'ನೀವು ಒಂದು ತಿಂಗಳಿನಿಂದ ಫಾರ್ಮ್‌ ನಲ್ಲಿ ಇರಲಿಲ್ಲ; ನಾನು ಎರಡು ವರ್ಷ ತಂಡದಲ್ಲೇ ಇರಲಿಲ್ಲ': ಇಶಾನ್ ಕಿಶನ್

2026ರ ಟಿ20 ವಿಶ್ವಕಪ್ ಫೈನಲ್‌ನಲ್ಲಿ ನ್ಯೂಜಿಲೆಂಡ್ ವಿರುದ್ಧ ಭಾರತ 96 ರನ್‌ಗಳ ಜಯ ಸಾಧಿಸಿದ ನಂತರ ನಡೆದ ಪತ್ರಿಕಾಗೋಷ್ಠಿಯಲ್ಲಿ ಭಾರತದ ಸ್ಟಾರ್ ಬ್ಯಾಟ್ಸ್‌ಮನ್‌ಗಳಾದ ಅಭಿಷೇಕ್ ಶರ್ಮಾ ಮತ್ತು ಇಶಾನ್ ಕಿಶನ್ ಒಂದು ಹಾಸ್ಯಮಯ ಕ್ಷಣವನ್ನು ಹಂಚಿಕೊಂಡರು. ಫೈನಲ್ ಪಂದ್ಯದಲ್ಲಿ ಇಬ್ಬರೂ ಆಟಗಾರರು ಪ್ರಮುಖ ಪಾತ್ರ ವಹಿಸಿದರು. ಅಭಿಷೇಕ್ 21 ಎಸೆತಗಳಲ್ಲಿ 52 ರನ್ ಗಳಿಸಿದರೆ, ಕಿಶನ್ 25 ಎಸೆತಗಳಲ್ಲಿ 54 ರನ್ ಗಳಿಸಿದರು. ಪಂದ್ಯಾವಳಿಯ ಆರಂಭದಲ್ಲಿ ಸತತ ಮೂರು ಬಾರಿ ಡಕೌಟ್ ಆಗಿದ್ದ ಕಾರಣ ಅಭಿಷೇಕ್ ಅವರನ್ನು ತಂಡದಿಂದ ಕೈಬಿಡುವಂತೆ ಸಾಕಷ್ಟು ಟೀಕೆಗಳು ಕೇಳಿಬಂದಿದ್ದವು. ಇತ್ತ ಇಶಾನ್ ಕಿಶನ್ ಅವರನ್ನು ಎರಡು ವರ್ಷಗಳಿಗೂ ಹೆಚ್ಚು ಕಾಲ ಆಯ್ಕೆದಾರರು ಕಡೆಗಣಿಸಿದ್ದರು. ಕಿಶನ್, ಈ ವರ್ಷದ ಆರಂಭದಲ್ಲಿ ನ್ಯೂಜಿಲೆಂಡ್ ವಿರುದ್ಧದ ಸರಣಿಯಲ್ಲಿ ಮತ್ತೆ ತಂಡಕ್ಕೆ ಮರಳಿದರು.

ಪತ್ರಿಕಾಗೋಷ್ಠಿಯ ಸಮಯದಲ್ಲಿ, ಇಬ್ಬರಿಗೂ ತಮ್ಮ ವೈಯಕ್ತಿಕ ಹಿನ್ನಡೆಗಳನ್ನು ಹೇಗೆ ನಿಭಾಯಿಸಿದ್ದೀರಿ ಎಂದು ಕೇಳಲಾಯಿತು. ಆಗ ಅಭಿಷೇಕ್ ಪ್ರತಿಕ್ರಿಯಿಸಲು ಮುಂದಾದರು. ಆದರೆ, ಕಿಶನ್ ತನ್ನ ಹೋರಾಟ ಮಾತ್ರ ತುಂಬಾ ದೀರ್ಘವಾಗಿತ್ತು ಎಂದು ನೆನಪಿಸಿದರು.

'ಈ ಪ್ರಶ್ನೆಗೆ ನಾನು ಈಗಲೇ ಉತ್ತಮ ಉತ್ತರ ನೀಡಬಲ್ಲೆ ಎಂದು ನಾನು ಭಾವಿಸುತ್ತೇನೆ' ಎಂದು ಅಭಿಷೇಕ್ ಮಾತು ಆರಂಭಿಸಿದರು. ಕಿಶನ್ ತಕ್ಷಣ ಮಧ್ಯಪ್ರವೇಶಿಸಿ, 'ಮೇ ಭಿ ದೇ ಸಕ್ತಾ ಹೂಂ (ನಾನು ಕೂಡ ಉತ್ತರಿಸಬಲ್ಲೆ)' ಎಂದು ಹೇಳಿದರು.

ನಂತರ ಅವರು, 'ತೇರಾ ಏಕ್ ಮಹಿನಾ ಫಾರ್ಮ್ ಗಯಾ ಥಾ, ಮೇ ದೋ ಸಾಲ್ ಬಹರ್ ರಹಾ ಹೂಂ (ನೀವು ಒಂದು ತಿಂಗಳಿನಿಂದ ಫಾರ್ಮ್‌ನಿಂದ ಹೊರಗಿದ್ದೀರಿ; ನಾನು ಎರಡು ವರ್ಷಗಳ ಕಾಲ ತಂಡದಿಂದಲೇ ಹೊರಗಿದ್ದೆ)' ಎಂದು ಇಶಾನ್ ಕಿಶನ್ ಹೇಳಿದರು.

ಆಗ ನಗುತ್ತಾ ಉತ್ತರಿಸಿದ ಅಭಿಷೇಕ್, 'ಆ ಒಂದು ತಿಂಗಳು ನನಗೆ ಒಂದೂವರೆ ವರ್ಷಗಳಂತೆ ಭಾಸವಾಯಿತು' ಎಂದು ಪಂದ್ಯಾವಳಿಯಲ್ಲಿನ ಅವರ ವೈಫಲ್ಯಗಳ ಸರಣಿಯನ್ನು ಉಲ್ಲೇಖಿಸಿದರು.

ಈ ತಮಾಷೆಯ ಹೊರತಾಗಿ, ಬಿಸಿಸಿಐ ತನ್ನ ವೇದಿಕೆಯಲ್ಲಿ ವಿಡಿಯೋವೊಂದನ್ನು ಹಂಚಿಕೊಂಡಿದೆ. ಅಲ್ಲಿ ಇಬ್ಬರು ಕ್ರಿಕೆಟಿಗರು ಭಾರತದ ಪ್ರಶಸ್ತಿ ವಿಜೇತ ಓಟದ ಹಿಂದಿನ ಭಾವನೆಗಳು ಮತ್ತು ಅದಕ್ಕೆ ಕಾರಣವಾದ ಪ್ರಯಾಣದ ಬಗ್ಗೆ ಸ್ಪಷ್ಟವಾಗಿ ಮಾತನಾಡಿದ್ದಾರೆ.

'ಆತಿಥೇಯ ರಾಷ್ಟ್ರ ವಿಶ್ವಕಪ್ ಗೆದ್ದಿಲ್ಲ ಮತ್ತು ಆದರೆ, ಈಗ ನಾವು ಇಲ್ಲಿದ್ದೇವೆ. ನಾವು ನಮ್ಮ ಪೂರ್ಣ ಹೃದಯದಿಂದ ಆಡಿದೆವು. ಪಂದ್ಯಾವಳಿಯ ಉದ್ದಕ್ಕೂ, ನಾವು ಉತ್ತಮ ಹೆಡ್‌ಸ್ಪೇಸ್‌ನಲ್ಲಿದ್ದೆವು, ನಾವು ಪರಸ್ಪರ ಬೆಂಬಲಿಸಿದೆವು ಮತ್ತು ಭಾರತ ತಂಡದ ಉದ್ದೇಶವೂ ಅದೇ ಆಗಿತ್ತು' ಎಂದು ಕಿಶನ್ BCCI.tv ವೀಡಿಯೊದಲ್ಲಿ ಹೇಳಿದರು.

'2023ರ ವಿಶ್ವಕಪ್‌ನಲ್ಲಿ ನಾನು ಕೊನೆಯ ಬಾರಿಗೆ ಕಾಣಿಸಿಕೊಂಡಿದ್ದೆ ಮತ್ತು ನಾವೆಲ್ಲರೂ ಡ್ರೆಸ್ಸಿಂಗ್ ಕೋಣೆಯಲ್ಲಿ ಅಳುತ್ತಿದ್ದೆವು. ಆದರೆ, ಹೀಗೆಯೇ ವಿಷಯಗಳು ತಿರುಗುತ್ತವೆ. ನಾವು ಉತ್ತಮ ಆಟ ಆಡಿದ್ದೇವೆ. ಇದರ ಶ್ರೇಯ ಸಹಾಯಕ ಸಿಬ್ಬಂದಿಗೆ ಮತ್ತು ನಮ್ಮೊಂದಿಗಿದ್ದ ಎಲ್ಲರಿಗೂ ಸಲ್ಲುತ್ತದೆ. ಇಂದು, ಇಲ್ಲಿ ನಾವು ಟ್ರೋಫಿಯನ್ನು ಎತ್ತಿ ಹಿಡಿದಿದ್ದೇವೆ. ನಾವು ಅದನ್ನು ಮತ್ತೆ ಮಾಡಲು ಆಶಿಸುತ್ತೇವೆ' ಎಂದರು.