ತುಮಕೂರು: ದೇವರಾಯನ ದುರ್ಗದ ನಾಮದ ಚಿಲುಮೆ ಪಾರ್ಕ್‌ನಲ್ಲಿ ಪ್ರೇಮಿಗಳ ಮೇಲೆ ಹಲ್ಲೆ ನಡೆಸಿದ್ದ ಪ್ರಕರಣಕ್ಕೆ ಸಂಬಂಧಿಸಿದಂತೆ ಕ್ಯಾತ್ಸಂದ್ರ ಪೊಲೀಸರು ಐವರು ಆರೋಪಿಗಳನ್ನು ಬಂಧಿಸಿದ್ದಾರೆ.
ರಾಕೇಶ್, ಅನ್ಸಾರ್ ಪಾಷಾ, ಗಿರೀಶ್, ಅಂಜನಮೂರ್ತಿ ಮತ್ತು ನಿತಿನ್ ಬಂಧಿತರು. ರಾಕೇಶ್ ಮತ್ತು ಅನ್ಸಾರ್ ಪಾಷಾ ಬೆಂಗಳೂರಿನ ಅತ್ತಿ ಬೆಲೆಯವರು. ಇನ್ನುಳಿದ ಮೂವರು ತುಮಕೂರಿನ ಹೆಗ್ಗರೆಯವರು.ಅತ್ತಿಬೆಲೆಯ ರಾಕೇಶ್ ಮತ್ತು ಅನ್ಸರ್ ಪಾಷಾ ಪ್ರೇಮಿ ಮಂಜುನಾಥ್‌ಗೆ ಚೂರಿಯಿಂದ ಇರಿದಿದ್ದಾರೆ. ಉಳಿದ ಮೂವರು ಈ ಇಬ್ಬರಿಗೆ ಪರೋಕ್ಷವಾಗಿ ಸಹಕಾರ ಮಾಡಿದ್ದಾರೆ. ರಾಕೇಶ್ ಮತ್ತು ಗಿರೀಶ್ ಇಬ್ಬರೂ ತುಮಕೂರಿನ ಕಾಲೇಜೊಂದರಲ್ಲಿ ಕ್ಲಾಸ್‌‌ಮೇಟ್ ಆಗಿದ್ದಾರೆ ಎನ್ನಲಾಗಿದೆ.
ಈ ಐವರು ಈ ಮೊದಲು ಬೆಂಗಳೂರಿನಲ್ಲಿ ಹಲವು ಅಪರಾಧ ಪ್ರಕರಣಗಳಲ್ಲಿ ಭಾಗಿಯಾಗಿದ್ದು ಪೊಲೀಸರ ಕೈಗೆ ಸಿಗದೇ ಜೈಲಿನಿಂದ ಹೊರಗಿದ್ದರು ಎನ್ನಲಾಗಿದೆ. ಬಂಧಿತರಿಂದ ಎರಡು ಮೊಬೈಲ್ ಹಾಗೂ ಕದ್ದಿದ್ದ ಮಂಜುನಾಥ್ ಅವರ ಬೈಕ್ ಅನ್ನು ವಶಪಡಿಸಿಕೊಳ್ಳಲಾಗಿದೆ.
ಗಿರೀಶ ಹಣಕಾಸಿನ ಮುಗ್ಗಟ್ಟಿನಲ್ಲಿ ಸಿಲುಕಿದ್ದ, ಹೀಗಾಗಿ ಹಣಕ್ಕಾಗಿ ಈ ಕೃತ್ಯ ನಡೆಸಿದ್ದಾಗಿ ತಪ್ಪೊಪ್ಪಿಕೊಂಡಿದ್ದಾನೆ.ಹಾಗಾಗಿ ಪರಸ್ಪರ ಸಂಪರ್ಕಕ್ಕೆ ಬಂದು ದರೋಡೆಗೆ ಇಳಿದಿದ್ದಾರೆ. ಗಿರೀಶ್ ಕೃತ್ಯದ ಮಾಸ್ಟರ್ ಮೈಂಡ್ ಆಗಿದ್ದಾನೆ. ಮನೆ ಸಾಲ ಹಾಗೂ ಸ್ನೇಹಿತರ ಮದುವೆಗೆ ದುಡ್ಡು ಹೊಂದಿಸಲು ಈ ಕೃತ್ಯಕ್ಕೆ ಕೈ ಹಾಕಿದ್ದಾರೆ ಎಂದು ಆರೋಪಿಗಳು ಬಾಯಿಬಿಟ್ಟಿದ್ದಾರೆ.
