IPL 2026: KKR ವಿರುದ್ಧ LSGಗೆ ಹೀನಾಯ ಸೋಲು; ರಿಷಭ್ ಪಂತ್ ಬದಲಿಗೆ ಐಡೆನ್ ಮಾರ್ಕ್ರಮ್‌ರನ್ನು ನಾಯಕನನ್ನಾಗಿ ಮಾಡಿ!

ಭಾನುವಾರ ನಡೆದ ಐಪಿಎಲ್ 2026ನೇ ಪಂದ್ಯದಲ್ಲಿ ಕೋಲ್ಕತ್ತಾ ನೈಟ್ ರೈಡರ್ಸ್ (KKR) ವಿರುದ್ಧ ಲಕ್ನೋ ಸೂಪರ್ ಜೈಂಟ್ಸ್ (LSG) ತಂಡವು ಸೋಲು ಕಂಡಿದ್ದು ದುರದೃಷ್ಟಕರವಲ್ಲ. ಬದಲಿಗೆ ಅದು ಸ್ವಯಂ ಪ್ರೇರಿತ ಅಪರಾಧವಾಗಿತ್ತು. 155 ರನ್ ಚೇಸ್ ಮಾಡುವಲ್ಲಿ ವಿಫಲವಾದ ತಂಡವು, ಸೂಪರ್ ಓವರ್‌ನಲ್ಲಿ ಕೇವಲ 1 ರನ್ ಡಿಫೆಂಡ್ ಮಾಡಿಕೊಳ್ಳುವಲ್ಲಿಯೂ ಎಡವಿ, ಕೋಲ್ಕತ್ತಾ ನೈಟ್ ರೈಡರ್ಸ್ ತಂಡದ ಗೆಲುವಿಗೆ ಕೊಡುಗೆ ನೀಡಿತು ಎಂದರೆ ತಪ್ಪಾಗಲಾರದು. ರಿಷಭ್ ಪಂತ್ ನೇತೃತ್ವದ LSG ತಂಡವು ಇಲ್ಲಿಯವರೆಗೆ ಕಂಡ ಅತ್ಯಂತ ನಿರಾಶಾದಾಯಕ ಸೋಲು ಇದಾಗಿದೆ.

ಡಗೌಟ್‌ನಲ್ಲಿ ಯಾವಾಗಲೂ ಗೊಂದಲಕ್ಕೊಳಗಾಗಿ ಕಾಣುವ ತಂಡ ಇದು. ಯೋಜನೆಗಳು ಚೆಂಡಿನಿಂದ ಚೆಂಡಿಗೆ ಬದಲಾಗುತ್ತವೆ. ಪಾತ್ರಗಳು ಪಂದ್ಯದಿಂದ ಪಂದ್ಯಕ್ಕೆ ಬದಲಾಗುತ್ತವೆ. ಮತ್ತು ಒತ್ತಡ ಬಂದಾಗ, ಕೆಟ್ಟ ನಿರ್ಧಾರಗಳನ್ನು ತೆಗೆದುಕೊಳ್ಳಲಾಗುತ್ತದೆ. ಐಪಿಎಲ್ 2026 ಪಾಯಿಂಟ್‌ ಪಟ್ಟಿಯಲ್ಲಿ ಕೊನೆಯ ಸ್ಥಾನದಲ್ಲಿ ಕುಳಿತಿರುವ ಎಲ್‌ಎಸ್‌ಜಿ, ಆಡಿರುವ ಎಂಟು ಪಂದ್ಯಗಳಲ್ಲಿ ಆರರಲ್ಲಿ ಸೋಲು ಕಂಡಿದೆ.

ಸ್ವಾಭಾವಿಕವಾಗಿಯೇ, ತಂಡದ ನಾಯಕ ಟೀಕೆಗಳನ್ನು ಎದುರಿಸಬೇಕಾಗುತ್ತದೆ ಮತ್ತು ಇದೀಗ ರಿಷಭ್ ಪಂತ್ ವಿರುದ್ಧ ಅದು ನಡೆಯುತ್ತಿದೆ. ಐಪಿಎಲ್ ಮಾಜಿ ಕೋಚ್ ವಾಸಿಮ್ ಜಾಫರ್ ಬಹಿರಂಗವಾಗಿಯೇ ನಾಯಕತ್ವ ಬದಲಾವಣೆಗೆ ಸೂಚಿಸಿದ್ದಾರೆ. ದಕ್ಷಿಣ ಆಫ್ರಿಕಾದ ಐಡೆನ್ ಮಾರ್ಕ್ರಮ್ ಅವರನ್ನು ನಾಯಕನನ್ನಾಗಿ ಮಾಡಿ ಪಂತ್ ಅವರನ್ನು ನಾಯಕತ್ವದ ಹೊರೆಯಿಂದ ಮುಕ್ತರಾಗಿಸುವಂತೆ ಹೇಳಿದ್ದಾರೆ.

'LSG ಈಗ ಸಂಪೂರ್ಣವಾಗಿ ಹಳಿ ತಪ್ಪಿದಂತೆ ಕಾಣುತ್ತಿದೆ. ಅವರಿಂದ ಏನನ್ನು ನಿರೀಕ್ಷಿಸಬೇಕೆಂದು ತಿಳಿಯುವುದು ಕಷ್ಟ. ನಾನು ಆ ಡಗೌಟ್‌ನಲ್ಲಿದ್ದರೆ, ನಾನು ಮಾಡುವ ಮೊದಲ ಕೆಲಸವೆಂದರೆ ಐಡೆನ್ ಮಾರ್ಕ್ರಮ್ ಅವರನ್ನು ನಾಯಕನನ್ನಾಗಿ ಮಾಡುವುದು. ನಾನು ಮಾರ್ಕ್ರಮ್ ಮತ್ತು ಮಿಚೆಲ್ ಮಾರ್ಷ್ ಅವರೊಂದಿಗೆ ಆರಂಭಿಕರಾಗಿ ಆಡುತ್ತಿದ್ದೆ. ಮೂರನೇ ಸ್ಥಾನದಲ್ಲಿ ನಿಕೋಲಸ್ ಪೂರನ್, ನಂತರ ನಾಲ್ಕನೇ ಸ್ಥಾನದಲ್ಲಿ ರಿಷಭ್ ಪಂತ್ ಮತ್ತು ಐದನೇ ಸ್ಥಾನದಲ್ಲಿ ಆಯುಷ್ ಬದೋನಿ. ಆರನೇ ಸ್ಥಾನದಲ್ಲಿ ಅಬ್ದುಲ್ ಸಮದ್ ಮತ್ತು ಏಳನೇ ಸ್ಥಾನದಲ್ಲಿ ಮುಕುಲ್ ಚೌಧರಿಯನ್ನು ಆಡಿಸುತ್ತಿದ್ದೆ. ಅದು ನನ್ನ ಟಾಪ್ ಸೆವೆನ್ ಆಗಿರುತ್ತದೆ ಮತ್ತು ನಾನು ಈ ಬ್ಯಾಟಿಂಗ್ ಕ್ರಮಾಂಕವನ್ನು ಅನುಸರಿಸುತ್ತೇನೆ' ಎಂದು ಮಾಜಿ ಐಪಿಎಲ್ ತರಬೇತುದಾರ ಮತ್ತು ನಿರೂಪಕ ಜಾಫರ್ ತಮ್ಮ ಯೂಟ್ಯೂಬ್ ಚಾನೆಲ್‌ನಲ್ಲಿ ಹೇಳಿದ್ದಾರೆ.

'ರಿಷಭ್ ಪಂತ್ ನಂತಹ ಆಟಗಾರ ಸಂಪೂರ್ಣವಾಗಿ ಆಟಗಾರನಾಗಿಯೇ ಆಡಬೇಕು ಎಂದು ನಾನು ಭಾವಿಸುತ್ತೇನೆ. ನೀವು ಅವರಿಗೆ ಯಾವುದೇ ಹೊರೆ ನೀಡದೆ, ಸ್ವಂತವಾಗಿ ಪಂದ್ಯಗಳನ್ನು ಗೆಲ್ಲಲು ಹೇಳಿದಾಗ ನೀವು ಅವರಿಂದ ಉತ್ತಮ ಫಲಿತಾಂಶ ಪಡೆಯುತ್ತೀರಿ. ನಾಯಕತ್ವದ ಹೊರೆಯನ್ನು ಅವರ ಮೇಲೆ ಹೇರಬೇಡಿ. ಐಡೆನ್ ಮಾರ್ಕ್ರಮ್ ಉತ್ತಮ ನಾಯಕ ಎಂದು ನಾನು ಭಾವಿಸುತ್ತೇನೆ. ಅವರು ದಕ್ಷಿಣ ಆಫ್ರಿಕಾವನ್ನು ಬಹಳ ಯಶಸ್ವಿಯಾಗಿ ಮುನ್ನಡೆಸಿದ್ದಾರೆ. ಅವರು ಮಾನಸಿಕವಾಗಿ ಬಲಶಾಲಿ, ತುಂಬಾ ಸಂಯೋಜಿತರಾಗಿದ್ದಾರೆ ಮತ್ತು ಅವರು ಇತರ ಆಟಗಾರರಿಂದ ಅತ್ಯುತ್ತಮವಾದದ್ದನ್ನು ಪಡೆಯಬಹುದು ಎಂದು ನಾನು ಭಾವಿಸುತ್ತೇನೆ. ಆದರೆ, ಇದು ನಿಜವಾಗಿಯೂ ಸಂಭವಿಸುವ ಸಂಗತಿಯಂತೆ ಕಾಣುತ್ತಿಲ್ಲ. ಇದು ನನ್ನ ಸಲಹೆ ಮಾತ್ರ, ಆದರೆ ನಾನು ಅಲ್ಲಿದ್ದರೆ, ಅದನ್ನೇ ಮಾಡುತ್ತಿದ್ದೆ' ಎಂದು ಜಾಫರ್ ಹೇಳಿದರು.

ರಿಷಭ್ ಪಂತ್ ಅವರ ಐಪಿಎಲ್ ನಾಯಕತ್ವ

ರಿಷಭ್ ಪಂತ್ ಈವರೆಗೆ ಒಟ್ಟು 65 ಐಪಿಎಲ್ ಪಂದ್ಯಗಳಿಗೆ ನಾಯಕರಾಗಿದ್ದು, ಆ ಪೈಕಿ 31ರಲ್ಲಿ ಅವರು ಪ್ರತಿನಿಧಿಸಿದ್ದ ತಂಡ ಗೆಲುವು ಸಾಧಿಸಿದೆ ಮತ್ತು 32ರಲ್ಲಿ ಸೋಲು ಕಂಡಿದೆ. ಎರಡು ಪಂದ್ಯಗಳು ಟೈ ಆಗಿವೆ. ಮತ್ತೊಂದೆಡೆ ಎಲ್‌ಎಸ್‌ಜಿಗೆ ನಾಯಕರಾಗಿರುವಾಗ ಆಡಿರುವ 22 ಪಂದ್ಯಗಳಲ್ಲಿ ಕೇವಲ 8 ಪಂದ್ಯಗಳಲ್ಲಿ ಗೆಲುವು ಸಾಧಿಸಿ, 13ರಲ್ಲಿ ಸೋಲು ಕಂಡಿದ್ದಾರೆ. ಒಂದು ಪಂದ್ಯ ಮಾತ್ರ ಟೈ ಆಗಿದೆ.