ನ್ಯೂಜಿಲೆಂಡ್ ವಿರುದ್ಧದ 4ನೇ ಏಕದಿನ ಪಂದ್ಯದಲ್ಲಿ ಭಾರತೀಯ ಕ್ರಿಕೆಟ್ ತಂಡವು ಕೇವಲ 89 ರನ್‌ಗಳಿಗೆ ಆಲೌಟ್ ಆದ ನಂತರ, ಶುಕ್ರವಾರ ನಡೆದ ಪತ್ರಿಕಾಗೋಷ್ಠಿಯಲ್ಲಿ ಮುಖ್ಯ ಕೋಚ್ ಗೌತಮ್ ಗಂಭೀರ್, ಬ್ಯಾಟರ್‌ಗಳ ವಿರುದ್ಧ ಕಿಡಿಕಾರಿದರು. ಮೊದಲು ಬ್ಯಾಟಿಂಗ್ ಮಾಡಿದ ನ್ಯೂಜಿಲೆಂಡ್ 333 ರನ್‌ಗಳನ್ನು ಕಲೆಹಾಕಿತ್ತು. ಆದರೆ, ಕಿವೀಸ್ ವೇಗಿ ಮ್ಯಾಟ್ ಹೆನ್ರಿ ತಮ್ಮ ಮೊದಲ ಓವರ್‌ನಲ್ಲೇ ರೋಹಿತ್ ಶರ್ಮಾ, ವಿರಾಟ್ ಕೊಹ್ಲಿ ಮತ್ತು ಶ್ರೇಯಸ್ ಅಯ್ಯರ್ ಅವರನ್ನು ಶೂನ್ಯಕ್ಕೆ (ಡಕ್) ಔಟ್ ಮಾಡುವ ಮೂಲಕ ಮೂರು ವಿಕೆಟ್‌ಗಳನ್ನು ಕಬಳಿಸಿ ಭಾರತ ತಂಡಕ್ಕೆ ಸಂಕಷ್ಟ ತಂದೊಡ್ಡಿದರು.
ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಗಂಭೀರ್, ಹೆನ್ರಿ ಎಸೆದ ಎಸೆತಗಳನ್ನು 'ಎದುರಿಸಲು ಅಸಾಧ್ಯ'ವಾಗಿತ್ತು ಎಂಬ ಮಾತನ್ನು ತಳ್ಳಿಹಾಕಿದರು. ಬ್ಯಾಟರ್‌ಗಳು ಚೆಂಡನ್ನು ಎದುರಿಸುವ ರೀತಿಯಲ್ಲಿಯೇ (execution) ಸಮಸ್ಯೆಯಿದೆ. ಇದು ತಮಗೆ ಕಳವಳದ ವಿಷಯವಾಗಿ ಪರಿಣಮಿಸುತ್ತಿದೆ ಎಂದು ತಿಳಿಸಿದರು.
'ಅಂತರರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಎದುರಿಸಲು ಸಾಧ್ಯವೇ ಇಲ್ಲದ ಎಸೆತಗಳಿರುವುದಿಲ್ಲ. ನಾವು ಮೊದಲ 10 ಓವರ್‌ಗಳನ್ನು ಎಚ್ಚರಿಕೆಯಿಂದ ನಿಭಾಯಿಸಬೇಕಿತ್ತು. ಮ್ಯಾಟ್ ಹೆನ್ರಿ ಉತ್ತಮ ಜಾಗಗಳಲ್ಲಿ ಬೌಲಿಂಗ್ ಮಾಡಿದರು, ಆದರೆ ಅದನ್ನು ಸಮರ್ಥವಾಗಿ ಎದುರಿಸುವ ಸಾಮರ್ಥ್ಯ ನಮಗಿರಬೇಕಿತ್ತು. ಕೇವಲ 90 ರನ್‌ಗಳ ಆಸುಪಾಸಿಗೆ ತಂಡವೇ ಕುಸಿದುಬಿದ್ದಾಗ ಸಹಜವಾಗಿಯೇ ಆತಂಕವಾಗುತ್ತದೆ. ಇಲ್ಲಿನ ಪರಿಸ್ಥಿತಿಗಳು ವಿಶ್ವಕಪ್‌ಗೆ ಸಿದ್ಧವಾಗಲು ಪೂರಕವಾಗಿವೆ. ಹಿಂದಿನ ಪಂದ್ಯದಲ್ಲೂ ನಾವು ಏಳು ವಿಕೆಟ್‌ಗಳನ್ನು ಕಳೆದುಕೊಂಡಿದ್ದೆವು; ಇದು ಖಂಡಿತವಾಗಿಯೂ ಕಳವಳಕಾರಿ ವಿಷಯ' ಎಂದು ಬೇ ಓವಲ್‌ನಲ್ಲಿ ನಡೆದ ಪಂದ್ಯದ ನಂತರ ಗಂಭೀರ್ ಹೇಳಿದರು.
ನ್ಯೂಜಿಲೆಂಡ್ ವಿರುದ್ಧದ ಎರಡನೇ ಏಕದಿನ ಪಂದ್ಯವನ್ನೂ ಗಂಭೀರ್ ಈ ಸಂದರ್ಭದಲ್ಲಿ ನೆನಪಿಸಿಕೊಂಡರು. ಆ ಪಂದ್ಯದಲ್ಲಿ ಭಾರತವು ಡಿಎಲ್‌ಎಸ್ (DLS) ನಿಯಮದ ಪ್ರಕಾರ ಗೆಲುವು ಸಾಧಿಸಿತ್ತಾದರೂ, 111 ರನ್‌ಗಳಿಗೆ 7 ವಿಕೆಟ್‌ಗಳನ್ನು ಕಳೆದುಕೊಂಡಿತ್ತು. ಬ್ಯಾಟಿಂಗ್ ಕ್ರಮಾಂಕವು ಪದೇ ಪದೆ ಹೀಗೆ ಕುಸಿಯುತ್ತಿರುವುದು ಗಂಭೀರವಾದ ಆತಂಕದ ವಿಷಯವಾಗಿದೆ ಎಂದರು.
'ಕಳೆದ ಪಂದ್ಯದಲ್ಲೂ ನಾವು 111 ರನ್‌ಗಳಿಗೆ 7 ವಿಕೆಟ್‌ಗಳನ್ನು ಕಳೆದುಕೊಂಡಿದ್ದೆವು; ಇದು ಸ್ವಲ್ಪ ಆತಂಕದ ವಿಷಯ. ನಾವು ಮಾನಸಿಕವಾಗಿ ಮತ್ತು ಕೌಶಲ್ಯದ ದೃಷ್ಟಿಯಿಂದ ಸಿದ್ಧರಾಗಿರಬೇಕು. ಇಂತಹ ಪರಿಸ್ಥಿತಿಯಲ್ಲಿ ವಿಕೆಟ್ ನಷ್ಟವಿಲ್ಲದೆ 35-40 ರನ್‌ಗಳನ್ನು ಗಳಿಸುವುದು ಉತ್ತಮ. ನಮ್ಮ ತಂಡದಲ್ಲಿ ಅನುಭವಿ ಆಟಗಾರರಿದ್ದಾರೆ, ಹೀಗಾಗಿ ಮುಂದಿನ ಪಂದ್ಯದಲ್ಲಿ ನಾವು ಪರಿಸ್ಥಿತಿಗೆ ತಕ್ಕಂತೆ ಹೊಂದಿಕೊಳ್ಳಬಲ್ಲೆವು ಎಂದು ಭಾವಿಸುತ್ತೇನೆ' ಎಂದು ಹೇಳಿದರು.
ನ್ಯೂಜಿಲೆಂಡ್ ತಂಡವು ಮೊದಲು ಬ್ಯಾಟಿಂಗ್ ಮಾಡಿ 333 ರನ್‌ಗಳನ್ನು ಗಳಿಸಿದ್ದರೂ, ಬೌಲಿಂಗ್ ವಿಭಾಗದ ಬಗ್ಗೆ ಗಂಭೀರ್‌ಗೆ ಹೆಚ್ಚಿನ ದೂರುಗಳೇನೂ ಇರಲಿಲ್ಲ. ಅವರ ಪ್ರಕಾರ, ಭಾರತ ತಂಡವು ಫೀಲ್ಡಿಂಗ್‌ನಲ್ಲಿ ಇನ್ನಷ್ಟು ಉತ್ತಮ ಪ್ರದರ್ಶನ ನೀಡಬೇಕಿತ್ತು, ಏಕೆಂದರೆ ಕೆಲವು ಕ್ಯಾಚ್‌ಗಳನ್ನು ಕೈಬಿಡಲಾಗಿತ್ತು.
'ಔಕಿಬ್ ನಬಿ ದುರದೃಷ್ಟವಂತರಾಗಿದ್ದರು; ನಾವು ವಿಲ್ ಯಂಗ್ ಅವರ ವಿಕೆಟ್ ಪಡೆದಿದ್ದರೆ, ಫಲಿತಾಂಶ ಬೇರೆಯೇ ಆಗಿರಬಹುದಿತ್ತು. ಆದರೆ, ಪಂದ್ಯ ಮುಗಿದ ನಂತರ ಹೀಗೆಲ್ಲ ಯೋಚಿಸುವುದು ಸಹಜ. ನಾವು ಕ್ಯಾಚ್‌ಗಳನ್ನು ಕೈಬಿಟ್ಟೆವು, ಅದಕ್ಕೆ ನಾವು ಬೆಲೆ ತೆರಲೇಬೇಕು. ನಮ್ಮ ಬೌಲಿಂಗ್ ವಿಭಾಗದ ಬಗ್ಗೆ ನಾವೆಲ್ಲರೂ ಹೆಮ್ಮೆಪಡಬೇಕು' ಎಂದು ಹೆಡ್ ಕೋಚ್ ತಿಳಿಸಿದರು.
ಈ ಪಂದ್ಯದಲ್ಲಿ ಸಮಸ್ಯೆಯಾಗಿ ಕಂಡುಬಂದ 'ವೊಬಲ್ ಸೀಮ್' (wobble seam) ಅನ್ನು ಎದುರಿಸುವ ಬಗ್ಗೆ ಕೇಳಿದಾಗ, 'ನಾನು ತಾಂತ್ರಿಕ ವಿಷಯಗಳ ಆಳಕ್ಕೆ ಹೋಗುವುದಿಲ್ಲ. ಚೆಂಡಿನಲ್ಲಿ ಹೆಚ್ಚಿನ ವ್ಯತ್ಯಾಸವೇನೂ ಇರಲಿಲ್ಲ; ಚೆಂಡಿನ ಚಲನೆಯನ್ನು ನಿಭಾಯಿಸುವುದು ಬ್ಯಾಟರ್‌ನ ಕೆಲಸ. ಸೀಮ್‌ಗಿಂತ ಹೆಚ್ಚಾಗಿ, ಚೆಂಡು ಬಿದ್ದ ಜಾಗ (areas) ಮತ್ತು ಅದರ ಲೆಂತ್ ನಮಗೆ ಸಮಸ್ಯೆಗಳನ್ನು ಉಂಟುಮಾಡಿದವು. ನಾವು ಕ್ರೀಸ್‌ನಲ್ಲೇ ಸಿಲುಕಿಕೊಂಡೆವು' ಎಂದರು.
