ವಶಪಡಿಸಿಕೊಳ್ಳಲಾದ ನಗದು, ಆಭರಣ ಪ್ರಮಾಣ ಕಳೆದ ಬಾರಿಗಿಂತ ಮೂರು ಪಟ್ಟು ಹೆಚ್ಚಳ: ಚುನಾವಣಾ ಆಯೋಗ

ನವದೆಹಲಿ: ಕರ್ನಾಟಕ ವಿಧಾನಸಭೆ ಚುನಾವಣೆ ಸಮಯದಲ್ಲಿ ಚುನಾವಣಾ ಆಯೋಗದಿಂದ ವಶಪಡಿಸಿಕೊಳ್ಳಲಾದ ಹಣ ಹಾಗೂ ಸ್ವತ್ತುಗಳ ಮೌಲ್ಯ ಮೂರು ಪಟ್ಟು ಹೆಚ್ಚಳವಾಗಿದೆ. 

ಕಳೆದ ಬಾರಿಗೆ ಹೋಲಿಸಿದರೆ ನಗದು ಹಾಗೂ ಆಭರಣಗಳ ವಶದ ಪ್ರಮಾಣದಲ್ಲಿ ಸುಮಾರು 25 ಕೋಟಿ ರೂಪಾಯಿಗಳಷ್ಟು ಹೆಚ್ಚಳ ಉಂಟಾಗಿದೆ ಎಂದು ಚುನಾವಣಾ ಆಯೋಗ (ಇಸಿ) ಪ್ರಕಟಣೆಯಲ್ಲಿ ತಿಳಿಸಿದೆ.

"2013ರ ಚುನಾವಣೆ ಸಮಯದಲ್ಲಿ ರಾಜ್ಯದಲ್ಲಿ 3.41 ಕೋಟಿ ರೂಪಾಯಿ ಮೌಲ್ಯದ ಚಿನ್ನಾಭರಣಗಳು ಹಾಗು 4.97 ಕೋಟಿ ರೂ. ನಗದನ್ನು ವಶಪಡಿಸಿಕೊಳ್ಳಲಾಗಿತ್ತು, ಈ ಬಾರಿ ಚುನಾವಣೆ ಪ್ರಚಾರ ಪ್ರಾರಂಭಗೊಂಡಂದಿನಿಂದ ಏಪ್ರಿಲ್ 30ರ ವರೆಗೆ ಒಟ್ಟು 19.69 ಕೋಟಿ ರೂ. ನಗದು ಹಾಗು 4.81 ಕೋಟಿ ಮೌಲ್ಯದ ಚಿನ್ನಾಭರಣಗಳನ್ನು ತೆರಿಗೆ ಇಲಾಖೆ ಸುಪರ್ದಿಗೆ ಪಡೆದುಕೊಂಡಿದೆ" ಇಸಿ ಹೇಳಿದೆ.

ಮೇ 12ರಂದು ಒಂದೇ ಹಂತದಲ್ಲಿ ನಡೆಯುವ ರಾಜ್ಯ ಚುನಾವಣೆಗೆ ಇನ್ನೂ ಒಂದು ವಾರಗಳ ಕಾಲ ಪ್ರಚಾರ ನಡೆಯಲಿದೆ.