ಬ್ರೌನ್ ಶುಗರ್ ಮಾರಾಟ ಮಾಡುತ್ತಿದ್ದ ಮೂವರ ಬಂಧನ

ಬೆಂಗಳೂರು: ಬ್ರೌನ್ ಶುಗರ್ ಮಾರಾಟ ಮಾಡುಲು ಯತ್ನಿಸುತ್ತಿದ್ದ ಮೂವರು ಆರೋಪಿಗಳನ್ನು ಪರಪ್ಪನ ಆಗ್ರಹಾರ ಪೊಲೀಸರು ಶುಕ್ರವಾರ ಬಂಧಿಸಿದ್ದಾರೆ. 

ಆರೋಪಿಗಳಿಂದ ಸುಮಾರು 1 ಕೋಟಿ ಮೌಲ್ಯದ 940 ಗ್ರಾಂ ಬ್ರೌನ್ ಶುಗರನ್ನು ವಶಪಡಿಸಿಕೊಳ್ಳಲಾಗಿದೆ. ತಮಿಳುನಾಡಿನ ಕೃಷ್ಣಗಿರಿ ಮೂಲದವರಾದ ಮುರುಗನ್(42), ಸೀನಾ(32) ಮತ್ತು ಪಳನಿ ಅಲಿಯಾನ್ ಸುಬ್ರಮಣಿ(30) ಬಂಧಿತ ಆರೋಪಿಗಳು. 

ಹೋಸೂರು ರಸ್ತೆಯಲ್ಲಿರುವ ಕಾಲೇಜು ವಿದ್ಯಾರ್ಥಿಗಳಿಗೆ ಬ್ರೌನ್ ಶುಗರ್ ಮಾರಾಟ ಮಾಡಲು ಯತ್ನಿಸುತ್ತಿದ್ದ ವೇಳೆ ಆರೋಪಿಗಳನ್ನು ಬಂಧಿಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಆರೋಪಿಗಳ ವಿಚಾರಣೆ ವೇಳೆ, ಡ್ರಗ್ಸ್ ಮಾರಾಟದ ಬಗ್ಗೆ ಬಾಯ್ಬಿಟ್ಟಿದ್ದಾರೆ. ಬಂಧಿತ ಪಳನಿ ಈ ಹಿಂದೆ ಕುವೈತ್ ನಲ್ಲಿ ಕ್ಯಾಬ್ ಚಾಲಕನಾಗಿ ಕೆಲಸ ಮಾಡುತ್ತಿದ್ದ. ಇತ್ತೀಚೆಗೆ ತಮಿಳುನಾಡಿಗೆ ಬಂದು ಅಲ್ಲಿ ಬೇಕರಿಯೊಂದರಲ್ಲಿ ಕೆಲಸ ಮಾಡುತ್ತಿದ್ದ. ಪಳನಿ ಚಾಲಕನಾಗಿದ್ದ ವೇಳೆ ಆತನ ಕಾರಿನಲ್ಲಿ ಹಲವು ಬಾರಿ ಸಂಚರಿಸಿದ್ದ ದುಬೈ ಮೂಲದ ರಾಜು ಎಂಬಾತ ಪರಿಚಯವಾಗಿತ್ತು. 

ಕೆಲ ದಿನಗಳ ಹಿಂದೆ ಪಳನಿಗೆ ಕರೆ ಮಾಡಿದ ರಾಜು, ತನಗೆ ಸೇರಿದ ಬಟ್ಟೆ ಬ್ಯಾಗ್ ವೊಂದು ತಮಿಳುನಾಡಿನಲ್ಲಿ ಇದ್ದು, ನನ್ನ ಸ್ನೇಹಿತ ಅದನ್ನು ನಿನಗೆ ಕೊಡುತ್ತಾನೆ. ಆ ಬ್ಯಾಗನ್ನು ತನಗೆ ತಲುಪಿಸುವಂತೆ ಕೋರಿದ್ದಾನೆ. ಅದಕ್ಕೆ ಒಪ್ಪಿದ ಪಳನಿ ಸ್ನೇಹಿತನಿಂದ ಬ್ಯಾಗ್ ತೆಗೆದುಕೊಂಡಿದ್ದಾನೆ. ನಂತರ ಅದನ್ನು ತೆಗೆದು ನೋಡಿದಾಗ, ಬ್ರೌನ್ ಶುಗರ್ ಇರುವುದು ತಿಳಿದು ಬಂದಿದೆ. ನಂತರ ಈ ಬಗ್ಗೆ ತನ್ನ ಸ್ನೇಹಿತರಿಗೆ ಈ ಬಗ್ಗೆ ಮಾಹಿತಿ ನೀಡಿ, ಅದನ್ನು ಮಾರಾಟ ಮಾಡಲು ಮುಂದಾಗಿದ್ದಾಗಿ ತಿಳಿಸಿದ್ದಾರೆ.