'ಕೆಎಲ್ ರಾಹುಲ್‌ಗೆ ಅವಕಾಶವಿತ್ತು, ಆದರೆ ಅವರೇ ಅದನ್ನು ಕೈಚೆಲ್ಲಿದರು': ಭಾರತದ ಟಿ20ಐ ತಂಡಕ್ಕೆ ಕಂಬ್ಯಾಕ್ ಬಗ್ಗೆ ಆಕಾಶ್ ಚೋಪ್ರಾ!

ಭಾರತದ ಟಿ20ಐ ತಂಡಕ್ಕೆ ಕೆಎಲ್ ರಾಹುಲ್ ಮರಳಲು ಇನ್ನೂ ಏನಾದರೂ ಅವಕಾಶವಿದೆಯೇ? ಎಂಬ ಪ್ರಶ್ನೆಗೆ ಸದ್ಯ ಉತ್ತರ ಸಿಗುವುದು ಕಷ್ಟ. ಭಾರತದ ಮಾಜಿ ಬ್ಯಾಟರ್ ಆಕಾಶ್ ಚೋಪ್ರಾ ಕೂಡ ಅವಕಾಶವಿದೆ ಎಂದು ಭಾವಿಸುವುದಿಲ್ಲ. ಭಾರತದ ಟಿ20 ತಂಡದಲ್ಲಿ, ಆರಂಭಿಕ ಆಟಗಾರರ ಎರಡು ಸ್ಥಾನಗಳಿಗೆ ತೀವ್ರ ಪೈಪೋಟಿಯಿದೆ. ಸದ್ಯ ಪರಿಸ್ಥಿತಿ ಎಷ್ಟರ ಮಟ್ಟಿಗೆ ಇದೆಯೆಂದರೆ, ವೈಭವ್ ಸೂರ್ಯವಂಶಿಯಂತಹ ಅದ್ಭುತ ಪ್ರತಿಭೆ ಕೂಡ ಆಡುವ ಹನ್ನೊಂದರ ಬಳಗದಲ್ಲಿ (playing XI) ಸ್ಥಾನ ಪಡೆಯಲು ಸಾಧ್ಯವಾಗುತ್ತಿಲ್ಲ. ಕೆಎಲ್ ರಾಹುಲ್ ಭಾರತದ ಅತ್ಯಂತ ಬೇಡಿಕೆಯ ಬ್ಯಾಟರ್‌ಗಳಲ್ಲಿ ಒಬ್ಬರು ಎಂಬುದು ನಿಜವೇ ಆದರೂ, ಟಿ20 ಮಾದರಿಯಲ್ಲಿ ಅವರು ರಾಷ್ಟ್ರೀಯ ತಂಡಕ್ಕೆ ಮರಳುವ ಯಾವುದೇ ಸಾಧ್ಯತೆಯಿಲ್ಲ ಎಂದು ಆಕಾಶ್ ಚೋಪ್ರಾ ಅಭಿಪ್ರಾಯಪಡುತ್ತಾರೆ.

ರಾಹುಲ್ ಕೊನೆಯದಾಗಿ 2022ರಲ್ಲಿ ಭಾರತಕ್ಕಾಗಿ ಟಿ20ಐ ಪಂದ್ಯಗಳನ್ನು ಆಡಿದ್ದರು. ಅಂದಿನಿಂದ ಅವರು ತಂಡದಿಂದ ಹೊರಗುಳಿದಿದ್ದಾರೆ. ಕಳೆದ ಒಂದೆರಡು ವರ್ಷಗಳಲ್ಲಿ ತಮ್ಮ ಆಟದ ಶೈಲಿಯನ್ನು ಬದಲಿಸಿಕೊಂಡು, ಹೆಚ್ಚು ಆಕ್ರಮಣಕಾರಿ ಧಾಟಿಯಲ್ಲಿ ಆಡುತ್ತಿದ್ದರೂ, ಅವರಿಗೆ ರಾಷ್ಟ್ರೀಯ ಟಿ20 ತಂಡದಲ್ಲಿ ಮತ್ತೆ ಸ್ಥಾನ ಪಡೆಯಲು ಸಾಧ್ಯವಾಗಿಲ್ಲ. ಅವರು ಮತ್ತೆ ತಂಡಕ್ಕೆ ಮರಳುವ ಅವಕಾಶ ಕೈತಪ್ಪಿಹೋಗಿದೆ ಎಂದು ಚೋಪ್ರಾ ಅಭಿಪ್ರಾಯಪಡುತ್ತಾರೆ.

'ಒಂದು ಕಾಲದಲ್ಲಿ ಅವರಿಗೆ ಅವಕಾಶವಿತ್ತು. ಆದರೆ, ಅವರು ಅದನ್ನು ಕೈಚೆಲ್ಲಿದರು. ಈಗ ಆ ಸ್ಥಾನವನ್ನು ಬೇರೊಬ್ಬರು ಪಡೆದುಕೊಂಡಿದ್ದಾರೆ. ಕೆಎಲ್ ರಾಹುಲ್ ಆ ವೇಗದಲ್ಲಿ ಬ್ಯಾಟಿಂಗ್ ಮಾಡಲು ಸಾಧ್ಯವೇ ಇಲ್ಲ ಎಂದು ನಾನು ಖಂಡಿತವಾಗಿಯೂ ಹೇಳುವುದಿಲ್ಲ. ಒಬ್ಬ ಆಟಗಾರನು 50 ಎಸೆತಗಳಲ್ಲಿ 150 ರನ್‌ಗಳನ್ನು ಗಳಿಸಬಲ್ಲನೆಂದಾದರೆ, ತಾನು ಬಯಸಿದಾಗಲೆಲ್ಲ ಅವರು ಆ ರೀತಿಯಲ್ಲಿ ಬ್ಯಾಟಿಂಗ್ ಮಾಡಬಲ್ಲರು' ಎಂದು ಅವರು ತಮ್ಮ ಯೂಟ್ಯೂಬ್ ಚಾನೆಲ್‌ನಲ್ಲಿನ ವಿಡಿಯೋವೊಂದರಲ್ಲಿ ಹೇಳಿದರು.

'ಆದರೆ, ಭಾರತ ತಂಡವು ಸದ್ಯಕ್ಕೆ ಆತನ ಕಡೆಗೆ ಗಮನ ಹರಿಸಲಿದೆ ಎಂದು ನನಗೆ ಅನ್ನಿಸುತ್ತಿಲ್ಲ. ಟೆಸ್ಟ್ ಮತ್ತು ಏಕದಿನ ಕ್ರಿಕೆಟ್‌ನಲ್ಲಿ ಕೆಎಲ್ ರಾಹುಲ್ ಅತ್ಯಂತ ಪ್ರಮುಖ ಆಟಗಾರರಾಗಿದ್ದಾರೆ. ವಾಸ್ತವವಾಗಿ, ಅವರು ಈಗ ಟೆಸ್ಟ್ ತಂಡದ ಉಪನಾಯಕರಾಗಿದ್ದಾರೆ; ಆದರೆ ಟಿ20 ಕ್ರಿಕೆಟ್‌ನ ದೃಷ್ಟಿಯಿಂದ ಭಾರತವು ಅವರನ್ನು ಪರಿಗಣಿಸುತ್ತದೆ ಎಂದು ನನಗೆ ಅನಿಸುತ್ತಿಲ್ಲ' ಎಂದರು.

ಭಾರತ ತಂಡದಲ್ಲಿನ ಸದ್ಯದ ಪರಿಸ್ಥಿತಿಯಲ್ಲಿ ಅಗ್ರ ಕ್ರಮಾಂಕಕ್ಕಾಗಿ ಪೈಪೋಟಿ ಎಷ್ಟು ತೀವ್ರವಾಗಿದೆ ಎಂಬುದನ್ನು ಎತ್ತಿ ತೋರಿಸಿದ ಚೋಪ್ರಾ, ರಾಹುಲ್ ಹಿಂದೆಂದಿಗಿಂತಲೂ ವೇಗವಾಗಿ ಬ್ಯಾಟಿಂಗ್ ಮಾಡಬಲ್ಲರು ಎಂಬ ನಂಬಿಕೆಯಿದ್ದರೂ, ಅವರು ಯಾರೊಂದಿಗೆ ಸ್ಪರ್ಧಿಸುತ್ತಿದ್ದಾರೋ ಅವರನ್ನು ಗಮನಿಸಿದರೆ, ತಂಡದಲ್ಲಿ ಸ್ಥಾನ ಪಡೆಯುವುದು ರಾಹುಲ್‌ಗೆ ಕಷ್ಟಸಾಧ್ಯವಾಗಿದೆ.

'ಟಿ20 ಕ್ರಿಕೆಟ್‌ನಲ್ಲಿ ಕೆಎಲ್ ರಾಹುಲ್ ಅವರಿಗೆ ಹೇಗೆ ಅವಕಾಶ ಸಿಗುತ್ತದೆ ಮತ್ತು ಯಾರ ಬದಲಿಗೆ ಸಿಗುತ್ತದೆ ಎಂದು ನನಗೆ ಹೇಳಿ. ಅವರು ಟಿ20 ಕ್ರಿಕೆಟ್‌ನಲ್ಲಿ ಮಧ್ಯಮ ಕ್ರಮಾಂಕದ ಬ್ಯಾಟರ್ ಅಲ್ಲ. ಅವರು ಆರಂಭಿಕ ಆಟಗಾರ, ಆದರೆ ನಾವು ವೈಭವ್ ಸೂರ್ಯವಂಶಿ ಅವರಿಗೆ ಆರಂಭಿಕ ಆಟಗಾರನಾಗಿ ಅವಕಾಶ ನೀಡಲು ಸಾಧ್ಯವಾಗುತ್ತಿಲ್ಲ' ಎಂದು ಅವರು ಹೇಳಿದರು.

'ನಿಮ್ಮ ಬಳಿ ಅಭಿಷೇಕ್ ಶರ್ಮಾ, ಸಂಜು ಸ್ಯಾಮ್ಸನ್, ಇಶಾನ್ ಕಿಶನ್ ಮತ್ತು ವೈಭವ್ ಇದ್ದಾರೆ. ಈ ನಾಲ್ಕು ಮಂದಿ ಇರುವಾಗ, ವೈಭವ್‌ಗೆ ಏಕೆ ಅವಕಾಶ ನೀಡುತ್ತಿಲ್ಲ ಮತ್ತು ಅವನನ್ನು ಯಾವಾಗ ಆಡಿಸಲಾಗುತ್ತದೆ ಎಂದು ಇಡೀ ದೇಶವೇ ಪ್ರಶ್ನಿಸುತ್ತಿದೆ. ಇಂತಹ ಪರಿಸ್ಥಿತಿಯಲ್ಲಿ ಕೆಎಲ್ ರಾಹುಲ್ ಹೇಗೆ ಆಡಲು ಸಾಧ್ಯ? ಒಮ್ಮೆ ಯೋಚಿಸಿ ನೋಡಿ. ಇದು ಖಂಡಿತಾ ನಡೆಯುವುದಿಲ್ಲ' ಎಂದು ಚೋಪ್ರಾ ದೃಢವಾಗಿ ಹೇಳಿದರು.