Heart Health Benefits: ನಾವು ದಿನಾ ಅಡುಗೆಗೆ ಬಳಸುವ ಎಣ್ಣೆಯೇ ಹೃದಯದ ಆರೋಗ್ಯವನ್ನು ನಿರ್ಧರಿಸುತ್ತದೆ. ಬೆಳಿಗ್ಗೆ ಮಾಡುವ ದೋಸೆಯಿಂದ ಹಿಡಿದು ಮಧ್ಯಾಹ್ನದ ಸಾಂಬಾರ್, ಸಂಜೆಯ ಪಲ್ಯದವರೆಗೆ ಪ್ರತಿ ಅಡುಗೆಯಲ್ಲೂ ಎಣ್ಣೆ ಇರುತ್ತದೆ. ಮಾರುಕಟ್ಟೆಯಲ್ಲಿ ಶೇಂಗಾ ಎಣ್ಣೆ, ಸೂರ್ಯಕಾಂತಿ ಎಣ್ಣೆ, ಆಲಿವ್ ಎಣ್ಣೆ, ತೆಂಗಿನ ಎಣ್ಣೆ, ಸಾಸಿವೆ ಎಣ್ಣೆ ಹೀಗೆ ಹಲವು ಎಣ್ಣೆಗಳಿವೆ. ನೋಡಲು ಎಲ್ಲಾ ಎಣ್ಣೆಯೂ ಒಂದೇ ರೀತಿ ಕಂಡರೂ ಒಳಗಿನ ಕೊಬ್ಬಿನ ಗುಣ ಒಂದೇ ಅಲ್ಲ. ಕೆಲವು ಎಣ್ಣೆಗಳಲ್ಲಿ ಹೃದಯಕ್ಕೆ ಒಳ್ಳೆಯ ಕೊಬ್ಬು ಹೆಚ್ಚಿದ್ದರೆ, ಕೆಲವು ಎಣ್ಣೆಗಳಲ್ಲಿ ಕೆಟ್ಟ ಕೊಬ್ಬು ಹೆಚ್ಚಿರುತ್ತದೆ. ಯಾವ ಎಣ್ಣೆಯಲ್ಲಿ ಕೆಟ್ಟ ಕೊಬ್ಬು ಕಡಿಮೆ, ಒಳ್ಳೆಯ ಕೊಬ್ಬು ಹೆಚ್ಚು ಎಂದು ತಿಳಿದುಕೊಂಡು ಬಳಸಿದರೆ ಹೃದಯವನ್ನು ಕಾಪಾಡಿಕೊಳ್ಳಬಹುದು. ಹಾಗಾದರೆ ಹೃದಯಕ್ಕೆ ನಿಜವಾಗಿಯೂ ಯಾವ ಎಣ್ಣೆ ಉತ್ತಮ, ಯಾವುದನ್ನು ಕಡಿಮೆ ಮಾಡಬೇಕು ಎಂಬುದನ್ನು ತಿಳಿಯೋಣ:
ಹೃದಯದ ಆರೋಗ್ಯಕ್ಕೆ ಯಾವ ಎಣ್ಣೆ ಉತ್ತಮ?
ಆಲಿವ್ ಎಣ್ಣೆ - ಹೃದಯಕ್ಕೆ ನಂಬರ್ 1
ಹೃದಯದ ಆರೋಗ್ಯಕ್ಕೆ ವಿಶ್ವದಾದ್ಯಂತ ಡಾಕ್ಟರ್ ಗಳು ಮೊದಲು ಸೂಚಿಸುವ ಎಣ್ಣೆ ಎಕ್ಸ್ಟ್ರಾ ವರ್ಜಿನ್ ಆಲಿವ್ ಎಣ್ಣೆ. ಇದರಲ್ಲಿ ಮೊನೊ ಅನ್ ಸ್ಯಾಚುರೇಟೆಡ್ ಕೊಬ್ಬು ಹೆಚ್ಚು ಇರುತ್ತದೆ. ಇದು ಕೆಟ್ಟ ಕೊಲೆಸ್ಟ್ರಾಲ್ ಅನ್ನು ಕಡಿಮೆ ಮಾಡಿ, ಒಳ್ಳೆಯ ಕೊಲೆಸ್ಟ್ರಾಲ್ ಅನ್ನು ಹೆಚ್ಚಿಸುತ್ತದೆ. ಸಲಾಡ್, ಸಣ್ಣ ಉರಿಯಲ್ಲಿ ಅಡುಗೆಗೆ ಇದು ಬೆಸ್ಟ್. ಆದರೆ ಜಾಸ್ತಿ ಕಾಯಿಸಲು, ಕರಿಯಲು ಇದು ಸೂಕ್ತವಲ್ಲ.
ಸಾಸಿವೆ ಎಣ್ಣೆ - ನಮ್ಮ ಮನೆಗೆ ಬೆಸ್ಟ್
ಉತ್ತರ ಭಾರತದಲ್ಲಿ ಜಾಸ್ತಿ ಬಳಸುವ ಸಾಸಿವೆ ಎಣ್ಣೆ ಹೃದಯಕ್ಕೆ ತುಂಬಾ ಒಳ್ಳೆಯದು. ಇದರಲ್ಲಿ ಒಮೆಗಾ 3 ಮತ್ತು ಒಮೆಗಾ 6 ಸರಿಯಾದ ಪ್ರಮಾಣದಲ್ಲಿರುತ್ತದೆ. ರಕ್ತದೊತ್ತಡ ಮತ್ತು ಕೊಲೆಸ್ಟ್ರಾಲ್ ನಿಯಂತ್ರಣಕ್ಕೆ ಇದು ಸಹಾಯ ಮಾಡುತ್ತದೆ. ಸ್ವಲ್ಪ ಖಾರದ ವಾಸನೆ ಇರುತ್ತದೆ, ಆದರೆ ಬಿಸಿ ಮಾಡಿದರೆ ಹೋಗುತ್ತದೆ. ಕರ್ನಾಟಕದ ಅಡುಗೆಗೂ ಇದು ಹೊಂದುತ್ತದೆ.
ಶೇಂಗಾ ಎಣ್ಣೆ ಮತ್ತು ಎಳ್ಳೆಣ್ಣೆ - ಮಧ್ಯಮ ಆಯ್ಕೆ
ನಮ್ಮ ಕರ್ನಾಟಕದಲ್ಲಿ ಹೆಚ್ಚು ಬಳಸುವ ಶೇಂಗಾ ಎಣ್ಣೆ ಮತ್ತು ಎಳ್ಳೆಣ್ಣೆ ಹೃದಯಕ್ಕೆ ಮಧ್ಯಮ ಒಳ್ಳೆಯದು. ಶೇಂಗಾ ಎಣ್ಣೆಯಲ್ಲಿ ಮೊನೊ ಅನ್ ಸ್ಯಾಚುರೇಟೆಡ್ ಕೊಬ್ಬು ಇರುತ್ತದೆ, ಹೈ ಹೀಟ್ ನಲ್ಲಿ ಕರಿಯಲೂ ಬರುತ್ತದೆ. ಎಳ್ಳೆಣ್ಣೆಯಲ್ಲಿ ಉತ್ಕರ್ಷಣ ನಿರೋಧಕಗಳು ಜಾಸ್ತಿ, ಹೃದಯ ಮತ್ತು ಮೂಳೆಗಳಿಗೆ ಒಳ್ಳೆಯದು. ಆದರೆ ಇವೆರಡನ್ನೂ ಜಾಸ್ತಿ ಪ್ರಮಾಣದಲ್ಲಿ ಬಳಸಬಾರದು.
ಸೂರ್ಯಕಾಂತಿ ಮತ್ತು ಕುಸುಬೆ ಎಣ್ಣೆ - ಎಚ್ಚರಿಕೆಯಿಂದ ಬಳಸಿ
ಸೂರ್ಯಕಾಂತಿ ಎಣ್ಣೆ ರಿಫೈನ್ಡ್ ಆಗಿರುವುದರಿಂದ ಅದರಲ್ಲಿ ಪೋಷಕಾಂಶಗಳು ಕಡಿಮೆ. ಪ್ರತಿದಿನ ಇದನ್ನೇ ಬಳಸಿದರೆ ದೇಹದಲ್ಲಿ ಉರಿಯೂತ ಹೆಚ್ಚಾಗಬಹುದು. ಕುಸುಬೆ ಎಣ್ಣೆಯಲ್ಲಿ ಒಳ್ಳೆಯ ಕೊಬ್ಬು ಇದ್ದರೂ ಜಾಸ್ತಿ ಬಿಸಿ ಮಾಡಿದರೆ ಅದು ಕೆಟ್ಟದಾಗುತ್ತದೆ. ಇವನ್ನು ತಿಂಗಳಿಗೊಮ್ಮೆ ಬದಲಾಯಿಸಿ ಬಳಸುವುದು ಒಳ್ಳೆಯದು.
ತೆಂಗಿನ ಎಣ್ಣೆ ಮತ್ತು ಪಾಮ್ ಎಣ್ಣೆ - ಹೃದಯಕ್ಕೆ ಕಡಿಮೆ ಒಳ್ಳೆಯದು
ತೆಂಗಿನ ಎಣ್ಣೆ ಮತ್ತು ಪಾಮ್ ಎಣ್ಣೆಯಲ್ಲಿ ಸ್ಯಾಚುರೇಟೆಡ್ ಕೊಬ್ಬು ತುಂಬಾ ಜಾಸ್ತಿ. ಇದು ಕೊಲೆಸ್ಟ್ರಾಲ್ ಅನ್ನು ಹೆಚ್ಚಿಸಿ ಹೃದಯದ ಕಾಯಿಲೆಗೆ ಕಾರಣವಾಗಬಹುದು. ಹೃದಯ ಸಮಸ್ಯೆ, ಶುಗರ್, ಬಿಪಿ ಇರುವವರು ಇವನ್ನು ತಪ್ಪಿಸುವುದು ಒಳ್ಳೆಯದು. ಕೂದಲಿಗೆ, ಮೈಗೆ ಹಚ್ಚಲು ತೆಂಗಿನ ಎಣ್ಣೆ ಬೆಸ್ಟ್, ಆದರೆ ಅಡುಗೆಗೆ ದಿನಾ ಬಳಸಬೇಡಿ.
