ಡೀಸೆಲ್ ಟ್ಯಾಂಕ್ ಗೆ ಮಳೆ ನೀರು ಮಿಶ್ರಣ, ಕೆಟ್ಟು ನಿಂತ 20ಕ್ಕೂ ಹೆಚ್ಚು ಬಿಎಂಟಿಸಿ ಬಸ್ ಗಳು!

ಬೆಂಗಳೂರು: ಶುಕ್ರವಾರ ಸುರಿದ ಭಾರಿ ಮಳೆಯಿಂದಾಗಿ ಕೇವಲ ನಗರದ ಜನತೆ ಮಾತ್ರವಲ್ಲೇ ಬಿಎಂಟಿಸ್ ಬಸ್ ಸಂಸ್ಥೆಯ ಮೇಲೂ ವ್ಯತಿರಿಕ್ತ ಪರಿಣಾಮ ಬೀರಿದ್ದು, ಡೀಸೆಲ್ ಟ್ಯಾಂಕ್ ಗೆ ನೀರು ಮಿಶ್ರಣವಾದ ಪರಿಣಾಮ ಸುಮಾರು 20ಕ್ಕೂ ಅಧಿಕ ಬಸ್ ಗಳು ಕೆಟ್ಟು ನಿಂತ ಘಟನೆ ನಡೆದಿದಿಗೆ.

ಬೆಂಗಳೂರಿನ ಕತ್ರಿಗುಪ್ಪೆಯಲ್ಲಿರುವ ಬಸ್ ಡಿಪೋ ಸಂಖ್ಯೆ 13ರಲ್ಲಿ ಈ ಘಟನೆ ನಡೆದಿದ್ದು, ಡಿಪೋದಲ್ಲಿರುವ ಡೀಸೆಲ್ ಟ್ಯಾಂಕ್ ಗೆ ಮಳೆ ನೀರು ಮಿಶ್ರಣವಾಗಿದೆ. ಇದೇ ಡೀಸೆಲ್ ಅನ್ನು ಬಸ್ ಗಳಿಗೆ ಹಾಕಿದ್ದರಿಂದ ಬಸ್ ಗಳು ಕೆಟ್ಟು ನಿಂತಿದ್ದು, ಡಿಪೋದಿಂದ ಹೊರಡ ಬೇಕಿದ್ದ ಸುಮಾರು 20ಕ್ಕೂ ಅಧಿಕ ಬಸ್ ಗಳು ಅಲ್ಲಿಯೇ ಉಳಿಯುವಂತಾಗಿದೆ. ಪ್ರಮುಖವಾಗಿ ಡಿಪೋದಲ್ಲಿದ್ದ ಸುಮಾರು 20 ವೋಲ್ವೋ ಬಸ್ ಗಳು ಕೆಟ್ಟು ನಿಂತಿದ್ದು, ದುರಸ್ತಿ ಕಾರ್ಯ ನಡೆಯುತ್ತಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. 

ಡಿಪೋ ಮೂಲಗಳ ಪ್ರಕಾರ ಡಿಪೋದಲ್ಲಿರುವ ಬಸ್ ಗಳಿಗೆ ಡೀಸೆಲ್ ತುಂಬಿಸಲು ಸುಮಾರು 40 ಸಾವಿರ ಲೀಟರ್ ಸಾಮರ್ಥ್ಯದ ಟ್ಯಾಂಕ್ ನಿರ್ಮಾಣ ಮಾಡಲಾಗಿದೆ. ಆದರೆ ನಿನ್ನೆ ಸುರಿದ ಭಾರಿ ಮಳೆಯಿಂದಾಗಿ ಡೀಸೆಲ್ ಟ್ಯಾಂಕ್ ಗೆ ಮಳೆ ನೀರು ಮಿಶ್ರಣವಾಗಿದ್ದು, ಇದೇ ಡೀಸೆಲ್ ಅನ್ನು ಬಸ್ ಗಳಿಗೆ ಬಳಕೆ ಮಾಡಿದ್ದರಿಂದ ಬಸ್ ಗಳು ಕೆಟ್ಟು ನಿಂತಿವೆ ಎಂದು ತಿಳಿದುಬಂದಿದೆ.