ಗಡುವಿಗೂ ಮುನ್ನ ಸಂಚಾರಕ್ಕೆ ಮುಕ್ತಗೊಳ್ಳಲಿದೆ ಶಿರಾಡಿ ಘಾಟ್ ಹೆದ್ದಾರಿ?

ಬೆಂಗಳೂರು; ಬೆಂಗಳೂರು-ಮಂಗಳೂರು ರಾಷ್ಟ್ರೀಯ ಹೆದ್ದಾರಿ ಶಿರಾಡಿ ಘಾಟ್ ರಸ್ತೆಯ ಕಾಮಾಗಾರಿ ಕಾರ್ಯಗಳು ಭರದಿಂದ ಸಾಗಿದ್ದು, ಗಡುವಿಗೂ ಮುನ್ನ ಸಂಚಾರಕ್ಕೆ ಮುಕ್ತಗೊಳ್ಳುವ ಎಲ್ಲಾ ಸಾಧ್ಯತೆಗಳಿವೆ ಎಂದು ಹೇಳಲಾಗುತ್ತಿದೆ. 

ಬೆಂಗಳೂರು-ಮಂಗಳೂರು ರಾಷ್ಟ್ರೀಯ ಹೆದ್ದಾರಿಯ ಶಿರಾಡಿ ಘಾಟ್ ರಸ್ತೆಯ ಕಾಂಕ್ರಿಟೀಕರಣ ಕಾಮಗಾರಿಗೆ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ ಆ.1 ರವರೆಗೆ ಕಾಲಾವಕಾಶವನ್ನು ನೀಡಿತ್ತು. ಆದರೆ, ಕಾಂಕ್ರೀಟೀಕರಣ ಕಾಮಗಾರಿ ತ್ವರಿತವಾಗಿ ಸಾಗಿದ್ದು, ಏಪ್ರಿಲ್ ಅಂತ್ಯದೊಳಗೆ ಪೂರ್ಣಗೊಳ್ಳುವ ನಿರೀಕ್ಷೆಗಳಿವೆ. 

2ನೇ ಹಂತವಾಗಿ ರೂ.74 ಕೋಟಿ ಅಂದಾಜು ವೆಚ್ಚದಲ್ಲಿ 250.62ರಿಂದ 263 ಕಿ.ಮೀರವರೆಗೆ 12.38 ಕಿ.ಮೀ ಉದ್ದದ ರಸ್ತೆ ಕಾಮಗಾರಿಗೆ ವೇಗ ಹೆಚ್ಚು ಮಾಡಲಾಗಿದೆ. ಕಾಮಗಾರಿಗಾಗಿ ಜ.20ರಿಂದ ಈ ಮಾರ್ಗದಲ್ಲಿ ವಾಹನ ಸಂಚಾರಗಳನ್ನು ನಿಷೇಧಿಸಲಾಗಿತ್ತು. ಎಡಭಾಗದಲ್ಲಿ ಗ್ರ್ಯಾನ್ಯುಲರ್ ಸಬ್ ಬೇಸ್ ಮತ್ತು ಬಲಭಾಗದಲ್ಲಿ ಲೇಯಿಂಗ್ ಆಫ್ ಡ್ರೈಲೀನ್ ಕಾಂಕ್ರೀಟ್ (ಡಿಎಲ್'ಸಿ) ಕಾಮಗಾರಿ ಕಾರ್ಯಗಳು ನಡೆಯುತ್ತಿವೆ. 700 ಮೀಟರ್ ಮೇವ್ಮೆಂಟ್ ಕ್ವಾಲಿಟಿ ಕಾಂಕ್ರಿಟ್ ಕಾಮಗಾರಿ ನಡೆಯುತ್ತಿದ್ದು, ಇದಕ್ಕಾಗಿ ಗುತ್ತಿಗೆದಾರರು ಜರ್ಮನಿಯಿಂದ ಅತ್ಯಾಧುನಿಕ ಯಂತ್ರವನ್ನು ಖರೀದಿ ಮಾಡಿದ್ದಾರೆ ಎಂದು ತಿಳಿದುಬಂದಿದೆ. 

ಕಾಂಕ್ರೀಟ್ ರಸ್ತೆಗೆ ಮಣ್ಣಿನ ಕಣಗಳು ತಾಕದಂತೆ ತಡೆಯುವ ಸಲುವಾಗಿ ಮಣ್ಣಿನ ಮೇಲೆ ಜಿಯೋ ಟೆಕ್ಸ್'ಟೈಲ್ ಹಾಕಲಾಗಿದ್ದು, ನೀರಿನ ಸೋರುವಿಕೆ ತಡೆಯುವ ಸಲುವಾಗಿ ಪ್ರತೀ 25 ಮೀಟರ್ ಅಂತರದಲ್ಲಿ ಕ್ರಾಸ್ ಫಿಲ್ಟರ್ ಡ್ರೈನೇಜ್ ಮಾಡಲಾಗುತ್ತಿದೆ. ಒಟ್ಟು 600 ಎಂಎಂ ದಪ್ಪದ ರಸ್ತೆ ನಿರ್ಮಾಣವಾಗುತ್ತಿದ್ದು, 74 ಮೋರಿಗಳ ಕಾಮಗಾರಿ ಈಗಾಗಲೇ ಪೂರ್ಣಗೊಂಡಿದೆ.