ನವದೆಹಲಿ: ಭಾರತದ ಯುವ ಬ್ಯಾಟಿಂಗ್ ಪ್ರತಿಭೆ ವೈಭವ್ ಸೂರ್ಯವಂಶಿ ಈಗಲೇ ಟೀಂ ಇಂಡಿಯಾದ ಪ್ಲೇಯಿಂಗ್‌ 11 ರಲ್ಲಿ ಸ್ಥಾನ ಪಡೆಯಲು ನಾಯಕ ಶ್ರೇಯಸ್ ಅಯ್ಯರ್ ಅಡ್ಡಗಾಲು ಹಾಕಿದ್ದಾರೆ ಎನ್ನಲಾಗಿದೆ.
ಪ್ರಸ್ತುತ ಟಿ20 ಕ್ರಿಕೆಟ್ ನಲ್ಲಿ ಆರಂಭಿಕರಾದ ಅಭಿಷೇಕ್ ಶರ್ಮಾ ಮತ್ತು ಸಂಜು ಸ್ಯಾಮ್ಸನ್ ಸತತವಾಗಿ ಉತ್ತಮ ಪ್ರದರ್ಶನ ನೀಡುತ್ತಿದ್ದು, ಇದೇ ಕಾರಣಕ್ಕೆ ನಾಯಕ ಶ್ರೇಯಸ್ ಅಯ್ಯರ್ ವೈಭವ್‌ಗೆ ಮುಂದಿನ ದಿನಗಳಲ್ಲಿ ಅವಕಾಶಗಳು ಸಿಗಲಿವೆ ಎಂದು ಹೇಳಿದ್ದಾರೆ.
ನ್ಯೂಜಿಲೆಂಡ್ ವಿರುದ್ಧದ ಐದು ಪಂದ್ಯಗಳ ಟಿ20 ಸರಣಿಗೂ ಮುನ್ನ ಬುಧವಾರ ಮಾತನಾಡಿದ ಅಯ್ಯರ್, ವೈಭವ್ ಸೂರ್ಯವಂಶಿ ಇನ್ನೂ ಚಿಕ್ಕ ವಯಸ್ಸಿನ ಆಟಗಾರನಾಗಿದ್ದು, ತನ್ನ ಸಾಮರ್ಥ್ಯ ಸಾಬೀತುಪಡಿಸಲು ಆತನಿಗೆ ಸಾಕಷ್ಟು ಸಮಯವಿದೆ ಎಂದರು.
“ಸೂರ್ಯವಂಶಿಯಂತಹ ಪ್ರತಿಭಾವಂತ ಆಟಗಾರ ಡ್ರೆಸ್ಸಿಂಗ್ ರೂಮ್‌ನಲ್ಲಿ ಯಾವಾಗಲೂ ಸಂತೋಷದಿಂದ ಇರಬೇಕು ಎಂಬುದು ಮುಖ್ಯ. ಆತ ಇನ್ನೂ ತುಂಬಾ ಚಿಕ್ಕವನು. ಅವಕಾಶಗಳನ್ನು ಪಡೆಯಲು ಆತನ ಮುಂದೆ ಹಲವು ವರ್ಷಗಳಿವೆ. ಈಗಲೇ ಆತ ತಂಡದೊಳಗೆ ನೇರವಾಗಿ ಸ್ಥಾನ ಪಡೆಯಲು ಸಾಧ್ಯವಿಲ್ಲ. ಏಕೆಂದರೆ ನಮ್ಮ ಆರಂಭಿಕ ಆಟಗಾರರು ಸತತವಾಗಿ ರನ್ ಗಳಿಸುತ್ತಿದ್ದಾರೆ ಮತ್ತು ಅವರು ವಿಶ್ವಕಪ್ ಗೆಲ್ಲಿಸಿಕೊಟ್ಟಿದ್ದಾರೆ” ಎಂದು ಅಯ್ಯರ್ ತಿಳಿಸಿದರು.
ಅಭಿಷೇಕ್, ಸಂಜು ಉತ್ತಮ ಫಾರ್ಮ್‌ನಲ್ಲಿರುವುದೇ ಅಡ್ಡಿ!
ಈ ವರ್ಷದ ಆರಂಭದಲ್ಲಿ ಇಂಗ್ಲೆಂಡ್ ಮತ್ತು ಐರ್ಲೆಂಡ್ ಪ್ರವಾಸಗಳಿಗೆ ಆಯ್ಕೆಯಾದ ಬಳಿಕ ವೈಭವ್ ಸೂರ್ಯವಂಶಿ ಭಾರತ ಆಡಿರುವ ಒಟ್ಟು 21 ಟಿ20 ಪಂದ್ಯಗಳ ಪೈಕಿ ಕೇವಲ ಎಂಟು ಪಂದ್ಯಗಳಲ್ಲಿ ಮಾತ್ರ ಆಡಿದ್ದಾರೆ. ಅಭಿಷೇಕ್ ಶರ್ಮಾ ಮತ್ತು ಸಂಜು ಸ್ಯಾಮ್ಸನ್ ಆರಂಭಿಕರಾಗಿ ನಿರಂತರವಾಗಿ ಉತ್ತಮ ಪ್ರದರ್ಶನ ನೀಡುತ್ತಿರುವುದರಿಂದ ವೈಭವ್‌ಗೆ ಹೆಚ್ಚಿನ ಅವಕಾಶಗಳು ಸಿಕ್ಕಿಲ್ಲ. ಮಾತ್ರವಲ್ಲದೇ ಈ ವರ್ಷದ ಟಿ20 ವಿಶ್ವಕಪ್ ಪ್ರಶಸ್ತಿಯನ್ನು ಭಾರತ ಉಳಿಸಿಕೊಳ್ಳುವಲ್ಲಿಯೂ ಅಭಿಷೇಕ್ ಮತ್ತು ಸಂಜು ಪ್ರಮುಖ ಪಾತ್ರ ವಹಿಸಿದ್ದರು.
ಏಷ್ಯನ್ ಗೇಮ್ಸ್‌ನಲ್ಲಿ ವೈಭವ್‌ಗೆ ಆರಂಭಿಕನಾಗಿ ಆಡುವ ಅವಕಾಶ ಕಲ್ಪಿಸಲು ಸಂಜು ಸ್ಯಾಮ್ಸನ್ ಮೂರನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್ ಮಾಡಿದ್ದರು.
ವಿದೇಶಿ ಪಿಚ್‌ಗಳ ಅನುಭವ ಭವಿಷ್ಯಕ್ಕೆ ನೆರವು
ವಿದೇಶಿ ನೆಲದಲ್ಲಿ ಆಡುವ ಅನುಭವವು ವೈಭವ್ ಸೂರ್ಯವಂಶಿಗೆ ಭವಿಷ್ಯದ ಸರಣಿಗಳಿಗೆ ಸಿದ್ಧತೆ ಮಾಡಿಕೊಳ್ಳಲು ಸಹಾಯ ಮಾಡಲಿದೆ ಎಂದು ಅಯ್ಯರ್ ಅಭಿಪ್ರಾಯಪಟ್ಟಿದ್ದಾರೆ.
“ವಿದೇಶಕ್ಕೆ ಬಂದಾಗ ಇಲ್ಲಿನ ಪಿಚ್‌ಗಳಲ್ಲಿ ಹೇಗೆ ಆಡಬೇಕು ಎಂಬುದರ ಬಗ್ಗೆ ಆತನಿಗೆ ಸ್ಪಷ್ಟ ಅರಿವು ಸಿಗುತ್ತದೆ. ಮುಂದಿನ ಬಾರಿ ಇಂತಹ ಪರಿಸ್ಥಿತಿಗಳಲ್ಲಿ ಆಡಲು ಬಂದಾಗ ಆತ ಉತ್ತಮವಾಗಿ ಸಿದ್ಧನಾಗಿರುತ್ತಾನೆ. ಅಲ್ಲದೆ, ಮೊದಲ ಬಾರಿಗೆ ಇಲ್ಲಿಗೆ ಬರುವ ಇತರ ಆಟಗಾರರಿಗೂ ಇಲ್ಲಿನ ಪರಿಸ್ಥಿತಿಗಳ ಬಗ್ಗೆ ಸಲಹೆ ನೀಡಲು ಸಾಧ್ಯವಾಗುತ್ತದೆ” ಎಂದು ಅಯ್ಯರ್ ಹೇಳಿದರು.
ಸತತ ಸರಣಿಗಳ ಒತ್ತಡದ ನಡುವೆಯೂ ಭಾರತ ಸಿದ್ಧ
ಅಫ್ಘಾನಿಸ್ತಾನ ಮತ್ತು ವೆಸ್ಟ್ ಇಂಡೀಸ್ ವಿರುದ್ಧದ ತವರಿನ ಸರಣಿಗಳು ಹಾಗೂ ಏಷ್ಯನ್ ಗೇಮ್ಸ್‌ನಲ್ಲಿ ಭಾಗವಹಿಸಿದ ಬಳಿಕ ಭಾರತ ತಂಡ ನ್ಯೂಜಿಲೆಂಡ್‌ಗೆ ಆಗಮಿಸಿದೆ. ಸತತ ಪಂದ್ಯಗಳು ಮತ್ತು ಪ್ರಯಾಣದ ನಡುವೆಯೂ ಹೊಸ ಪರಿಸ್ಥಿತಿಗಳಿಗೆ ಹೊಂದಿಕೊಳ್ಳುವುದು ತಂಡಕ್ಕೆ ಸವಾಲಾಗಿದೆ. ಈ ಹಿಂದೆ ಅಫ್ಘಾನಿಸ್ತಾನ ವಿರುದ್ಧದ ಸರಣಿಯ ಬಳಿಕ ಐರ್ಲೆಂಡ್‌ಗೆ ತೆರಳಿ ಪಂದ್ಯಗಳನ್ನು ಆಡಿದ್ದನ್ನು ಸ್ಮರಿಸಿದ ಅಯ್ಯರ್, ಪ್ರಯಾಣ ಮತ್ತು ಹೊಸ ಪರಿಸ್ಥಿತಿಗಳಿಗೆ ಹೊಂದಿಕೊಳ್ಳುವುದು ಆಟದ ಭಾಗವಾಗಿದೆ ಎಂದರು.
“ನಾವು ಈ ಹಿಂದೆ ಇಂತಹ ವೇಳಾಪಟ್ಟಿಯನ್ನು ಎದುರಿಸಿದ್ದೇವೆ. ಅಫ್ಘಾನಿಸ್ತಾನ ಸರಣಿಯ ಬಳಿಕ ಐರ್ಲೆಂಡ್‌ಗೆ ತೆರಳಿ ಕೆಲವು ಪಂದ್ಯಗಳನ್ನು ಆಡಿದ್ದೆವು. ಪ್ರಯಾಣ ಮಾಡುವುದು, ಪಂದ್ಯಗಳನ್ನು ಆಡುವುದು ಮತ್ತು ಹೊಸ ಪರಿಸ್ಥಿತಿಗಳಿಗೆ ಹೊಂದಿಕೊಳ್ಳುವುದು ಖುಷಿಯ ವಿಚಾರವೂ ಹೌದು. ನಾವು ಕಾರಣಗಳನ್ನು ಬದಿಗಿಟ್ಟು ಪಂದ್ಯವನ್ನು ಹೇಗೆ ಗೆಲ್ಲಬೇಕು ಎಂಬುದರ ಬಗ್ಗೆ ಯೋಚಿಸುತ್ತಿದ್ದೇವೆ. ಡ್ರೆಸ್ಸಿಂಗ್ ರೂಮ್‌ನಲ್ಲಿ ನಡೆಯುತ್ತಿರುವ ಚರ್ಚೆಯೂ ಇದೇ” ಎಂದು ಅವರು ತಿಳಿಸಿದರು.
ನ್ಯೂಜಿಲೆಂಡ್ ಪಿಚ್‌ಗಳಿಗೆ ಹೊಂದಿಕೊಳ್ಳುವುದು ಮುಖ್ಯ
ತವರಿನಲ್ಲಿ ಸಾಮಾನ್ಯವಾಗಿ ಬ್ಯಾಟಿಂಗ್‌ಗೆ ಅನುಕೂಲಕರವಾದ ಪಿಚ್‌ಗಳಲ್ಲಿ ಆಡುವ ಭಾರತ ತಂಡ, ನ್ಯೂಜಿಲೆಂಡ್‌ನ ವೇಗದ ಬೌಲರ್‌ಗಳಿಗೆ ನೆರವಾಗುವ ಪಿಚ್‌ಗಳು ಮತ್ತು ಚಳಿಯ ವಾತಾವರಣಕ್ಕೆ ಶೀಘ್ರವಾಗಿ ಹೊಂದಿಕೊಳ್ಳಬೇಕಿದೆ. “ಇಲ್ಲಿನ ಪರಿಸ್ಥಿತಿಗಳು ವೇಗದ ಬೌಲಿಂಗ್‌ಗೆ ಹೆಚ್ಚು ಅನುಕೂಲಕರವಾಗಿವೆ. ಆದರೆ, ಪರಿಸ್ಥಿತಿಗಳು ಸಂಪೂರ್ಣವಾಗಿ ವಿಭಿನ್ನವಾಗಿವೆ ಎಂದೇನಿಲ್ಲ. ಇಂಗ್ಲೆಂಡ್‌ನಲ್ಲಿ ನಾವು ಆಡಿದಾಗ ನಮ್ಮ ಬ್ಯಾಟಿಂಗ್‌ಗೆ ಅನುಕೂಲವಾಗುವ ರೀತಿಯಲ್ಲಿ ಪಿಚ್‌ಗಳನ್ನು ಸಿದ್ಧಪಡಿಸಲಾಗಿತ್ತು. ಆದರೆ, ಯಾವುದೇ ದಿನ ಪಿಚ್ ಹೇಗೆ ವರ್ತಿಸುತ್ತದೆ ಎಂಬುದನ್ನು ಯಾರಿಂದಲೂ ಖಚಿತವಾಗಿ ಹೇಳಲು ಸಾಧ್ಯವಿಲ್ಲ” ಎಂದು ಅಯ್ಯರ್ ಹೇಳಿದರು.
ತಂಡದ ಆಟಗಾರರು ಸಾಧ್ಯವಾದಷ್ಟು ಬೇಗ ಪರಿಸ್ಥಿತಿಗಳಿಗೆ ಹೊಂದಿಕೊಂಡು, ಉತ್ತಮ ಅಭ್ಯಾಸದ ಮೂಲಕ ಪಂದ್ಯಕ್ಕೆ ಸಿದ್ಧರಾಗಲಿದ್ದಾರೆ ಎಂದರು. ನ್ಯೂಜಿಲೆಂಡ್ ತಂಡಕ್ಕೆ ತವರಿನ ಪರಿಸ್ಥಿತಿಗಳ ಪರಿಚಯವಿರುವುದು ಅನುಕೂಲವಾಗಲಿದೆ ಎಂದೂ ಅಯ್ಯರ್ ಒಪ್ಪಿಕೊಂಡರು. ವಿವಿಧ ಪಿಚ್‌ಗಳಲ್ಲಿ ಹೇಗೆ ಆಡಬೇಕು ಎಂಬ ಅರಿವು ಆತಿಥೇಯ ತಂಡಕ್ಕಿರುವುದೇ ಪ್ರಮುಖ ವ್ಯತ್ಯಾಸ ಎಂದು ಅವರು ಹೇಳಿದರು.
ತಂಡದ ಆಯ್ಕೆಯ ಪೈಪೋಟಿ ತಲೆನೋವು
ಭಾರತ ತಂಡದಲ್ಲಿ ಸಾಕಷ್ಟು ಪ್ರತಿಭಾವಂತ ಆಟಗಾರರಿರುವುದರಿಂದ ಪ್ಲೇಯಿಂಗ್‌ 11ರಲ್ಲಿ ಸ್ಥಾನ ಪಡೆಯಲು ತೀವ್ರ ಪೈಪೋಟಿ ಇದೆ. ಇದನ್ನು ಸಿಹಿ ತಲೆನೋವು ಎಂದು ಬಣ್ಣಿಸಿದ ಅಯ್ಯರ್, ಈ ಸ್ಪರ್ಧೆಯು ಆಟಗಾರರನ್ನು ನಿರಂತರವಾಗಿ ಉತ್ತಮ ಪ್ರದರ್ಶನ ನೀಡಲು ಪ್ರೇರೇಪಿಸುತ್ತದೆ ಎಂದರು.
ತಮ್ಮ ಬ್ಯಾಟಿಂಗ್ ಕ್ರಮಾಂಕದ ಬಗ್ಗೆಯೂ ಮಾತನಾಡಿದ ಅವರು, ಸದ್ಯ ಮೂರನೇ ಕ್ರಮಾಂಕದಲ್ಲಿ ಇಶಾನ್ ಕಿಶನ್ ಉತ್ತಮವಾಗಿ ಆಡುತ್ತಿರುವುದರಿಂದ ತಾವು ಮೇಲಿನ ಕ್ರಮಾಂಕಕ್ಕೆ ಬಡ್ತಿ ಪಡೆಯುವ ಸಾಧ್ಯತೆಯನ್ನು ಕಾಣುತ್ತಿಲ್ಲ ಎಂದರು.
“ತಂಡಕ್ಕೆ ಯಾವ ಸಂದರ್ಭದಲ್ಲಿ ಏನು ಅಗತ್ಯವಿದೆ ಎಂಬುದರ ಆಧಾರದಲ್ಲಿ ಆಟಗಾರರು ಹೊಂದಿಕೊಳ್ಳಬೇಕು. ಕೆಳ ಕ್ರಮಾಂಕದಲ್ಲಿ ಬ್ಯಾಟಿಂಗ್ ಮಾಡುವ ಕೆಲ ಆಟಗಾರರು ಅಲ್ಲಿ ಹೆಚ್ಚು ಆಕ್ರಮಣಕಾರಿಯಾಗಿ ಆಡಲು ಸಾಧ್ಯವಾಗುವುದಿಲ್ಲ. ನಾನು ಯಾವುದೇ ಕ್ರಮಾಂಕದಲ್ಲೂ ಬ್ಯಾಟಿಂಗ್ ಮಾಡಬಲ್ಲೆ. ಪಂದ್ಯದ ಪರಿಸ್ಥಿತಿಯನ್ನು ಆಧರಿಸಿ ಅದು ನಿರ್ಧಾರವಾಗುತ್ತದೆ” ಎಂದು ಅಯ್ಯರ್ ಹೇಳಿದರು.
ಕಳೆದ ಟಿ20 ವಿಶ್ವಕಪ್‌ನಲ್ಲಿ ಇಶಾನ್ ಕಿಶನ್ ನಿರಂತರವಾಗಿ ಮೂರನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್ ಮಾಡಿದ್ದರು. ಸದ್ಯ ಅವರು ಉತ್ತಮ ಪ್ರದರ್ಶನ ನೀಡುತ್ತಿರುವುದರಿಂದ ತಾವು ಮೇಲಿನ ಕ್ರಮಾಂಕಕ್ಕೆ ಹೋಗುವ ಅಗತ್ಯವಿಲ್ಲ ಎಂದು ಅಯ್ಯರ್ ಸ್ಪಷ್ಟಪಡಿಸಿದರು.
