‘ಭಾರತ ನಂಬರ್ 1 ತಂಡ, ಆದರೆ ವರ್ತನೆಗಳು ಮೂರನೇ ದರ್ಜೆಯವು’: ಪಾಕಿಸ್ತಾನದ ಮಾಜಿ ಆಟಗಾರ ಬಸಿತ್ ಅಲಿ

ಏಷ್ಯಾ ಕಪ್ 2025ರ ಫೈನಲ್‌ನಲ್ಲಿ ಭಾರತವು ಪಾಕಿಸ್ತಾನದ ವಿರುದ್ಧ ಗೆಲುವು ಕಂಡಿತು. ಈ ಮೂಲಕ 9ನೇ ಬಾರಿಗೆ ಎಲ್ಲ ಮಾದರಿಯಲ್ಲಿ ಏಷ್ಯಾ ಕಪ್ ಟ್ರೋಫಿಯನ್ನು ಮುಡಿಗೇರಿಸಿಕೊಂಡಿತು. ಪಂದ್ಯಾವಳಿ ಮುಗಿದು ಕೆಲವು ದಿನಗಳು ಕಳೆದಿದ್ದರೂ, ಸುತ್ತಲಿನ ವಿವಾದಗಳು ಮಾತ್ರ ತಣ್ಣಗಾಗುವಂತೆ ಕಾಣಿಸುತ್ತಿಲ್ಲ. ಟ್ರೋಫಿ ಪ್ರದಾನವು ಒಂದು ಗಂಟೆಗೂ ಹೆಚ್ಚು ಕಾಲ ವಿಳಂಬವಾಯಿತು.

ಭಾರತೀಯ ಆಟಗಾರರು ಎಸಿಸಿ ಅಧ್ಯಕ್ಷ ಮತ್ತು ಪಿಸಿಬಿ ಅಧ್ಯಕ್ಷ ಮೊಹ್ಸಿನ್ ನಖ್ವಿ ಅವರಿಂದ ಟ್ರೋಫಿಯನ್ನು ಸ್ವೀಕರಿಸಲು ನಿರಾಕರಿಸಿದರು. ನಂತರ ನಖ್ವಿ ತಮ್ಮ ಪರಿವಾರದೊಂದಿಗೆ ಟ್ರೋಫಿ ಮತ್ತು ಅಧಿಕೃತ ಪದಕಗಳನ್ನು ತೆಗೆದುಕೊಂಡು ಹೊರಟುಹೋದರು. ಆದಾಗ್ಯೂ, ಭಾರತವು ಸಂಭ್ರಮಾಚರಣೆಯನ್ನು ನಿಲ್ಲಿಸಲಿಲ್ಲ. ಕಾಲ್ಪನಿಕ ಟ್ರೋಫಿಯೊಂದಿಗೆ ತಂಡವು ಪೋಸ್ ನೀಡಿತು.

ಪಾಕಿಸ್ತಾನದ ಅಂತಾರಾಷ್ಟ್ರೀಯ ಮಾಜಿ ಆಟಗಾರ ಬಸಿತ್ ಅಲಿ ಈಗ ನಖ್ವಿ ಪರವಾಗಿ ನಿಂತಿದ್ದು, ಭಾರತ ಟ್ರೋಫಿಯನ್ನು ಪಡೆಯಲು ನಿರಾಕರಿಸಿದ್ದು, ಅವರ ಘನತೆಗೆ ತಕ್ಕುದಲ್ಲ ಎಂದು ವಾದಿಸಿದ್ದಾರೆ. 'ಅವರು ನಂಬರ್ 1 ಶ್ರೇಯಾಂಕಿತ ತಂಡ, ಆದರೆ ಅವರ ಕಾರ್ಯಗಳು ಮೂರನೇ ದರ್ಜೆಯವು. ಮೊಹ್ಸಿನ್ ನಖ್ವಿ ಟ್ರೋಫಿಯನ್ನು ಪ್ರದಾನ ಮಾಡುತ್ತಾರೆ. ಆದರೆ, ಟ್ರೋಫಿಯನ್ನು ಸ್ವೀಕರಿಸಲು ನಿರಾಕರಿಸಿದರೆ, ಅವರು ವಿಶ್ವದ ದೃಷ್ಟಿಯಲ್ಲಿ ಕೆಟ್ಟದಾಗಿ ಕಾಣುತ್ತಾರೆ. ಹೀಗಾಗಿ, ಟ್ರೋಫಿಯನ್ನು ಹಸ್ತಾಂತರಿಸಬಾರದು' ಎಂದು ಪಾಕಿಸ್ತಾನದ ARY ನ್ಯೂಸ್ ಚಾನೆಲ್‌ನಲ್ಲಿ ಹೇಳಿದರು.

ಭಾರತದ ನಿಲುವು ಜಾಗತಿಕ ಕ್ರಿಕೆಟ್‌ಗೆ ಕೆಟ್ಟ ಪೂರ್ವನಿದರ್ಶನವನ್ನು ನೀಡಿದೆ. 'ನೀವು ನಂ.1 ತಂಡ, ನೀವು ಚೆನ್ನಾಗಿ ಆಡಿ ಗೆದ್ದಿದ್ದೀರಿ, ಆದರೆ ಈ ಹಠಮಾರಿತನವೇನು? ಮೊಹ್ಸಿನ್ ನಖ್ವಿ ಏಷ್ಯನ್ ಕ್ರಿಕೆಟ್ ಕೌನ್ಸಿಲ್‌ನ ಮುಖ್ಯಸ್ಥರು. ಇದು ಐಸಿಸಿ ಕಾರ್ಯಕ್ರಮವಾಗಿದ್ದರೆ ಮತ್ತು ಪಾಕಿಸ್ತಾನವು ಜಯ್ ಶಾ ಅವರಿಂದ ಟ್ರೋಫಿಯನ್ನು ಸ್ವೀಕರಿಸಲು ನಿರಾಕರಿಸಿದ್ದರೆ, ಪಾಕಿಸ್ತಾನ ಮಾಡಿದ್ದು ಆಗ ತಪ್ಪಾಗಿರುತ್ತಿತ್ತು' ಎಂದು ಅಲಿ ಟೀಕಿಸಿದರು.