ಫೆಬ್ರುವರಿ 15 ರಂದು ಕೊಲಂಬೊದಲ್ಲಿ ಎರಡೂ ತಂಡಗಳು ಮುಖಾಮುಖಿಯಾಗುವಾಗ ಭಾರತ ವಿರುದ್ಧ ವಿಭಿನ್ನ ಮನಸ್ಥಿತಿಯೊಂದಿಗೆ ಆಡುವುದಾಗಿ ಪಾಕಿಸ್ತಾನ ಕ್ರಿಕೆಟ್ ತಂಡದ ತಾರೆ ಸಾಹಿಬ್ಜಾದಾ ಫರ್ಹಾನ್ ಹೇಳಿದ್ದಾರೆ. ಸೋಮವಾರ ಪಾಕಿಸ್ತಾನ ಸರ್ಕಾರ ತನ್ನ ಆಟಗಾರರಿಗೆ ಭಾರತದ ವಿರುದ್ಧದ ಪಂದ್ಯದಲ್ಲಿ ಮೈದಾನಕ್ಕಿಳಿಯುವಂತೆ ನಿರ್ದೇಶಿಸಿದ ನಂತರ, ಸಾಂಪ್ರದಾಯಿಕ ಎದುರಾಳಿಗಳ ನಡುವಿನ ಬಹುನಿರೀಕ್ಷಿತ ಪಂದ್ಯವು ನಿಗದಿತ ದಿನಾಂಕದಂದೇ ನಡೆಯಲಿದೆ. ಫರ್ಹಾನ್, ತಂಡದ ಸಹ ಆಟಗಾರ ಉಸ್ಮಾನ್ ತಾರಿಕ್ ಜೊತೆಗೆ ಭಾರತಕ್ಕೆ ಉತ್ತಮ ಪೈಪೋಟಿ ನೀಡುವ ವಿಶ್ವಾಸ ಹೊಂದಿದ್ದು, IND vs PAK ಪಂದ್ಯಕ್ಕೆ ಮುನ್ನ ಸೂರ್ಯಕುಮಾರ್ ಯಾದವ್ ಮತ್ತು ತಂಡಕ್ಕೆ ಎಚ್ಚರಿಕೆ ನೀಡಿದ್ದಾರೆ.
ಅಮೆರಿಕ ವಿರುದ್ಧ ಪಾಕಿಸ್ತಾನದ ಗೆಲುವಿನ ನಂತರ ಸುದ್ದಿಗಾರರೊಂದಿಗೆ ಮಾತನಾಡಿದ ಫರ್ಹಾನ್, ಭಾರತದ ವಿರುದ್ಧದ ಮುಂಬರುವ ಪಂದ್ಯವು ದೊಡ್ಡ ವಿಷಯವಲ್ಲ. ಪಾಕಿಸ್ತಾನ ಈಗಾಗಲೇ ಎರಡು ಪಂದ್ಯಗಳನ್ನು ಗೆದ್ದು ಗ್ರೂಪ್ ಎ ನಲ್ಲಿ ಅಗ್ರಸ್ಥಾನದಲ್ಲಿರುವುದರಿಂದ ಸಾಕಷ್ಟು ಆತ್ಮವಿಶ್ವಾಸದಿಂದಿದೆ. 73 ರನ್ಗಳ ಇನಿಂಗ್ಸ್ಗಾಗಿ ಪಂದ್ಯಶ್ರೇಷ್ಠ ಪ್ರಶಸ್ತಿಗೆ ಭಾಜನರಾದ ಆರಂಭಿಕ ಆಟಗಾರ, ಈ ಹಿಂದೆಯೂ ಪಾಕ್ ಭಾರತವನ್ನು ಎದುರಿಸಿದೆ ಮತ್ತು ಮುಂಬರುವ ಟಿ20 ವಿಶ್ವಕಪ್ 2026ರ ಪಂದ್ಯವನ್ನು ವಿಭಿನ್ನ ಮನಸ್ಥಿತಿಯೊಂದಿಗೆ ಎದುರಿಸಲಿದೆ ಎಂದು ಹೇಳಿದರು.
'ನೋಡಿ, ನೀವು ಎರಡು ಪಂದ್ಯಗಳನ್ನು ಗೆದ್ದು ಅಂಕಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿರುವಾಗ, ನಿಮಗೆ ಆತ್ಮವಿಶ್ವಾಸ ಬರುತ್ತದೆ. ಮುಂಬರುವ ಪಂದ್ಯ ಅಷ್ಟು ದೊಡ್ಡ ವಿಷಯವಲ್ಲ, ನಾವು ಅವರ ವಿರುದ್ಧ ಮೊದಲ ಬಾರಿಗೆ ಆಡುತ್ತಿಲ್ಲ. ನಾವು ಈ ಮೊದಲು ಆಡಿದ್ದೇವೆ ಮತ್ತು ಈ ಬಾರಿ ನಾವು ವಿಭಿನ್ನ ಮನಸ್ಥಿತಿಯೊಂದಿಗೆ ಆಡುತ್ತೇವೆ. ನೀವು ನಮ್ಮನ್ನು ಶೇಕ್-ಅಪ್ನಲ್ಲಿ ನೋಡಿದ್ದೀರಿ. ಮಧ್ಯದಲ್ಲಿ ನಮ್ಮ ಹೋರಾಟವನ್ನು ನೀವು ನೋಡಿರಬೇಕು. ಶದಾಬ್ ರನ್ ಗಳಿಸುತ್ತಿದ್ದಾರೆ, ನವಾಜ್ ರನ್ ಗಳಿಸುತ್ತಿದ್ದಾರೆ ಎಂದು ನೀವು ನೋಡಿರಬೇಕು. ಆದ್ದರಿಂದ ನೀವು ಅವರ ವಿರುದ್ಧ ನಮ್ಮ ಆಟವನ್ನು ಆನಂದಿಸುತ್ತೀರಿ ಎಂದು ಭಾವಿಸುತ್ತೇವೆ' ಎಂದು ಫರ್ಹಾನ್ ಹೇಳಿದರು.
ಭಾರತದ ಮೇಲೆ ಹೆಚ್ಚಿನ ಒತ್ತಡ
ಪಾಕಿಸ್ತಾನದ ಸ್ಪಿನ್ನರ್ ಉಸ್ಮಾನ್ ತಾರಿಕ್, ಭಾರತೀಯ ಬ್ಯಾಟ್ಸ್ಮನ್ಗಳ ಮೇಲೆ ನನ್ನನ್ನು ಎದುರಿಸುವಾಗ ಹೆಚ್ಚುವರಿ ಒತ್ತಡವಿರುತ್ತದೆ. ಯುಎಸ್ಎ ವಿರುದ್ಧದ ತಮ್ಮ 4 ಓವರ್ಗಳ ಅವಧಿಯಲ್ಲಿ 3 ವಿಕೆಟ್ಗಳನ್ನು ಕಬಳಿಸಿ 27 ರನ್ಗಳನ್ನು ಬಿಟ್ಟುಕೊಟ್ಟರು. ತಮ್ಮ ಶೈಲಿಯ ಬಗ್ಗೆ ಭಾರತೀಯ ಅಭಿಮಾನಿಗಳಲ್ಲಿ ಕೇಳಿಬರುತ್ತಿದ್ದ ಗದ್ದಲದ ಕುರಿತಾದ ಪ್ರಶ್ನೆಗೆ ಉಸ್ಮಾನ್ ಪ್ರತಿಕ್ರಿಯಿಸಿ, ಹೊರಗಿನ ಶಬ್ದದ ಮೇಲೆ ಅಲ್ಲ, ಆಟದ ಮೇಲೆ ಮಾತ್ರ ಗಮನಹರಿಸಿದ್ದೇನೆ' ಎಂದು ಹೇಳಿದ್ದಾರೆ.
'ಅವರ ಮೇಲೆ ಹೆಚ್ಚುವರಿ ಒತ್ತಡ ಇರುತ್ತದೆ ಎಂದು ನಾನು ಭಾವಿಸುತ್ತೇನೆ. ಏಕೆಂದರೆ, ಅವರು ಈ ವಿಷಯಗಳನ್ನು ಚರ್ಚಿಸುತ್ತಿದ್ದಾರೆ. ಅದರರ್ಥ, ಅದು ಬಹುಶಃ ಅವರ ಮೇಲೆ ಹೆಚ್ಚುವರಿ ಒತ್ತಡ ಇರುತ್ತದೆ ಎಂದು ತೋರಿಸುತ್ತದೆ. ಆದರೆ, ನನಗೆ ಅದರ ಬಗ್ಗೆ ತಿಳಿದಿಲ್ಲ. ನಾನು ನಿಜವಾಗಿಯೂ ನನ್ನ ಆಟದ ಮೇಲೆ ಗಮನ ಕೇಂದ್ರೀಕರಿಸುತ್ತಿದ್ದೇನೆ. ಮಾಧ್ಯಮ ಮತ್ತು ವಿಷಯಗಳಲ್ಲಿ ಏನು ನಡೆಯುತ್ತಿದೆ ಎಂದು ನನಗೆ ತಿಳಿದಿಲ್ಲ. ನಾನು ನನ್ನ ಕ್ರಿಕೆಟ್ ಮತ್ತು ಅಭ್ಯಾಸದ ಮೇಲೆ ಗಮನ ಕೇಂದ್ರೀಕರಿಸುತ್ತಿದ್ದು, ಇದು ಸರಳ ವಿಷಯ' ಎಂದು ಉಸ್ಮಾನ್ ಹೇಳಿದರು.
Advertisement
