ಬೆಂಗಳೂರು: ಒಲಾ ಕ್ಯಾಬ್ ಚಾಲಕನಿಂದ ಯುವತಿಗೆ ಲೈಂಗಿಕ ಕಿರುಕುಳ, ಸೇವೆಯಿಂದ ತಾತ್ಕಾಲಿಕ ವಜಾ

ಬೆಂಗಳೂರು: ಕಳೆದ ಭಾನುವಾರ ರಾತ್ರಿ ಒಲಾ ಕ್ಯಾಬ್ ನಲ್ಲಿ ಪ್ರಯಾಣಿಸಿದ 23 ವರ್ಷದ ಫ್ಯಾಶನ್ ವಿನ್ಯಾಸಗಾರ್ತಿ ಯುವತಿಗೆ ಒಲಾ ಕ್ಯಾಬ್ ಚಾಲಕ ಯುವತಿಗೆ ಲೈಂಗಿಕ ಕಿರುಕುಳ ನೀಡಿದ ಘಟನೆ ನಡೆದಿದೆ. ಅಲ್ಲದೆ ಮರುದಿನ ಆಕೆಗೆ ಹಲವು ಬಾರಿ ಕರೆ ಮಾಡಿ ತನ್ನ ವಿರುದ್ಧ ದೂರು ನೀಡಿದರೆ ತಕ್ಕ ಶಾಸ್ತಿ ಎದುರಿಸಬೇಕಾಗುತ್ತದೆ ಎಂದು ಬೆದರಿಕೆಯೊಡ್ಡಿದ್ದಾನೆ.

ಕಳೆದ ಭಾನುವಾರ ರಾತ್ರಿ 10.30ರ ಸುಮಾರಿಗೆ ಇಂದಿರಾನಗರದಿಂದ ಬಿಟಿಎಂ ಲೇ ಔಟ್ ಗೆ ಒಲಾ ಕ್ಯಾಬ್ ಬುಕ್ ಮಾಡಿ ಯುವತಿ ಪ್ರಯಾಣಿಸುತ್ತಿದ್ದರು. ಕಾರಿನ ಚಾಲಕ ರಾಜಶೇಖರ ರೆಡ್ಡಿ ಕೋರಮಂಗಲಕ್ಕೆ ಹೋಗಲು ಇಂಟರ್ ಮೀಡಿಯೆಟ್ ರಿಂಗ್ ರಸ್ತೆಯಲ್ಲಿ ಹೋಗುತ್ತಿದ್ದಾಗ ರಸ್ತೆಯ ಬದಿಯಲ್ಲಿ ಕಾರು ನಿಲ್ಲಿಸಿದ. ಕೈಚಾಚಿ ಹಿಂದೆ ಕುಳಿತಿದ್ದ ಯುವತಿಯ ದೇಹ ಸ್ಪರ್ಶಿಸಲಾರಂಭಿಸಿದ. ಆ ಸಂದರ್ಭದಲ್ಲಿ ಸುತ್ತಮುತ್ತ ಯಾವುದೇ ವಾಹನ ಹೋಗುತ್ತಿರಲಿಲ್ಲ. 

ಯುವತಿ ಕಾರಿನ ಬಾಗಿಲು ತೆಗೆದು ಹೊರಗಿಳಿಯಲು ಪ್ರಯತ್ನಿಸಿದರೆ ಚಾಲಕ ಬಾಗಿಲಿನ ಬೀಗ ಹಾಕಿದ್ದ. ಆಗ ಯುವತಿ ಕಾರಿನ ಬಾಗಿಲನ್ನು ಬಡಿಯಲಾರಂಭಿಸಿದಳು. ಅಷ್ಟು ಹೊತ್ತಿಗೆ ಕಾರನ್ನು ಚಲಾಯಿಸಲಾರಂಭಿಸಿದನು. ಮುಂದೆ ಕೂಡ ಕಾರು ಚಾಲಕ ಅಸಭ್ಯ ರೀತಿಯಲ್ಲಿ ಯುವತಿಯೊಂದಿಗೆ ವರ್ತಿಸುತ್ತಿದ್ದನು. ತನ್ನ ಸ್ಥಳ ಬಂದಾಗ ಓಡಲಾರಂಭಿಸಿದ ಯುವತಿ ಈಜಿಪುರ ಪೊಲೀಸ್ ಠಾಣೆಗೆ ತೆರಳಿ ದೂರು ನೀಡಿದರು.