್ತದೆ. DRS ಡಿಸಿಷನ್ ರಿವ್ಯೂ ಸಿಸ್ಟಮ್ (DRS) ಈಗ ಸ್ಟಂಪ್‌ಗಳು ಮತ್ತು ಬೇಲ್‌ಗಳ ನಿಜವಾದ ಭೌತಿಕ ರೂಪರೇಖೆಯನ್ನು ಬಳಸಿಕೊಂಡು ವಿಕೆಟ್ ವಲಯವನ್ನು ವ್ಯಾಖ್ಯಾನಿಸುತ್ತದೆ, LBW ನಿರ್ಧಾರಗಳಲ್ಲಿ ನಿಖರತೆಯನ್ನು ಹೆಚ್ಚಿಸುತ್ತದೆ ಎನ್ನಲಾಗಿದೆ.
ಶಾರ್ಟ್ ರನ್ ಗೆ ಪೆನಾಲ್ಟಿ
ಉದ್ದೇಶಪೂರ್ವಕವಾಗಿ ಮಾಡಿದ ಶಾರ್ಟ್ ರನ್‌ಗೆ ಅಸ್ತಿತ್ವದಲ್ಲಿರುವ ಐದು ರನ್‌ಗಳ ಪೆನಾಲ್ಟಿಯ ಜೊತೆಗೆ, ಮುಂದಿನ ಎಸೆತಕ್ಕೆ ಯಾವ ಬ್ಯಾಟರ್ ಸ್ಟ್ರೈಕ್ ತೆಗೆದುಕೊಳ್ಳುತ್ತಾರೆ ಎಂಬುದನ್ನು ಆಯ್ಕೆ ಮಾಡಲು ಫೀಲ್ಡಿಂಗ್ ತಂಡಕ್ಕೆ ಈಗ ಅವಕಾಶ ನೀಡಲಾಗುತ್ತದೆ. ಅಂದರೆ ಬ್ಯಾಟರ್ ಗಳು ಶಾರ್ಟ್ ರನ್ ಮಾಡಿ ಸಿಕ್ಕಿಬಿದ್ದರೆ ಆಗ ಎದುರಾಳಿ ತಂಡಕ್ಕೆ 5 ರನ್ ಪೆನಾಲ್ಟಿ ನೀಡುವುದಲ್ಲದೇ ಸ್ಟ್ರೈಕ್ ನಲ್ಲಿ ಯಾವ ಬ್ಯಾಟರ್ ಇರಬೇಕು ಎಂಬುದನ್ನು ಫೀಲ್ಡಿಂಗ್ ತಂಡ ನಿರ್ಧರಿಸಲಿದೆ.
ದೇಶೀಯ ಪ್ರಥಮ ದರ್ಜೆ ಗಾಯದ ನಿಯಮ
ದೇಶೀಯ ಪ್ರಥಮ ದರ್ಜೆ ಕ್ರಿಕೆಟ್ನಲ್ಲಿ, ಪಂದ್ಯ ಪ್ರಾರಂಭವಾದ ನಂತರ (ವಾರ್ಮ್-ಅಪ್‌ಗಳ ಸಮಯದಲ್ಲಿ ಸೇರಿದಂತೆ) ಆಟಗಾರನೊಬ್ಬ ಮೈದಾನದಲ್ಲಿ ಗಂಭೀರ ಗಾಯಕ್ಕೆ ಒಳಗಾಗಿದ್ದರೆ, ಉಳಿದ ಪಂದ್ಯಕ್ಕೆ ಅವನಂತೆಯೇ (ಬ್ಯಾಟರ್, ಬೌಲರ್ ಅಥವಾ ಆಲ್ರೌಂಡರ್) ಇರುವ ಆಟಗಾರನನ್ನು ಬದಲಾಯಿಸಬಹುದು. ಹೊಸ ಟೆಸ್ಟ್ ಆಟದ ನಿಯಮಗಳು ಜೂನ್ 17 ರಂದು ಶ್ರೀಲಂಕಾ ವಿರುದ್ಧ ಬಾಂಗ್ಲಾದೇಶ ಟೆಸ್ಟ್‌ನಿಂದ ಜಾರಿಗೆ ಬಂದಿವೆ. ಪರಿಷ್ಕೃತ ಏಕದಿನ ಮತ್ತು ಟಿ20ಐ ನಲ್ಲಿ ಈ ನಿಯಮಗಳು ಜುಲೈ 2 ರಂದು ಮೊದಲ ಏಕದಿನ ಮತ್ತು ಜುಲೈ 10 ರಿಂದ ಟಿ20ಐಗಳಿಂದ ಅದೇ ಸರಣಿಯಿಂದ ಜಾರಿಗೆ ಬರಲಿವೆ. ಈ ದಿನಾಂಕಗಳನ್ನು ಮೀರಿದ ಎಲ್ಲಾ ಅಂತರರಾಷ್ಟ್ರೀಯ ಪಂದ್ಯಗಳನ್ನು ನವೀಕರಿಸಿದ ನಿಯಮಗಳ ಅಡಿಯಲ್ಲಿ ಆಡಲಾಗುತ್ತದೆ.
Advertisement
