ಬೆಂಗಳೂರು: ಚಿತ್ರಮಂದಿರಗಳು, ಆಡಿಯೋರಿಯಂ, ರಂಗಮಂದಿರ, ಮಲ್ಟಿಪ್ಲೆಕ್ಸ್ ಹಾಗೂ ಪಬ್ ಗಳಲ್ಲಿ ರಾಜ್ಯ ಸರ್ಕಾರ ಸಾಮರ್ಥ್ಯಕ್ಕೆ ಅವಕಾಶ ಮಾಡಿಕೊಟ್ಟಿರುವ ಹಿನ್ನೆಲೆಯಲ್ಲಿ ರಾಜ್ಯದಲ್ಲಿ ಸೋಂಕು ಮತ್ತೆ ಹೆಚ್ಚಾಗುವ ಭೀತಿ ಶುರುವಾಗಿದೆ. ಈ ನಡುವೆ ರಾಜ್ಯದಲ್ಲಿನ ಕೋವಿಡ್ ಪರಿಸ್ಥಿತಿಯನ್ನು ಸೂಕ್ಷ್ಮವಾಗಿ ಗಮನಿಸಲಾಗುತ್ತಿದ್ದು, ಮೂರನೇ ಅಲೆ ಎದುರಿಸಲು ಸರ್ಕಾರ ಸಂಪೂರ್ಣವಾಗಿ ಸಿದ್ಧವಿದೆ ಎಂದು ಆರೋಗ್ಯ ಸಚಿವ ಡಾ.ಕೆ.ಸುಧಾಕರ್ ಅವರು ಹೇಳಿದ್ದಾರೆ.
ದಿ ನ್ಯೂ ಇಂಡಿಯನ್ ಎಕ್ಸ್'ಪ್ರೆಸ್ ನಡೆಸಿದ ಸಂದರ್ಶನದಲ್ಲಿ ಮಾತನಾಡಿರುವ ಸಚಿವ ಸುಧಾಕರ್ ಅವರು ಕೋವಿಡ್ ಪರಿಸ್ಥಿತಿ ಹಾಗೂ ಸಿದ್ಧತೆ ಕುರಿತು ಮಾತನಾಡಿದ್ದಾರೆ.
ರಾಜ್ಯದಲ್ಲಿ ಸಂಭಾವ್ಯ ಕೋವಿಡ್ 3ನೇ ಅಲೆ ಆರಂಭ ಕುರಿತು ಆತಂಕ ಶುರುವಾಗಿದ್ದು, ಪರಿಸ್ಥಿತಿ ಎದುರಿಸಲು ಸರ್ಕಾರ ಯಾವ ರೀತಿಯಲ್ಲಿ ಸಿದ್ಧತೆ ನಡೆಸಿದೆ?
ಸಾಂಕ್ರಾಮಿಕ ರೋಗ ಬಹು ಅಲೆಗಳನ್ನು ಸೃಷ್ಟಿಸುತ್ತಿದೆ. ಮೂರನೇ ಅಲೆಯ ಗಂಭೀರ ಪರಿಣಾಮ ಬೀರಬಹುದು ಅಥವಾ ಬೀರದೆ ಇರಬಹುದು. ಏನೇ ಆದರೂ ಸೂಕ್ತ ರೀತಿಯ ಸಿದ್ಧತೆ ನಡೆಸುವುದು ಸರ್ಕಾರವಾಗಿ ನಮ್ಮ ಜವಾಬ್ದಾರಿಯಾಗಿದೆ. ಹಾಸಿಗೆಗಳು ಮತ್ತು ಆಮ್ಲಜನಕದ ಪೂರೈಕೆಯಲ್ಲಿ ನಾವು ನಮ್ಮ ಸಾಮರ್ಥ್ಯವನ್ನು ಗಣನೀಯವಾಗಿ ಹೆಚ್ಚಿಸಿದ್ದೇವೆ. ಕೋವಿಡ್‌ಗಿಂತ ಮೊದಲು ರಾಜ್ಯದಲ್ಲಿ ಐಸಿಯು ಹಾಸಿಗೆಗಳ ಸಂಖ್ಯೆ ಕೇವಲ 725 ಇತ್ತು. ಇದೀಗ ರಾಜ್ಯದಲ್ಲಿ ಸರ್ಕಾರಿ ವೈದ್ಯಕೀಯ ಕಾಲೇಜುಗಳು ಮತ್ತು ಸರ್ಕಾರಿ ಆಸ್ಪತ್ರೆಗಳಲ್ಲಿ 3,877 ಐಸಿಯು ಹಾಸಿಗೆಗಳಿವೆ. 5-6 ಪಟ್ಟು ಹೆಚ್ಚಳವಾಗಿದೆ. ಕೋವಿಡ್ ಮೊದಲು 4,847 ಆಮ್ಲಜನಕ ಹಾಸಿಗೆಗಳು ಇದ್ದವು. ಆಗಸ್ಟ್ 2021 ರ ವೇಳೆಗೆ, ಆಮ್ಲಜನಕಯುಕ್ತ ಹಾಸಿಗೆಗಳ ಸಂಖ್ಯೆ 28,447 ಕ್ಕೆ ಹೆಚ್ಚಾಗಿದೆ, ಸಾಮಾನ್ಯ ಹಾಸಿಗೆಗಳು 41,378 ರಿಂದ 50,629 ಕ್ಕೆ ಹೆಚ್ಚಾಗಿದೆ.
ಕೋವಿಡ್ ಪೂರ್ವ, ಸರ್ಕಾರಿ ಆಸ್ಪತ್ರೆಗಳು ಮತ್ತು ವೈದ್ಯಕೀಯ ಕಾಲೇಜುಗಳು 320 ಎಂಟಿ ನಷ್ಟು ಆಮ್ಲಜನಕ ಸಾಮರ್ಥ್ಯವನ್ನು ಹೊಂದಿದ್ದವು, ನಾವು ಆಗಸ್ಟ್ 2021 ರ ವೇಳೆಗೆ 1,207 ಎಂಟಿಗೆ ಹೆಚ್ಚಾಗಿದೆ. ಎರಡನೇ ಅಲೆ ಸಮಯದಲ್ಲಿ, ಆಮ್ಲಜನಕದ ಲಾಜಿಸ್ಟಿಕ್ಸ್ ಒಂದು ದೊಡ್ಡ ಸವಾಲಾಗಿತ್ತು. ಕೋವಿಡ್ ಮೊದಲು ಆಕ್ಸಿಜನ್ ಸಿಲಿಂಡರ್ ಗಳ ಸಂಖ್ಯೆ 2,180 ಇತ್ತು. ಆದರೆ ಇದೀಗ 13,588ಕ್ಕೆ ಹೆಚ್ಚಾಗಿದೆ. ಆಮ್ಲಜನಕದ ಸಾಂದ್ರತೆಯ ಸಂಖ್ಯೆ 585 ರಿಂದ 6,511 ಕ್ಕೆ ಏರಿಕೆಯಾಗಿದೆ.
ಶಾಲೆಗಳಲ್ಲಿ ಕೋವಿಡ್ -19 ಮಾರ್ಗಸೂಚಿಗಳ ಅನುಸರಣೆ ಮೇಲ್ವಿಚಾರಣೆ ಮಾಡಲಾಗುವುದಿಲ್ಲ ಎಂದು ಪೋಷಕರು ದೂರುತ್ತಿದ್ದಾರೆ. ಅನುಸರಿಸಬೇಕಾದ ಕ್ರಮಗಳ ಬಗ್ಗೆ ಶಾಲೆಗಳಿಗೆ ಸ್ಪಷ್ಟ ಸೂಚನೆಗಳನ್ನು ನೀಡಲಾಗಿದೆ. ಈ ಕ್ರಮಗಳನ್ನು ನಿಯಮಿತವಾಗಿ ಪರಿಶೀಲಿಸಲಾಗುತ್ತದೆ. ಯಾವುದೇ ಉಲ್ಲಂಘನೆಗಳಿದ್ದರೆ ಅದನ್ನು ಪರಿಶೀಲಿಸುತ್ತೇವೆ.
ಮಕ್ಕಳ ಲಸಿಕೆಗಾಗಿ ಮೂರನೇ ಹಂತದ ಕ್ಲಿನಿಕಲ್ ಪ್ರಯೋಗಗಳು ನಡೆಯುತ್ತಿವೆ, ಲಸಿಕೆ ಬರಲು ಇನ್ನೂ ಎಷ್ಟು ಸಮಯ ಕಾಯಬೇಕು?
ಮಕ್ಕಳಿಗೆ ಲಸಿಕೆ ಪ್ರಯೋಗಗಳು ಪೂರ್ಣಗೊಳ್ಳುವ ವಿವಿಧ ಹಂತಗಳಲ್ಲಿವೆ. ಒಂದೆರಡು ಔಷಧೀಯ ಕಂಪನಿಗಳು ಈ ಕುರಿಯು ಕೆಲಸ ಮಾಡುತ್ತಿವೆ. ಇಂಡಿಯನ್ ಕೌನ್ಸಿಲ್ ಆಫ್ ಮೆಡಿಕಲ್ ರಿಸರ್ಚ್ (ಐಸಿಎಂಆರ್) ಈ ಪ್ರಕ್ರಿಯೆಯನ್ನು ಗಮನಿಸುತ್ತಿದೆ. ಲಸಿಕೆಗಳು ಶೀಘ್ರದಲ್ಲೇ ಹೊರಬರುವ ಭರವಸೆಯಿದೆ.
ಶುಕ್ರವಾರದಿಂದ ಚಲನಚಿತ್ರ ಮಂದಿರಗಳು ಶೇ 100 ರಷ್ಟು ಆಸನಗಳೊಂದಿಗೆ ಆರಂಭಗೊಳ್ಳುತ್ತಿವೆ. ಒಬ್ಬ ವೈದ್ಯರಾಗಿ, ಜನರು ಮೂರು ಗಂಟೆಗಳ ಕಾಲ ಒಟ್ಟಿಗೆ ಇರುವುದನ್ನು ಅಪಾಯವೆಂದು ನೀವು ಹೇಳುವಿರಾ?
ರಾಜ್ಯದ ಚಿತ್ರಮಂದಿರಗಳಲ್ಲಿ ಶೇ.100ರಷ್ಟು ಸಾಮರ್ಥ್ಯದ ಕುರಿತ ನಿರ್ಧಾರವನ್ನು ಕೂಲಂಕಷವಾಗಿ ಚರ್ಚಿಸಿದ ನಂತರ ತೆಗೆದುಕೊಳ್ಳಲಾಗಿದೆ. ಸುರಕ್ಷತೆಗೆ ಧಕ್ಕೆಯಾಗದಂತೆ ಚಿತ್ರಮಂದಿರ ತೆರೆಯಲು ಅವಕಾಶ ನೀಡುವುದು ಮುಖ್ಯವಾಗಿದೆ. ಕನಿಷ್ಠ ಒಂದು ಡೋಸ್‌ನೊಂದಿಗೆ ಲಸಿಕೆ ಹಾಕಿದ ಜನರನ್ನು ಮಾತ್ರ ಪ್ರವೇಶಿಸಲು ಅನುಮತಿಸಲಾಗಿದೆ, ಚಿತ್ರಪ್ರದರ್ಶನದ ವೇಳೆ ಎರಡು ವಿರಾಮಗಳು ಇರುತ್ತವೆ ಮತ್ತು ಪ್ರತಿ ಪ್ರದರ್ಶನದ ನಂತರ ಥಿಯೇಟರ್‌ಗಳನ್ನು ಸ್ಯಾನಿಟೈಸ್ ಮಾಡಲಾಗುತ್ತದೆ.
ಸೆಪ್ಟೆಂಬರ್ 17 ರಂದು, ದಾಖಲೆ ಸಂಖ್ಯೆಯ ಜನರಿಗೆ ಲಸಿಕೆ ಹಾಕಲಾಯಿತು, ಆದರೆ, ನಂತರ ದಿನಗಳಲ್ಲಿ ಲಸಿಕೆ ಸಂಖ್ಯೆ ಕುಸಿತ ಕಂಡಿದೆ. ಡಿಸೆಂಬರ್ ತಿಂಗಳು ಗಡುವಿನ ಸಮಯವಾಗಿದ್ದು, ಅಷ್ಟರಲ್ಲಿ ಪ್ರತಿಯೊಬ್ಬರಿಗೂ ಲಸಿಕೆ ಹಾಕಲು ಸಾಧ್ಯವೇ?
ಸೆಪ್ಟೆಂಬರ್ 17 ರಂದು 31.68 ಲಕ್ಷ ಡೋಸ್ ಲಸಿಕೆಗಳನ್ನು ನೀಡಿದ್ದೇವೆ. ಈ ಮೂಲಕ ಪ್ರಧಾನಿ ನರೇಂದ್ರ ಮೋದಿಯವರ ಜನ್ಮದಿನದಂದು ಅವರಿಗೆ ಗೌರವ ಸಲ್ಲಿಸಿದ್ದೇವೆ. ಬುಧವಾರ 10 ಲಕ್ಷ ಡೋಸ್‌ಗಳ ಗುರಿಯೊಂದಿಗೆ ಲಸಿಕೆ ಅಭಿಯಾನ ಆರಂಭಿಸಿದ್ದೆವು. ಕಳೆದ ಬುಧವಾರ 10 ಲಕ್ಷಕ್ಕಿಂತ ಹೆಚ್ಚು ಡೋಸ್ ಲಸಿಕೆಗಳನ್ನು ನೀಡಿದ್ದೇವೆ. ಡಿಸೆಂಬರ್ 2021 ರ ಅಂತ್ಯದ ವೇಳೆಗೆ ಎಲ್ಲಾ ಅರ್ಹ ವಯಸ್ಕರಿಗೆ ಲಸಿಕೆ ಹಾಕುವ ವಿಶ್ವಾಸ ನಮಗಿದೆ. ಕರ್ನಾಟಕದ ಜನರು ತುಂಬಾ ಸಹಕರಿಸಿದ್ದಾರೆ ಮತ್ತು ನಾವು ಈಗಾಗಲೇ ಮೊದಲ ಡೋಸ್‌ನಲ್ಲಿ ಶೇಕಡಾ 78 ರಷ್ಟು ವ್ಯಾಪ್ತಿಯನ್ನು ಸಾಧಿಸಿದ್ದೇವೆ. ಹೆಚ್ಚಿನ ಜಿಲ್ಲೆಗಳು 90 ಪ್ರತಿಶತದಷ್ಟು ವ್ಯಾಪ್ತಿಯನ್ನು ಹೊಂದಿವೆ. ಕರ್ನಾಟಕವು 4.9 ಕೋಟಿ ವಯಸ್ಕ ಜನಸಂಖ್ಯೆಯನ್ನು ಹೊಂದಿದೆ, ಸಂಪೂರ್ಣ ವಯಸ್ಕ ಜನಸಂಖ್ಯೆಗೆ ಎರಡು ಡೋಸ್ ಎಂದರೆ ನಾವು 9.8 ಕೋಟಿ ಡೋಸ್‌ಗಳನ್ನು ನೀಡಬೇಕಾಗಿದೆ. ಲಸಿಕೀಕರಣ ಪೂರ್ಣಗೊಳಿಸಲು 4.35 ಕೋಟಿ ಹೆಚ್ಚು ಲಸಿಕೆ ಡೋಸ್‌ಗಳನ್ನು ನೀಡಬೇಕಾಗಿದೆ.
ವಿಕಲಚೇತನರು ಲಸಿಕೆ ಹಾಕಿಸಿಕೊಂಡಿಲ್ಲ, ನೀವು ಅವರನ್ನು ಹೇಗೆ ತಲುಪುತ್ತೀರಿ?
ಒಬ್ಬ ವ್ಯಕ್ತಿಯು ಲಸಿಕೆ ಕೇಂದ್ರದವರೆಗೆ ನಡೆಯಲು ಸಾಧ್ಯವಾಗದಿದ್ದರೆ, ಅವರ ಕಾರುಗಳು ಅಥವಾ ಕೇಂದ್ರದ ಹೊರಗೆ ನಿಂತ ವೀಲ್ ಚೇರ್ ಗಳ ಬಳಿಯೇ ತೆರಳಿ ಲಸಿಕೆ ಹಾಕುವಂತೆ ಸಿಬ್ಬಂದಿಗೆ ಸೂಚಿಸಲಾಗಿದೆ. ಹಾಸಿಗೆ ಹಿಡಿದಿರುವವರು ಹಾಗೂ ತೀವ್ರವಾದ ವಿಕಲಚೇತನದಿಂದ ಬಳಲುತ್ತಿರುವವರಿಗೂ ಲಸಿಕೆ ಹಾಕಲು ಕಾರ್ಯಕ್ರಮವನ್ನು ಆರಂಭಿಸಿದ್ದೇವೆ.
ಅತಿಯಾಗಿ ಕೆಲಸ ಮಾಡುವ ಆರೋಗ್ಯ ಸಿಬ್ಬಂದಿಗೆ ಭಾನುವಾರ ರಜೆ ನೀಡಲು ಆರೋಗ್ಯ ಇಲಾಖೆ ಪ್ರಯತ್ನಿಸುತ್ತಿದೆ...?
ಆರೋಗ್ಯ ಕಾರ್ಯಕರ್ತರು ಮಾರ್ಚ್ 2020 ರಿಂದ ಪಟ್ಟುಬಿಡದಂತೆ ಕೆಲಸ ಮಾಡುತ್ತಿದ್ದಾರೆ. ಲಸಿಕೆ ಹಾಕುವ ಜವಾಬ್ದಾರಿ ಹೊತ್ತ ಸಿಬ್ಬಂದಿ ಜನವರಿ 2021 ರಿಂದ ಶ್ರಮಿಸುತ್ತಿದ್ದಾರೆ. ಅವರಲ್ಲಿ ಹೆಚ್ಚಿನವರು ಅತಿಯಾದ ಕೆಲಸ ಮಾಡುತ್ತಿದ್ದಾರೆ. ಇದೀಗ ಲಸಿಕೀಕರಣ ಒಂದು ನಿರ್ದಿಷ್ಟ ಹಂತವನ್ನು ತಲುಪಿದೆ, ಹೀಗಾಗಿ ಶ್ರಮ ಪಟ್ಟ ಸಿಬ್ಬಂದಿಗಳಿಗೆ ಅರ್ಹವಾದ ವಿರಾಮವನ್ನು ನೀಡುವುದು ಮುಖ್ಯವಾಗಿದೆ.
Advertisement