'ಕ್ಷಮಿಸಿ ಭಾಯ್, ಇವತ್ತಲ್ಲ': ಪಂಜಾಬ್ ಕಿಂಗ್ಸ್ ವಿರುದ್ಧ ಗೆಲುವಿನ ಬಳಿಕ ನಟ ಸಲ್ಮಾನ್ ಖಾನ್ ಬಳಿ ಕ್ಷಮೆಯಾಚಿಸಿದ ರಾಜಸ್ಥಾನ ರಾಯಲ್ಸ್!

ಮಂಗಳವಾರ ಮುಲ್ಲನ್‌ಪುರದಲ್ಲಿ ನಡೆದ ಪಂದ್ಯದಲ್ಲಿ 223 ರನ್‌ಗಳ ಗುರಿಯನ್ನು ಬೆನ್ನಟ್ಟಿದ ರಾಜಸ್ಥಾನ ರಾಯಲ್ಸ್ (RR) ತಂಡ, ಪಂಜಾಬ್ ಕಿಂಗ್ಸ್ (PBKS) ತಂಡಕ್ಕೆ ಐಪಿಎಲ್ 2026ನೇ ಆವೃತ್ತಿಯಲ್ಲಿ ಮೊದಲ ಸೋಲಿನ ರುಚಿ ತೋರಿಸಿತು. ದಕ್ಷಿಣ ಆಫ್ರಿಕಾದ ಡೊನೊವನ್ ಫೆರೇರಾ ಕೇವಲ 26 ಎಸೆತಗಳಲ್ಲಿ ಅಜೇಯ 52 ರನ್ ಗಳಿಸುವ ಮೂಲಕ ನಾಲ್ಕು ಎಸೆತಗಳು ಬಾಕಿ ಇರುವಾಗಲೇ ತಂಡಕ್ಕೆ ಜಯ ತಂದುಕೊಟ್ಟರು. ಶಿಮ್ರಾನ್ ಹೆಟ್ಮೈಯರ್ ಅನುಪಸ್ಥಿತಿಯಲ್ಲಿ ತಂಡವನ್ನು ಬಲಪಡಿಸಿದ ಫೆರೇರಾ, ಪಿಬಿಕೆಎಸ್ ವೇಗಿಗಳಾದ ಅರ್ಶದೀಪ್ ಸಿಂಗ್ ಮತ್ತು ಲಾಕಿ ಫರ್ಗುಸನ್ ಅವರನ್ನು ಡೆತ್ ಓವರ್‌ಗಳಲ್ಲಿ ತರಾಟೆಗೆ ತೆಗೆದುಕೊಂಡರು.

ಪಂದ್ಯದ ನಂತರ, ಪಿಬಿಕೆಎಸ್ ವಿರುದ್ಧದ ಪಂದ್ಯ ಗೆಲ್ಲಲು ನೆರವಾದ ಫೆರೇರಾ ಬಾಲಿವುಡ್ ನಟ ಸಲ್ಮಾನ್ ಖಾನ್ ಅವರಿಗೆ 'ಕ್ಷಮೆ ಯಾಚಿಸುವ' ವಿಡಿಯೋವನ್ನು ರಾಜಸ್ಥಾನ್ ರಾಯಲ್ಸ್ ಪೋಸ್ಟ್ ಮಾಡಿದೆ.

ಪ್ರೀತಿ ಜಿಂಟಾ ಸಹ-ಮಾಲೀಕತ್ವ ಹೊಂದಿರುವ ಪಂಜಾಬ್ ಕಿಂಗ್ಸ್ ಬಗ್ಗೆ ಸಲ್ಮಾನ್ ಖಾನ್ ಅವರ 12 ವರ್ಷಗಳ ಹಿಂದಿನ ಪೋಸ್ಟ್‌ಗೆ ಪ್ರತಿಕ್ರಿಯಿಸುತ್ತಾ, ಫೆರೇರಾ, 'ಕ್ಷಮಿಸಿ ಭಾಯ್, ಆಜ್ ನಹಿ (ಕ್ಷಮಿಸಿ ಸಹೋದರ, ಅದು ಇವತ್ತಲ್ಲ!)' ಎಂದು ಹೇಳುವುದನ್ನು ಕಾಣಬಹುದು.

ಪಂಜಾಬ್ ತಂಡದ ಕ್ವಾಲಿಫೈಯರ್ 1 ಘರ್ಷಣೆಯ ಸಮಯದಲ್ಲಿ ಹಂಚಿಕೊಂಡ 2014ರ ಮೂಲ ಪೋಸ್ಟ್‌ನಲ್ಲಿ, 'ಜಿಂಟಾ ತಂಡ ಗೆದ್ದಿದೆಯೇ?' ಎಂದು ಸಲ್ಮಾನ್ ಕೇಳಿದ್ದರು. ಪಂಜಾಬ್ ಕಿಂಗ್ಸ್ ತಂಡವು ಆ ಪಂದ್ಯವನ್ನು ಕೋಲ್ಕತ್ತಾ ನೈಟ್ ರೈಡರ್ಸ್ (ಕೆಕೆಆರ್) ವಿರುದ್ಧ ಸೋತರೂ, ಪಿಬಿಕೆಎಸ್ ಆಡುವಾಗಲೆಲ್ಲ ಸಲ್ಮಾನ್ ಅವರ ಹಳೆಯ ಟ್ವೀಟ್ ಮತ್ತೆ ಕಾಣಿಸಿಕೊಳ್ಳುತ್ತದೆ.

ಪಂಜಾಬ್ ಕಿಂಗ್ಸ್ ನೀಡಿದ್ದ 223 ರನ್‌ಗಳ ಗುರಿಯನ್ನು ಬೆನ್ನಟ್ಟಿದ RR ತಂಡಕ್ಕೆ ಕೊನೆಯ ಆರು ಓವರ್‌ಗಳಲ್ಲಿ 71 ರನ್‌ಗಳು ಬೇಕಾಗಿದ್ದವು. ಫೆರೇರಾ 26 ಎಸೆತಗಳಲ್ಲಿ ಅಜೇಯ 52 ರನ್ ಗಳಿಸಿದರೆ, ಶುಭಂ ದುಬೆ (12 ಎಸೆತಗಳಲ್ಲಿ ಔಟಾಗದೆ 31) ಅವರ ಭರ್ಜರಿ ಬ್ಯಾಟಿಂಗ್‌ನೊಂದಿಗೆ ನಾಲ್ಕು ಎಸೆತಗಳು ಬಾಕಿ ಇರುವಾಗಲೇ ತಂಡ ಜಯ ಸಾಧಿಸಿತು.

ಫೆರೇರಾ ಮತ್ತು ದುಬೆ, ಒಂಬತ್ತು ಬೌಂಡರಿಗಳು ಮತ್ತು ಐದು ಸಿಕ್ಸರ್‌ಗಳನ್ನು ಬಾರಿಸಿದರು. ಯುಜ್ವೇಂದ್ರ ಚಾಹಲ್ (4 ಓವರ್‌ಗಳಲ್ಲಿ 3/36) ಅವರ ಉತ್ತಮ ಬೌಲಿಂಗ್ ದಾಳಿಯು ಪ್ರಯೋಜನಕ್ಕೆ ಬಾರಲಿಲ್ಲ. ಆರ್‌ಆರ್ ಪರ ವೈಭವ್ ಸೂರ್ಯವಂಶಿ (16 ಎಸೆತಗಳಲ್ಲಿ 43) ಆರು ಸಿಕ್ಸರ್‌ ಸಿಡಿಸಿ ತಂಡಕ್ಕೆ ಆರಂಭಿಕ ಅಡಿಪಾಯ ಹಾಕಿದರು.

ಈ ಆವೃತ್ತಿಯಲ್ಲಿ ಮೊದಲ ಬಾರಿ ಸೋಲು ಕಂಡಿರುವ ಪಿಬಿಕೆಎಸ್‌ ಆಡಿರುವ 8 ಪಂದ್ಯಗಳಲ್ಲಿ ಆರರಲ್ಲಿ ಜಯ ಸಾಧಿಸಿದೆ ಮತ್ತು ಒಂದು ಫಲಿತಾಂಶ ಲಭ್ಯವಾಗಿಲ್ಲ. ಈ ಹಿನ್ನೆಲೆಯಲ್ಲಿ 13 ಅಂಕಗಳೊಂದಿಗೆ ಐಪಿಎಲ್ ಅಂಕಪಟ್ಟಿಯಲ್ಲಿ ಮೊದಲನೇ ಸ್ಥಾನದಲ್ಲಿದೆ.