T20 World Cup 2026: ಗೌತಮ್ ಗಂಭೀರ್, ಸೂರ್ಯಕುಮಾರ್ ಯಾದವ್ ವಿರುದ್ಧ ಕಿಡಿ; ವರುಣ್ ಚಕ್ರವರ್ತಿ ಪರ ಆಕಾಶ್ ಚೋಪ್ರಾ ಬ್ಯಾಟಿಂಗ್!

ಟಿ20 ವಿಶ್ವಕಪ್‌ನಲ್ಲಿ ವರುಣ್ ಚಕ್ರವರ್ತಿಗೆ ಪೂರ್ಣ ಓವರ್‌ಗಳನ್ನು ನೀಡದಿರುವ ತಂಡದ ಆಡಳಿತ ಮಂಡಳಿಯ ನಿರ್ಧಾರಕ್ಕೆ ಭಾರತದ ಮಾಜಿ ಕ್ರಿಕೆಟಿಗ ಆಕಾಶ್ ಚೋಪ್ರಾ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ನಾಯಕ ಸೂರ್ಯಕುಮಾರ್ ಯಾದವ್ ಅವರು ಮಿಸ್ಟರಿ ಸ್ಪಿನ್ನರ್ ವರುಣ್ ಚಕ್ರವರ್ತಿಗೆ ಗುಂಪು ಹಂತದಲ್ಲಿ ಒಮ್ಮೆ ಮಾತ್ರ ಸಂಪೂರ್ಣ ನಾಲ್ಕು ಓವರ್‌ಗಳನ್ನು ಬೌಲಿಂಗ್ ಮಾಡಲು ಅವಕಾಶ ನೀಡಿದ ನಿರ್ಧಾರವನ್ನು ಚೋಪ್ರಾ ಪ್ರಶ್ನಿಸಿದರು. ನೆದರ್ಲೆಂಡ್ ವಿರುದ್ಧದ ಭಾರತದ ಪಂದ್ಯದ ಸಮಯದಲ್ಲಿ, ವರುಣ್ 3 ಓವರ್‌ಗಳಲ್ಲಿ 3/14 ರನ್ ಗಳಿಸುವ ಮೂಲಕ ತಂಡವು 17 ರನ್‌ಗಳಿಂದ ಗೆಲ್ಲಲು ನೆರವಾದರು. ಯೂಟ್ಯೂಬ್‌ನಲ್ಲಿನ ವಿಡಿಯೋದಲ್ಲಿ ಮಾತನಾಡಿರುವ ಚೋಪ್ರಾ, ಸ್ಪಿನ್ನರ್‌ಗೆ ಪೂರ್ಣ ಓವರ್‌ಗಳನ್ನು ನೀಡಿದ್ದರೆ ಕನಿಷ್ಠ ಒಂದು ಐದು ವಿಕೆಟ್‌ ಗೊಂಚಲು ಪಡೆಯುತ್ತಿದ್ದರು ಎಂದರು.

'ನೀವು ವರುಣ್ ಚಕ್ರವರ್ತಿ ಅವರನ್ನು ತಮ್ಮ ಓವರ್‌ಗಳನ್ನು ಪೂರ್ಣಗೊಳಿಸಲು ಏಕೆ ಅವಕಾಶ ನೀಡುತ್ತಿಲ್ಲ? ನೀವು ಅವರಿಗೆ ಅವರ ಎಲ್ಲ ಓವರ್‌ಗಳನ್ನು ಬೌಲ್ ಮಾಡಲು ಬಿಡುತ್ತಿಲ್ಲ. ಪಂದ್ಯಾವಳಿಯಲ್ಲಿ ಯುಎಸ್ಎ ವಿರುದ್ಧ ಒಮ್ಮೆ ಮಾತ್ರ ಅವರಿಗೆ ನಾಲ್ಕು ಓವರ್‌ ಬೌಲಿಂಗ್ ಮಾಡಲು ಅವಕಾಶ ಸಿಕ್ಕಿದೆ. ಏಕೆಂದರೆ ನೀವು ಕೇವಲ ಐದು ಬೌಲರ್‌ಗಳನ್ನು ಮಾತ್ರ ಬಳಸಿದ್ದೀರಿ. ನೀವು ಯಾವುದೇ ಬ್ಯಾಟ್ಸ್‌ಮನ್‌ನೊಂದಿಗೆ ಹಾಗೆ ಮಾಡುತ್ತೀರಾ? ಅವರು ಚೆನ್ನಾಗಿ ಆಡುತ್ತಿದ್ದರೆ ಮತ್ತು 50-60 ರನ್‌ಗಳನ್ನು ಗಳಿಸಿದ್ದರೆ ಅವರನ್ನು ಹೊರಗೆ ಬರಲು ನೀವು ಕೇಳುತ್ತೀರಾ?' ಎಂದು ನಾಯಕ ಸೂರ್ಯಕುಮಾರ್ ಯಾದವ್ ಅವರನ್ನು ಪ್ರಶ್ನಿಸಿದ್ದಾರೆ.

'ನೀವು ಹಾಗೆ ಮಾಡುವುದಿಲ್ಲ. ಅವರು 60 ಎಸೆತಗಳನ್ನು ಸಹ ಆಡಬಹುದು. ಒಬ್ಬ ಬೌಲರ್ 24 ಎಸೆತಗಳಿಗಿಂತ ಹೆಚ್ಚು ಬೌಲಿಂಗ್ ಮಾಡಲು ಸಾಧ್ಯವಿಲ್ಲ ಮತ್ತು ನೀವು ಅವರಿಗೆ ಆ 24 ಎಸೆತಗಳನ್ನು ಬೌಲಿಂಗ್ ಮಾಡಲು ಕೂಡ ಬಿಡುತ್ತಿಲ್ಲ. ಅವರು ಕನಿಷ್ಠ ಒಂದು ಐದು ವಿಕೆಟ್ ಗೊಂಚಲು ತೆಗೆದುಕೊಳ್ಳುತ್ತಿದ್ದರು. ಆದರೆ, ನೀವು ಅವರಿಗೆ ಅದನ್ನು ಮಾಡಲು ಬಿಡಲಿಲ್ಲ. ನೀವು ಅವರನ್ನು ನ್ಯೂಜಿಲೆಂಡ್ ವಿರುದ್ಧವೂ ಆಡಿಸಲಿಲ್ಲ. ಒಬ್ಬ ಬ್ಯಾಟ್ಸ್‌ಮನ್‌ಗೆ ರಿದಮ್ ಬೇಕು ಎಂದಾದರೆ, ಬೌಲರ್‌ಗೂ ಅದು ಬೇಕು' ಎಂದು ಹೇಳಿದರು.

T20 ವಿಶ್ವಕಪ್ 2026ರ ಗುಂಪು ಹಂತದ ಭಾರತ vs ನೆದರ್ಲೆಂಡ್ ಪಂದ್ಯದಲ್ಲಿ ಮೂರು ಓವರ್‌ಗಳಲ್ಲಿ 3/14 ಬೌಲಿಂಗ್ ಮಾಡಿದ್ದಕ್ಕಾಗಿ ವರುಣ್ ಚಕ್ರವರ್ತಿ ಭಾರತೀಯ ಡ್ರೆಸ್ಸಿಂಗ್ ಕೋಣೆಯಲ್ಲಿ ಇಂಪ್ಯಾಕ್ಟ್ ಪ್ಲೇಯರ್ ಪ್ರಶಸ್ತಿ ಪಡೆದರು.

ಬುಧವಾರ ಅಹಮದಾಬಾದ್‌ನ ನರೇಂದ್ರ ಮೋದಿ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದಲ್ಲಿ ಭಾರತ 17 ರನ್‌ಗಳಿಂದ ಜಯಗಳಿಸಿತು.

ನೆದರ್ಲೆಂಡ್ ವಿರುದ್ಧದ ಪಂದ್ಯದಲ್ಲಿ ಚಕ್ರವರ್ತಿ ಮ್ಯಾಕ್ಸ್ ಒ'ಡೌಡ್, ಕಾಲಿನ್ ಅಕೆರ್ಮನ್ ಅವರ ವಿಕೆಟ್‌ಗಳನ್ನು ಕಬಳಿಸಿದರು ಮತ್ತು ಆರ್ಯನ್ ದತ್ ಅವರನ್ನು ಗೋಲ್ಡನ್ ಡಕ್‌ಗೆ ಔಟ್ ಮಾಡಿದರು. ಇದರಿಂದಾಗಿ ಭಾರತವು 20 ಓವರ್‌ಗಳಲ್ಲಿ 176/7ಕ್ಕೆ ನೆದರ್ಲೆಂಡ್ ತಂಡವನ್ನು ಕಟ್ಟಿಹಾಕಿತು. ಭಾರತ 194 ರನ್‌ಗಳ ಗುರಿ ನೀಡಿತ್ತು.

ನೆದರ್ಲೆಂಡ್ ವಿರುದ್ಧದ ಗೆಲುವಿನೊಂದಿಗೆ, ಭಾರತವು ಗುಂಪು ಹಂತದಲ್ಲಿ ಆಡಿರುವ ನಾಲ್ಕು ಪಂದ್ಯಗಳಲ್ಲಿ ನಾಲ್ಕರಲ್ಲೂ ಗೆಲುವು ಸಾಧಿಸಿದೆ. ಇತ್ತ ಸೂಪರ್ 8 ಹಂತಕ್ಕೆ ಅರ್ಹತೆ ಪಡೆದಿದೆ. ನೆದರ್ಲೆಂಡ್ ಒಂದು ಗೆಲುವು ಮತ್ತು ಮೂರು ಸೋಲುಗಳೊಂದಿಗೆ ಪಂದ್ಯಾವಳಿಯಿಂದ ಹೊರಬಿದ್ದಿತು.