ಕರ್ನಾಟಕ: ನಿಲ್ದಾಣದಲ್ಲಿದ್ದ ಬಸ್ ಚಲಾಯಿಸಿ ಆತಂಕ ಸೃಷ್ಟಿಸಿದ ಮಾನಸಿಕ ಅಸ್ವಸ್ಥ

ರಾಯಚೂರು: ಬಸ್ ನಿಲ್ದಾಣದಲ್ಲಿ ನಿಲ್ಲಿಸಲಾಗಿದ್ದ ಬಸ್ ಅನ್ನು ಮಾನಸಿಕ ಅಸ್ವಸ್ಥನೊಬ್ಬ ಚಾಲನೆ ಮಾಡಿಕೊಂಡು ಹೋಗಿ ಕೆಲಕಾಲ ಆತಂಕ ಸೃಷ್ಟಿಸಿದ್ದ ಘಟನೆ ಮಂಗಳವಾರ ನಡೆದಿದೆ. 

ರಾಯಚೂರಿನ ರೈಲು ನಿಲ್ದಾಣದಲ್ಲಿ ನಿಲುಗಡೆ ಮಾಡಿದ್ದ ಬಸ್'ನ್ನು ಮಾನಸಿಕ ಅಸ್ವಸ್ಥನಾಗಿರುವ ದೇವೇಂದ್ರಪ್ಪ ಎಂಬಾತ ಚಾಲನೆ ಮಾಡಿದ್ದಾನೆ. ರೈಲ್ವೇ ನಿಲ್ದಾಣದಿಂದ 1 ಕಿ.ಮೀವರೆಗೂ ಚಾಲನೆ ಮಾಡಿ ಕೆಲಕಾಲ ಆಂತಕ ಸೃಷ್ಟಿಸಿದ್ದಾನೆ. 

ಬೆಂಗಳೂರಿನಲ್ಲಿ ದಿನಗೂಲಿ ಮಾಡುತ್ತಿದ್ದ ದೇವೇಂದ್ರಪ್ಪ ರಾಯಚೂರಿಗೆ ಆಗಮಿಸಿದ್ದ. ನಿಲ್ದಾಣದಲ್ಲಿ ಬಸ್'ನ್ನು ಕೀ ಸಮೇತ ನಲ್ಲಿಸಿ ಚಾಲಕ ಟೀ ಕುಡಿಯಲು ಹೋಗಿದ್ದಾನೆ. ಈ ವೇಳೆ ಬಸ್'ನಲ್ಲಿ ಯಾರೂ ಇಲ್ಲದ್ದನ್ನು ನೋಡಿರುವ ದೇವೇಂದ್ರಪ್ಪ ಬಸ್ಸನ್ನು ಚಲಾಯಿಸಿಕೊಂಡು ಹೋಗಿದ್ದಾನೆ. ಈ ವೇಳೆ ಬಸ್ಸು ಹೋಗುತ್ತಿರುವುದನ್ನು ಗಮನಿಸಿದ ಚಾಲಕ ಹಾಗೂ ನಿರ್ವಾಹಕ ಬಸ್ಸಿನ ಹಿಂದೆ ಓಡಿದ್ದಾರೆ. ಅದೃಷ್ಟವಶಾತ್ ಯಾವುದೇ ಅನಾಹುತಗಳು ಸಂಭವಿಸಿಲ್ಲ. ಪ್ರಸ್ತುತ ಪಶ್ಚಿಮ ಠಾಣೆ ಪೊಲೀಸರು ದೇವೇಂದ್ರಪ್ಪ ಅವರನ್ನು ವಶಕ್ಕೆ ಪಡೆದುಕೊಂಡಿದ್ದಾರೆಂದು ತಿಳಿದುಬಂದಿದೆ.