ಐಪಿಎಲ್ 2027ರ ಮಿನಿ ಹರಾಜಿಗೂ ಮುನ್ನ ಕೆಎಲ್ ರಾಹುಲ್ ಡೆಲ್ಲಿ ಕ್ಯಾಪಿಟಲ್ಸ್ (DC) ಜೊತೆಗಿನ ತಮ್ಮ ಭವಿಷ್ಯದ ಬಗ್ಗೆ ಇದ್ದ ಊಹಾಪೋಹಗಳಿಗೆ ತೆರೆ ಎಳೆದಿದ್ದಾರೆ. 2026ರ ಐಪಿಎಲ್ ಸೀಸನ್ ಮುಗಿದಾಗಿನಿಂದ, ಫ್ರಾಂಚೈಸಿಗಳ ನಡುವಿನ ಸಂಭಾವ್ಯ ಆಟಗಾರರ ಟ್ರೇಡ್ ಕುರಿತು ಹಲವಾರು ವರದಿಗಳು ಮತ್ತು ವದಂತಿಗಳು ಹೊರಹೊಮ್ಮಿವೆ. ರಿಷಭ್ ಪಂತ್ ಅಧಿಕೃತವಾಗಿ ಡಿಸಿಗೆ ಮರಳುವುದರೊಂದಿಗೆ ಮತ್ತು ಕುಲದೀಪ್ ಯಾದವ್ ಲಕ್ನೋ ಸೂಪರ್ ಜೈಂಟ್ಸ್ಗೆ ಸೇರ್ಪಡೆಗೊಳ್ಳುವುದರೊಂದಿಗೆ ವಿನಿಮಯ ಪೂರ್ಣಗೊಂಡಿದೆ. ಇದೀಗ ಕೆಎಲ್ ರಾಹುಲ್ ಮುಂಬರುವ ಆವೃತ್ತಿಯಲ್ಲಿಯೂ ಡಿಸಿಯೊಂದಿಗೆ ಮುಂದುವರಿಯುವುದಾಗಿ ಸ್ಪಷ್ಟಪಡಿಸಿದ್ದಾರೆ.
ಡೆಲ್ಲಿ ಕ್ಯಾಪಿಟಲ್ಸ್ನ ಸಹ-ಮಾಲೀಕ ಪಾರ್ಥ್ ಜಿಂದಾಲ್ ಅವರು ಎಕ್ಸ್ ಖಾತೆಯಲ್ಲಿ ರಾಹುಲ್ ಅವರನ್ನು ಹೊಗಳಿದ ನಂತರ ಈ ಊಹಾಪೋಹಗಳಿಗೆ ಮತ್ತಷ್ಟು ರೆಕ್ಕೆಪುಕ್ಕ ಬಂದವು. ಅವರನ್ನು "ಕ್ಲಚ್ ಪ್ಲೇಯರ್" ಎಂದು ಕರೆದ ಜಿಂದಾಲ್, ಫ್ರಾಂಚೈಸಿಯೊಂದಿಗೆ ಅಪೂರ್ಣ ವ್ಯವಹಾರದ ಬಗ್ಗೆ ಸುಳಿವು ನೀಡಿದರು.
'ಕೆಎಲ್ (ರಾಹುಲ್) ಡೆಲ್ಲಿ ಕ್ಯಾಪಿಟಲ್ಸ್ ತಂಡದ ಕ್ಲಚ್ ಆಗಿದ್ದಾರೆ - ನನಗೆ ತಿಳಿದಿರುವ ಅತ್ಯಂತ ಒಳ್ಳೆಯ ವ್ಯಕ್ತಿಗಳಲ್ಲಿ ಒಬ್ಬರು ಮತ್ತು ತಂಡವನ್ನು ಯಾವಾಗಲೂ ತನಗಿಂತಲೂ ಮೊದಲು ಇಡುವವರು. ನಮ್ಮಿಂದ ಇನ್ನೂ ಪೂರ್ಣಗೊಳ್ಳದ ಕೆಲಸವಿದೆ ಮತ್ತು ಐಪಿಎಲ್ನಲ್ಲಿ ದೆಹಲಿಯನ್ನು ಹೆಮ್ಮೆಪಡುವಂತೆ ಮಾಡಲು ಒಟ್ಟಾಗಿ ಶ್ರಮಿಸುತ್ತೇವೆ' ಎಂದು ಜಿಂದಾಲ್ Xನಲ್ಲಿ ಬರೆದಿದ್ದಾರೆ.
ಈ ಪೋಸ್ಟ್ಗೆ ಪ್ರತಿಕ್ರಿಯಿಸಿದ ರಾಹುಲ್, 'ಧನ್ಯವಾದಗಳು, ಮುಂಬರುವ ಆವೃತ್ತಿಗಾಗಿ ಎದುರು ನೋಡುತ್ತಿದ್ದೇನೆ' ಎಂದು ಬರೆದಿದ್ದಾರೆ. ಅವರ ಉತ್ತರವು ಅವರು ಡೆಲ್ಲಿ ಕ್ಯಾಪಿಟಲ್ಸ್ನೊಂದಿಗೆ ಉಳಿಯುತ್ತಿದ್ದಾರೆ ಮತ್ತು 2027ರ ಐಪಿಎಲ್ನಲ್ಲಿ ಮತ್ತೊಮ್ಮೆ ಫ್ರಾಂಚೈಸಿಯ ಜೆರ್ಸಿಯನ್ನು ಧರಿಸುತ್ತಾರೆ ಎಂಬುದನ್ನು ದೃಢಪಡಿಸಿದೆ.
2025ರ ಐಪಿಎಲ್ಗೆ ಮುನ್ನ ರಾಹುಲ್ ಡೆಲ್ಲಿ ಕ್ಯಾಪಿಟಲ್ಸ್ ತಂಡವನ್ನು ₹14 ಕೋಟಿಗೆ ಸೇರಿಕೊಂಡರು. ಅವರು ಫ್ರಾಂಚೈಸಿಯೊಂದಿಗೆ ಎರಡು ಆವೃತ್ತಿಗಳನ್ನು ಆನಂದಿಸಿದ್ದಾರೆ. 2025ರಲ್ಲಿ 539 ರನ್ ಗಳಿಸಿದರು ಮತ್ತು ನಂತರ 2026 ರಲ್ಲಿ 593 ರನ್ ಗಳಿಸಿದ್ದಾರೆ. ಡಿಸಿ ತಂಡಕ್ಕೆ ಸೇರುವ ಮೊದಲು, ರಾಹುಲ್ ಅವರು ಪಂಜಾಬ್ ಕಿಂಗ್ಸ್ ತಂಡದ ನಾಯಕರಾಗಿದ್ದರು ಮತ್ತು ನಂತರ ಮೂರು ಆವೃತ್ತಿಗಳಲ್ಲಿ ಲಕ್ನೋ ಸೂಪರ್ ಜೈಂಟ್ಸ್ ತಂಡವನ್ನು ಮುನ್ನಡೆಸಿದರು.
ಮುಂಬೈ ಜೊತೆಗೆ ಹಾರ್ದಿಕ್?
ಕಳೆದ ಕೆಲವು ತಿಂಗಳುಗಳಿಂದ ಕೇಳಿಬರುತ್ತಿರುವ ಟ್ರೇಡ್ ವದಂತಿಗಳ ನಂತರ, ಸ್ಟಾರ್ ಆಲ್ರೌಂಡರ್ ಹಾರ್ದಿಕ್ ಪಾಂಡ್ಯ ಮುಂಬೈ ಇಂಡಿಯನ್ಸ್ (MI) ನಲ್ಲಿ ನಾಯಕತ್ವವಿಲ್ಲದೆ ಇನ್ನೂ ಒಂದು ವರ್ಷ ಉಳಿಯಬಹುದು ಎಂದು ವರದಿಯಾಗಿದೆ.
ವರದಿಗಳ ಪ್ರಕಾರ, ಹಾರ್ದಿಕ್ ಒಳಗೊಂಡ ವ್ಯಾಪಾರ ಮಾತುಕತೆಗಳು ಇನ್ನೂ ಕಾರ್ಯರೂಪಕ್ಕೆ ಬಂದಿಲ್ಲ, MI ತನಗೆ ಸರಿಹೊಂದುವಂತಹ ಒಪ್ಪಂದವನ್ನು ಕಂಡುಕೊಂಡಿಲ್ಲ. ಆದ್ದರಿಂದ, ಹಾರ್ದಿಕ್ IPL 2027 ಗಾಗಿ ಫ್ರಾಂಚೈಸಿಯೊಂದಿಗೆ ಉಳಿಯುವ ಸಾಧ್ಯತೆಯಿದೆ ಎನ್ನಲಾಗಿದೆ. ಆದಾಗ್ಯೂ, ಫ್ರಾಂಚೈಸಿ ನಾಯಕತ್ವ ಬದಲಾವಣೆಗೆ ಸಜ್ಜಾಗಿದ್ದು, ರೋಹಿತ್ ಶರ್ಮಾ ಈ ನಿರ್ಧಾರ ತೆಗೆದುಕೊಳ್ಳುವಲ್ಲಿ ಹೆಚ್ಚು ತೊಡಗಿಸಿಕೊಂಡಿದ್ದಾರೆ ಎಂದು ತಿಳಿದುಬಂದಿದೆ.
