'ಆತ ಇದ್ದರೆ ಇಂಗ್ಲೆಂಡ್ ತಂಡದ ಬೆವರಿಳಿಸುತ್ತಿದ್ದ': ವೈಭವ್ ಸೂರ್ಯವಂಶಿಯನ್ನು ಕಡೆಗಣಿಸಿದ್ದಕ್ಕೆ ರವಿ ಶಾಸ್ತ್ರಿ ಕೆಂಡಾಮಂಡಲ

ಭಾರತದ ಮಾಜಿ ಕೋಚ್ ಮತ್ತು ಖ್ಯಾತ ವೀಕ್ಷಕ ವಿವರಣೆಗಾರ ರವಿಶಾಸ್ತ್ರಿ ಅವರು ವೈಭವ್ ಸೂರ್ಯವಂಶಿ ಅವರಿಗೆ ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೆ ಚೊಚ್ಚಲ ಪ್ರವೇಶ ನೀಡದಿರುವ ನಿರ್ಧಾರಕ್ಕೆ ಭಾರತ ತಂಡದ ಆಡಳಿತ ಮಂಡಳಿ ವಿರುದ್ಧ ಅಸಮಾಧಾನ ಹೊರಹಾಕಿದ್ದಾರೆ. 15 ವರ್ಷದ ಈ ಆಟಗಾರ ಐಪಿಎಲ್ 2026ರಲ್ಲಿ ಅದ್ಭುತ ಫಾರ್ಮ್‌ನಲ್ಲಿದ್ದರು. ರಾಜಸ್ಥಾನ ರಾಯಲ್ಸ್ ಪರ 776 ರನ್ ಗಳಿಸಿ ಟೂರ್ನಮೆಂಟ್‌ನಲ್ಲಿ ಅತಿ ಹೆಚ್ಚು ರನ್ ಗಳಿಸಿದ ಆಟಗಾರರಾದರು. ಅದಕ್ಕೂ ಮೊದಲು, ಅವರು U-19 ವಿಶ್ವಕಪ್‌ನಲ್ಲಿ ಭಾರತದ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದರು. ಅವರ ಪ್ರದರ್ಶನಕ್ಕೆ ಪ್ರತಿಫಲವಾಗಿ, ಸೂರ್ಯವಂಶಿ ಐರ್ಲೆಂಡ್ ಮತ್ತು ಇಂಗ್ಲೆಂಡ್ ವಿರುದ್ಧದ T20I ಸರಣಿಗೆ ಭಾರತ ತಂಡದಲ್ಲಿ ಸ್ಥಾನ ಪಡೆದರು.

ಆದರೆ, ಭಾರತವು 0-2 ಅಂತರದಲ್ಲಿ ಸೋತ ಐರ್ಲೆಂಡ್ ವಿರುದ್ಧದ ಎರಡೂ ಪಂದ್ಯಗಳಲ್ಲಿ ಹಾಗೂ ಡರ್ಹಾಮ್‌ನಲ್ಲಿ ಇಂಗ್ಲೆಂಡ್ ವಿರುದ್ಧ ನಡೆದ ಆರಂಭಿಕ ಟಿ20ಐ ಪಂದ್ಯದಲ್ಲಿ ಅವರು ಆಡುವ ಹನ್ನೊಂದರ ಬಳಗದಿಂದ ಹೊರಗುಳಿದಿದ್ದಾರೆ.

ಇಂಗ್ಲೆಂಡ್ ವಿರುದ್ಧದ ಪಂದ್ಯ ಮಳೆಯಿಂದಾಗಿ ರದ್ದಾದ ನಂತರ, ಐಪಿಎಲ್‌ನಲ್ಲಿ ಅತ್ಯುತ್ತಮ ಪ್ರದರ್ಶನ ನೀಡುತ್ತಿದ್ದರೂ, ಯುವ ಆಟಗಾರನನ್ನು ತಂಡದಿಂದ ಹೊರಗಿಡುವ ತಂಡದ ಆಡಳಿತ ಮಂಡಳಿಯ ನಿರ್ಧಾರವನ್ನು ರವಿ ಶಾಸ್ತ್ರಿ ಪ್ರಶ್ನಿಸಿದ್ದಾರೆ.

'ಅರೆ, ವೋ ಖೇಲ್ನಾ ಚಾಹಿಯೇ ಥಾ ಯಾರ್ (ಅವರು ಐರ್ಲೆಂಡ್ ವಿರುದ್ಧ ಆಡಬೇಕಿತ್ತು). ಅದು ತುಂಬಾ ನಿಧಾನ ಮತ್ತು ಸ್ಪಾಂಜಿ ಟ್ರ್ಯಾಕ್ ಆಗಿತ್ತು. ಅವರು ಅವರ ಟೆರೇಸ್ ಮೇಲೆ ಹೊಡೆಯುತ್ತಿದ್ದರು, ಏಕೆಂದರೆ ಅದು ತುಂಬಾ ಸಣ್ಣ ಮೈದಾನವಾಗಿತ್ತು. ಅವರು ಅವರ ಬೆವರಿಳಿಸುತ್ತಿದ್ದರು. ಅವರು ಖಂಡಿತವಾಗಿಯೂ ಅಲ್ಲಿ ಆಡಬೇಕಿತ್ತು. ಈಗ, ಅವರು ಇಂಗ್ಲೆಂಡ್‌ನಲ್ಲಿ ಆಡುತ್ತಾರೋ ಇಲ್ಲವೋ, ನನಗೆ ಖಚಿತವಿಲ್ಲ. ಅವರು ಅವನನ್ನು ದೂಷಿಸುತ್ತಾರೆಯೋ ಇಲ್ಲವೋ ನನಗೆ ಖಚಿತವಿಲ್ಲ, ಆದರೆ ಸಾಧ್ಯವಾದಷ್ಟು ಬೇಗ ಅವರಿಗೆ ಒಂದು ಪಂದ್ಯವನ್ನು ನೀಡಿ' ಎಂದು ಶಾಸ್ತ್ರಿ ಸೋನಿ ಸ್ಪೋರ್ಟ್ಸ್‌ನಲ್ಲಿ ಹೇಳಿದರು.

'ಆತ ಐಪಿಎಲ್‌ನಲ್ಲಿ ಎಲ್ಲ ಬೌಲರ್‌ಗಳನ್ನೂ ಧೂಳೀಪಟ ಮಾಡಿದ್ದಾನೆ. ಯಾವ ವೇಗದ ಬೌಲರ್‌ನನ್ನಾದರೂ ಅವನು ಬಿಟ್ಟಿದ್ದಾನೆಯೇ? ಆದರೂ ನೀವು ಅವರನ್ನು ಬೆಂಚ್ ಕಾಯುವಂತೆ ಮಾಡುತ್ತಿದ್ದೀರಿ. ಸೂರ್ಯವಂಶಿ ಅವರು ಯಾವುದೇ ನಿರೀಕ್ಷೆ ಅಥವಾ ಜವಾಬ್ದಾರಿಯ ಹೊರೆಯಿಲ್ಲದೆ ಸಂಪೂರ್ಣ ಸ್ವಾತಂತ್ರ್ಯದೊಂದಿಗೆ ಬ್ಯಾಟಿಂಗ್ ಮಾಡಬಲ್ಲ ಆಟಗಾರ' ಎಂದು ಅವರು ಹೇಳಿದರು.

'ಅವರೊಬ್ಬ 'ಎಕ್ಸ್-ಫ್ಯಾಕ್ಟರ್' (ನಿರ್ಣಾಯಕ ಆಟಗಾರ), ಅವರ ಮೇಲೆ ಯಾವುದೇ ಒತ್ತಡದ ಹೊರೆಯಿಲ್ಲ. ಆತನಿಗೆ ಕೇವಲ 15 ವರ್ಷ, ಯೌವನದ ಉತ್ಸಾಹ ಅವನಲ್ಲಿದೆ. ಅವನಲ್ಲಿ ಯಾವುದೇ ಭಯವಿಲ್ಲ; ಒಂದು ವೇಳೆ ಮೊದಲ 2-3 ಓವರ್‌ಗಳಲ್ಲಿ ಅವನು ಲಯ ಕಂಡುಕೊಂಡರೆ, ಮಧ್ಯಮ ಕ್ರಮಾಂಕದ ಬ್ಯಾಟರ್‌ಗಳು ಲಾಭ ಪಡೆದುಕೊಳ್ಳುವಂತಹ ಉತ್ತಮ ಆರಂಭವನ್ನು ಒದಗಿಸಿಕೊಡುತ್ತಾನೆ. ನೀವು ಅವನಿಗೆ ತಂಡದಲ್ಲಿ ಸ್ಥಾನ ಕಲ್ಪಿಸಲೇಬೇಕು' ಎಂದು ಅವರು ಹೇಳಿದರು.

ಭಾರತ ಮತ್ತು ಇಂಗ್ಲೆಂಡ್ ನಡುವಿನ ಎರಡನೇ ಟಿ20 ಅಂತಾರಾಷ್ಟ್ರೀಯ ಪಂದ್ಯವು ಜುಲೈ 4 ರಂದು ಮ್ಯಾಂಚೆಸ್ಟರ್‌ನಲ್ಲಿ ನಡೆಯಲಿದೆ.