ಕೆಲವರ್ಷಗಳಲ್ಲಿ ನಮ್ಮ ಮೆಟ್ರೋ ಬೃಹತ್ ಜಾಲ; ಭಾರತದಲ್ಲೇ ಅತಿದೊಡ್ಡದು: ಬಿಎಂಆರ್'ಸಿಎಲ್ ಎಂಡಿ ಅಂಜುಮ್ ಪರ್ವೇಜ್ (ಸಂದರ್ಶನ)

ಬೆಂಗಳೂರು: ಬೆಂಗಳೂರು ಎಂಬ ಮಾಯಾಲೋಕಕ್ಕೆ ನಮ್ಮ ಮೆಟ್ರೋ ರೈಲು ಸೇರ್ಪಡೆಗೊಂಡು ಹಲವು ವರ್ಷಗಳು ಕಳೆದಿದ್ದು, ನಮ್ಮ ಮೆಟ್ರೋ ನಗರದ ಜನತೆಯ ಮನಗೆದ್ದಿದೆ. ನಗರದ ಜೊತೆ ಜೊತೆಗೆ ನಮ್ಮ ಮೆಟ್ರೋ ಕೂಡ ಅಗಾಧವಾಗಿ ಬೆಳೆಯ ತೊಡಗಿದೆ.

ದಿ ನ್ಯೂ ಸಂಡೇ ಎಕ್ಸ್'ಪ್ರೆಸ್ ನಡೆಸಿದ ಸಂದರ್ಶನದಲ್ಲಿ ಮಾತನಾಡಿರುವ ಬೆಂಗಳೂರು ಮೆಟ್ರೋ ರೈಲ್ ಕಾರ್ಪೊರೇಷನ್ ಲಿಮಿಟೆಡ್ (ಬಿಎಂಆರ್'ಸಿಎಲ್)ನ ವ್ಯವಸ್ಥಾಪಕ ನಿರ್ದೇಶಕ ಅಂಜುಮ್ ಪರ್ವೇಜ್ ಅವರು ನಮ್ಮ ಮೆಟ್ರೋದ ಭವಿಷ್ಯದ ಯೋಜನೆಗಳು, ಎದುರಾಗುತ್ತಿರುವ ಸವಾಲುಗಳು, ನಮ್ಮ ಮೆಟ್ರೋದ ವಿಕಸನಗೊಳ್ಳುತ್ತಿರುವ ಕುರಿತು ಮನಬಿಚ್ಚಿ ಮಾತನಾಡಿ, ಮಾಹಿತಿಗಳನ್ನೂ ಹಂಚಿಕೊಂಡಿದ್ದಾರೆ.

ಬಿಎಂಆರ್'ಸಿಎಲ್' ನ 2ನೇ ಹಂತದ ಮಾರ್ಗ ನಿರ್ಮಾಣಗಳ ಸ್ಥಿತಿಗತಿಗಳು ಹೇಗಿವೆ?
2024ರ ವೇಳೆಗೆ 2ನೇ ಹಂತದ ಮಾರ್ಗ ನಿರ್ಮಾಣ ಪೂರ್ಣಗೊಳಿಸುವ ಗುರಿಯನ್ನು ಹೊಂದಲಾಗಿತ್ತು. 2021-22ರ ವೇಳೆಗೆ ಸಂಪೂರ್ಣ ವಿಸ್ತರಣೆಗಳನ್ನು ಪೂರ್ಣಗೊಳಿಸಬೇಕಿತ್ತು. ಆದರೆ, ಕೋವಿಡ್ ಕಾರಣದಿಂದಾಗಿ 2 ವರ್ಷ ವ್ಯರ್ಥವಾಯಿತು. ಭೂ ಸ್ವಾಧೀನ ಸಮಸ್ಯೆಗಳು ಹೆಚ್ಚಾಗಿದ್ದೂ ಕೂಡ ನಮ್ಮ ಸಮಯ ವ್ಯರ್ಥವಾಗುವಂತೆ ಮಾಡಿತ್ತು. ಇದೀಗ ಎಲ್ಲಾ ಸಮಸ್ಯೆಗಳನ್ನು ಪರಿಹರಿಸಲಾಗಿದೆ. ನಿರ್ಮಾಣ ಕಾರ್ಯ ಪ್ರಗತಿಯಲ್ಲಿದೆ. ವೈಟ್‌ಫೀಲ್ಡ್-ಕಾಡುಗೋಡಿ-ಕೆಆರ್ ಪುರಂ ಮಾರ್ಗದ ಇತ್ತೀಚಿನ ಉದ್ಘಾಟನೆಗೊಂಡಿತ್ತು. ಇದೀಗ 69.9 ಕಿ.ಮೀ ಮಾರ್ಗ ನಿರ್ಮಾಣದ ಮೂಲಕ ಹೈದರಾಬಾದ್ ಗಿಂತಲೂ ಮುಂದೆ ಸಾಗಿದ್ದೇವೆ. ಇನ್ನೂ 70 ಕಿಮೀ ಮಾರ್ಗ ನಿರ್ಮಾಣ ಕಾರ್ಯ ಪ್ರಗತಿಯಲ್ಲಿದೆ.

ಡಿಸೆಂಬರ್ 2023 ರೊಳಗೆ 30 ಕಿ.ಮೀ ಪೂರ್ಣಗೊಳಿಸುವ ಗುರಿ ಹೊಂದಿದ್ದೇವೆ. ಬೆಂಗಳೂರಿನಂತಹ ನಗರದಲ್ಲಿ ಈಗಾಗಲೇ 10 ಮಿಲಿಯನ್ ಜನಸಂಖ್ಯೆ ದಾಟಿದೆ. ಮೆಟ್ರೋ ಎಂದಿಗೂ ಅಂತ್ಯವಿಲ್ಲ. ಇದಿನ್ನೂ ಆರಂಭವಷ್ಟೇ. ಬೈಯಪ್ಪನಹಳ್ಳಿಯಿಂದ ಎಂಜಿ ರಸ್ತೆಯವರೆಗೆ ಮೆಟ್ರೋ ಆರಂಭ ಮಾಡಿದಾಗ ಜನರು ಮೋಜಿಗಾಗಿ ಸಂಚಾರ ಮಾಡಿದರು. ಬಳಿಕ ಮಾರ್ಗವನ್ನು ಕ್ರಮೇಣ ಹೆಚ್ಚಿಸಲಾಯಿತು. ಕೋವಿಡ್ ಬಳಿಕ ಪ್ರಯಾಣಿಕರ ಸಂಖ್ಯೆ ಕಡಿಮೆಯಾಗಿತ್ತು. ಆದರೆ, ಇದೀಗ ಜನರಿಗೆ ಮೆಟ್ರೋ ಮೇಲಿನ ವಿಶ್ವಾಸ ಹೆಚ್ಚಾಗಿದೆ. ಮೇ 23 ಮತ್ತು 24 ರಂದು 6 ಲಕ್ಷ ಪ್ರಯಾಣಿಕರು ಪ್ರಯಾಣಿಸಿದ್ದಾರೆ.

ಜುಲೈ ತಿಂಗಳಿನಲ್ಲಿ ಕೆ.ಆರ್.ಪುರಂ-ಬೈಯಪ್ಪನಹಳ್ಳಿ 2 ಕಿ.ಮೀ ಸಂಪರ್ಕವನ್ನು ಆರಂಭಿಸಲು ಚಿಂತನೆ ನಡೆಸಲಾಗಿದೆ. ಇದರೊಂದಿಗೆ ಈ ಸಂಖ್ಯೆ 7 ಲಕ್ಷ ತಲುಪುವ ವಿಶ್ವಾಸವಿದೆ. ಬಳಿಕ ಕೆಂಗೇರಿ ಚಲ್ಲಘಟ್ಟದ ಸಂಪರ್ಕ ಕೂಡ ಆರಂಭವಾಗಲಿದೆ. ವೈಟ್‌ಫೀಲ್ಡ್‌ನಿಂದ (ಆಡುಗೋಡಿ) ಚಲ್ಲಘಟ್ಟದವರೆಗಿನ ಸಂಪೂರ್ಣ ಮಾರ್ಗವು ಕಾರ್ಯನಿರ್ವಹಿಸಲಿದ್ದು, ಪೂರ್ವ-ಪಶ್ಚಿಮ ಕಾರಿಡಾರ್ ಪೂರ್ಣಗೊಳ್ಳಲಿದೆ. ಉತ್ತರ ಕಾರಿಡಾರ್ ನಲ್ಲಿನ ಮಾರ್ಗ ನಿರ್ಮಾಣಕ್ಕೆ ಸ್ವಲ್ಪ ಸಮಯ ಬೇಕಾಗಬಹುದು. ಗಿರ್ಡರ್ ಹಾಕಲು ನೈಸ್ ರಸ್ತೆ ಮೂಲಕ ಹಾದು ಹೋಗಬೇಕಾಗಿರುವುದರಿಂದ ಸಮಯ ಬೇಕಾಗುತ್ತದೆ. ಇದರ ನಂತರ 2023 ರ ಡಿಸೆಂಬರ್‌ನಲ್ಲಿ ಬೊಮ್ಮಸಂದ್ರ-ಆರ್‌ವಿ ರಸ್ತೆ ಮಾರ್ಗವನ್ನು ಕಾರ್ಯಗತಗೊಳಿಸಲಾಗುತ್ತದೆ. ಡಿಸೆಂಬರ್ 2024 ರಲ್ಲಿ ಸೆಂಟ್ರಲ್ ಸಿಲ್ಕ್ ಬೋರ್ಡ್‌ನಿಂದ ಕೆಆರ್ ಪುರಂಗೆ ಮತ್ತು ಕೆಆರ್ ಪುರಂನಿಂದ ವಿಮಾನ ನಿಲ್ದಾಣಕ್ಕೆ 2025 ರೊಳಗೆ ಮಾರ್ಗ ನಿರ್ಮಾಣಗೊಳ್ಳಲಿದೆ. ಇದರೊಂದಿಗೆ 2ನೇ ಹಂತದ ಮೆಟ್ರೋ ನಿರ್ಮಾಣ ಕಾರ್ಯ ಪೂರ್ಣಗೊಳ್ಳುತ್ತದೆ.

ಭವಿಷ್ಯದ ಯೋಜನೆಗಳು ಯಾವ ರೀತಿಯಲ್ಲಿರಲಿವೆ?
ಹಂತ-3 45 ಕಿಮೀ ಎರಡು ಕಾರಿಡಾರ್‌ಗಳನ್ನು ಹೊಂದಿರುತ್ತದೆ. ಇದು ಜೆಪಿ ನಗರ IV ಹಂತದಿಂದ ಕೆಂಪಾಪುರದವರೆಗೆ ಸಂಪರ್ಕವನ್ನು ಕಲ್ಪಿಸುತ್ತದೆ, ಇದು ರಿಂಗ್ ರಸ್ತೆಯ ಇನ್ನೊಂದು ಬದಿಯಿಂದ ಏರ್‌ಪೋರ್ಟ್ ಲೈನ್‌ನೊಂದಿಗೆ ವಿಲೀನಗೊಳ್ಳುತ್ತದೆ. ಹೊಸಹಳ್ಳಿಯಿಂದ ಮಾಗಡಿ ರಸ್ತೆವರೆಗೆ 12 ಕಿ.ಮೀವರೆಗೆ ಸಂಪರ್ಕ ಸಾಧಿಸಲಿದೆ. ಕಳೆದ ವರ್ಷ ಅಂದಿನ ಸಿಎಂ ಮೆಟ್ರೋ 3ನೇ ಹಂತದ ಬಗ್ಗೆ ಘೋಷಣೆ ಮಾಡಿದ್ದರು. ಸರ್ಜಾಪುರ-ಹೆಬ್ಬಾಳದಿಂದ ಇಬ್ಲೂರು ಜಂಕ್ಷನ್, ಅಗರ ಮತ್ತು ಕೋರಮಂಗಲದ ಮೂಲಕ ಏರ್‌ಪೋರ್ಟ್ ಲೈನ್‌ನೊಂದಿಗೆ ವಿಲೀನಗೊಳ್ಳುವ ಹೊಸ ಮಾರ್ಗವನ್ನು ಘೋಷಿಸಿದ್ದರು.

ಈ ಮಾರ್ಗದ ಮೂಲಕ ಹೆಬ್ಬಾಳವು ಮೆಗಾ ಸೆಂಟರ್ ಆಗಿ ಹೊರಹೊಮ್ಮಲಿದೆ. ಇಲ್ಲಿ ಮೂರು ನಿಲ್ದಾಣಗಳು ನಿರ್ಮಾಣಗೊಳ್ಳಲಿವೆ. ಎರಡು ಎತ್ತರದ ಮತ್ತು ಒಂದು ಭೂಗತ ನಿಲ್ದಾಣಗಳಿರಲಿವೆ. ಎಲ್ಲವನ್ನೂ ಸಂಯೋಜಿಸಲಾಗುವುದು. ಮೆಟ್ರೋ ಬಂಡವಾಳದ ಯೋಜನೆಯಾಗಿದೆ. ಪ್ರಸ್ತುತ ಸಿಗ್ನಲಿಂಗ್ ಮತ್ತು ರೋಲಿಂಗ್ ಸ್ಟಾಕ್ ಸೇರಿದಂತೆ ಪ್ರತಿ ಕಿ.ಮೀಗೆ ಸುಮಾರು 600 ಕೋಟಿ ರೂ ವೆಚ್ಚವಾಗುತ್ತಿದೆ. ಭೂಗತ ಅಡಿಯಲ್ಲಿ ಮಾರ್ಗ ನಿರ್ಮಾಣಕ್ಕೆ ಪ್ರತಿ ಕಿ.ಮೀಗೆ ಸುಮಾರು 750 ಕೋಟಿ ರು. ವೆಚ್ಚವಾಗುತ್ತದೆ. ಇದಕ್ಕೆ ಸಮಯ ಕೂಡ ಹೆಚ್ಚಾಗಿ ಬೇಕಾಗುತ್ತದೆ.

ಯಾವುದೇ ಮೆಟ್ರೋ ಯೋಜನೆಗೆ ಕನಿಷ್ಠ ಅವಧಿಯು ಸುಮಾರು ನಾಲ್ಕು ವರ್ಷಗಳು ಬೇಕಾಗುತ್ತದೆ. ನಾವು ನಮ್ಮ ಸಮಗ್ರ ಚಲನಶೀಲತೆಯ ಯೋಜನೆಯನ್ನು ಹೊಂದಿದ್ದೇವೆ. 2031 ರ ವೇಳೆಗೆ ನಮ್ಮ ಗುರಿ 317 ಕಿಮೀ ಮೆಟ್ರೋ ಸಂಪರ್ಕ ಆಗಿರುತ್ತದೆ. ಬೆಂಗಳೂರಿನಲ್ಲಿ 500 ಕಿಮೀ ಮೆಟ್ರೋ ಮಾರ್ಗವನ್ನು ನಿರ್ಮಾಣ ಮಾಡಲಾಗುತ್ತಿದ್ದು, ಇದು ದೇಶದಲ್ಲಿಯೇ ಅತೀ ದೊಡ್ಡ ಮೆಟ್ರೋ ಮಾರ್ಗ ಆಗುವ ವಿಶ್ವಾಸವಿದೆ.

ಮೆಟ್ರೋ ಟೋಕನ್ ವ್ಯವಸ್ಥೆ ಬಗ್ಗೆ ಏನು ಹೇಳುತ್ತೀರಿ?
ಭವಿಷ್ಯದಲ್ಲಿ ಟೋಕನ್‌ ವ್ಯವಸ್ಥೆ ಕಣ್ಮರೆಯಾಗಲಿದೆ. ಎಲ್ಲಾ ಪ್ರಯಾಣಿಕರು ಕ್ಯೂಆರ್ ಟಿಕೆಟಿಂಗ್‌ ವ್ಯವಸ್ಥೆಯನ್ನು ಅನುಸರಿಸಬೇಕಾಗುತ್ತದೆ. ಸ್ಮಾರ್ಟ್ ಕಾರ್ಡ್ ವ್ಯವಸ್ಥೆ ಕೂಡ ಕಣ್ಮರೆಯಾಗಲಿದೆ. ಆದರೆ, ಇದಕ್ಕೆಲ್ಲಾ ಇನ್ನೂ ಸಮಯ ಬೇಕು. ಸ್ವಯಂಚಾಲಿಕ ಟಿಕೆಟಿಂಗ್ ಯಂತ್ರ ಬಳಸುವ ಕುರಿತು ಚಿಂತನೆಗಳು ನಡೆದಿವೆ. ಈ ಯಂತ್ರಗಳು ಕಾಗದದ ಟಿಕೆಟ್ ಗಳನ್ನು ನೀಡುತ್ತವೆ. ಸಿಂಗಲ್ ಟ್ರ್ಯಾನ್ಸ್ಯಾಕ್ಷನ್ ಗಾಗಿ ಮಲ್ಟಿಪಲ್ ಕ್ಯೂಆರ್ ಕೋಡ್ ವ್ಯವಸ್ಥೆ ಪರಿಚಯಿಸುವ ಕುರಿತಂತೆಯೂ ಚಿಂತನೆಗಳು ನಡೆದಿವೆ. ಈ ವ್ಯವಸ್ಥೆ ಮೂಲಕ ಟಿಕೆಟ್ ಪಡೆದುಕೊಳ್ಳಲು ಒಂದು ಕುಟುಂಬ (ಗರಿಷ್ಠ 10 ಮಂದಿ) ಒಂದು ಕ್ಯೂಆರ್ ಕೋಡ್ ನ್ನು ಬಳಸಬಹುದಾಗಿದೆ.

ನಮ್ಮ ಮೆಟ್ರೋ ಬೆಂಗಳೂರು ಜನತೆಯ ಪ್ರಯಾಣದ ಮಾರ್ಗವನ್ನು ಬದಲಾಯಿಸುತ್ತಿದೆ…
ಮೆಟ್ರೋ ಒಂದು ಜೀವನಶೈಲಿಯಾಗಿದೆ. ಪ್ರತಿ ವ್ಯಕ್ತಿ 500 ಮೀಟರ್ ನಿಂದ 1 ಕಿ.ಮೀ ನಡೆಯುವ ಅಭ್ಯಾಸ ಬೆಳೆಸಿಕೊಳ್ಳಬೇಕು. ಮೆಟ್ರೋ ಮಾರ್ಗಗಳು ಸಂಪೂರ್ಣವಾಗಿ ನಿರ್ಮಾಣಗೊಂಡ ಬಳಿಕ 1 ಕಿಮೀ ಪ್ರದೇಶದೊಳಗೆ ಖಂಡಿತವಾಗಿಯೂ ಒಂದು ಮೆಟ್ರೋ ನಿಲ್ದಾಣ ಇರಲಿದೆ. ಮೆಟ್ರೋ ಗೇಮ್ ಚೇಂಜರ್ ಆಗಿದ್ದು, ಸೇಫ್ ಮೋಡ್ ಆಗಿರಲಿದೆ.

ಕೊನೆಯ ಮೈಲಿ ಸಂಪರ್ಕ ಸುಧಾರಿಸಲು ಇತರ ಸಂಸ್ಥೆಗಳೊಂದಿಗೆ ಮಾತುಕತೆ ನಡೆಸಲಾಗುತ್ತಿದೆಯೇ?
ಮೊದಲ ಮತ್ತು ಕೊನೆಯ ಮೈಲಿ ಸಂಪರ್ಕದಲ್ಲಿ ಕೆಲ ಸಮಸ್ಯೆಗಳಿವೆ. ಮಲ್ಟಿ ಮಾಡಲ್ ಇಂಟಿಗ್ರೇಷನ್ ಜೊತೆಗೆ ಬಿಎಂಟಿಸಿ ಫೀಡರ್ ಸೇವಗಳನ್ನು ಒದಗಿಸಬೇಕಾಗಿದೆ. ಆದರೆ, ನಿಗಮ ಆರ್ಥಿಕವಾಗಿ ಲಾಭದಾಯಕವಾಗಿಲ್ಲ. ಈ ಕುರಿತು ಬೆಂಗಳೂರು ಮಹಾನಗರ ಸಾರಿಗೆ ಸಂಸ್ಥೆ ಮತ್ತು ನಗರ ಭೂ ಸಾರಿಗೆ ಇಲಾಖೆ ಜೊತೆಗಿನ ಮಾತುಕತೆಗಳು ಮುಂದುವರೆದಿವೆ. ತಡೆರಹಿತ ಸಾರಿಗೆಯು ಆರ್ಥಿಕತೆಯನ್ನು ಹೆಚ್ಚಿಸುತ್ತದೆ, ಇದು ಸಮಯ ಉಳಿತಾಯಕ್ಕೂ ಕಾರಣವಾಗುತ್ತದೆ. ಬಿಎಂಟಿಸಿ ಈಗಾಗಲೇ 9 ಮೀಟರ್‌ ಬಸ್‌ಗಳನ್ನು ಖರೀದಿಸಿದೆ. ನಿಲ್ದಾಣಗಳ ಸಮೀಪದಲ್ಲಿ ಸುಲಭವಾಗಿ ಚಲಿಸಲು ಈ ಬಸ್ ಗಳ ಖರೀದಿ ಕುರಿತಂತೆಯೂ ಮಾತುಕತೆ ಮುಂದುವರೆದಿದೆ. ಈ ನಿಟ್ಟಿನಲ್ಲಿ ಬೈಕ್ ಟ್ಯಾಕ್ಸಿಗಳಂತೆ ದ್ವಿಚಕ್ರ ವಾಹನಗಳು ಅತ್ಯಂತ ಪ್ರಮುಖ ಪಾತ್ರ ವಹಿಸುತ್ತವೆ. ಇದೇ ಸಂದರ್ಭದಲ್ಲಿ ಮೆಟ್ರೋ ನಿಲ್ದಾಣಗಳ 500 ಮೀಟರ್‌ಗಳಲ್ಲಿ ಫುಟ್‌ಪಾತ್‌ಗಳನ್ನು ಸುಧಾರಿಸುವತ್ತ ಕೂಡ ಗಮನಹರಿಸಬೇಕಿದೆ.

ರಾತ್ರಿ ಪಾಳಿಯಲ್ಲಿ ಕೆಲಸ ಮಾಡುವವರು ಮೆಟ್ರೋ ಸೇವೆಗಳ ಪಡೆಯಲು ಮೆಟ್ರೋ ಸಮಯವನ್ನು ವಿಸ್ತರಿಸುವ ಕುರಿತು ಚಿಂತನೆಗಳಿವೆಯೇ?
ಇದು ಆರ್ಥಿಕ ವಿಚಾರಕ್ಕೆ ಸಂಬಂಧಿಸಿದ್ದಾಗಿದೆ. ನಾವು ರಾಜ್ಯ ಮತ್ತು ಕೇಂದ್ರದಿಂದ ಬಂಡವಾಳ ಹೂಡಿಕೆಗೆ ಸಂಪನ್ಮೂಲಗಳನ್ನು ಪಡೆಯುತ್ತೇವೆ. ಆದರೆ ಕಾರ್ಯಾಚರಣೆ ಮತ್ತು ನಿರ್ವಹಣೆಗೆ ವಿಚಾರ ಬಂದಾಗ ಮೆಟ್ರೋ ತನ್ನದೇ ಆದ ಸಂಪನ್ಮೂಲಗಳನ್ನು ಪಡೆಯಬೇಕಾಗುತ್ತದೆ. ರೈಲುಗಳು ಉತ್ತಮ ಆವರ್ತನವನ್ನು ಹೊಂದಿಲ್ಲದಿದ್ದರೆ ಅದು ಸಹಾಯ ಮಾಡುವುದಿಲ್ಲ. ರೈಲು ಹತ್ತಲು ರಾತ್ರಿ ವೇಲೆ 30 ನಿಮಿಷ ಕಾಯಲು ಯಾರೂ ಇಷ್ಟಪಡುವುದಿಲ್ಲ. ಸುರಕ್ಷತೆಯ ಸಮಸ್ಯೆಗಳೂ ಮುಖ್ಯವಾಗುತ್ತವೆ. ಡಬಲ್ ಶಿಫ್ಟ್‌ಗಳಿಗೆ ಹೆಚ್ಚಿನ ಸಿಬ್ಬಂದಿಗಳ ಅಗತ್ಯವಿರುತ್ತದೆ. ಅದು ಆರ್ಥಿಕವಾಗಿ ಕಾರ್ಯಸಾಧ್ಯವಲ್ಲ.

​ಕೆಎಸ್‌ಆರ್‌ ನಿಲ್ದಾಣಕ್ಕೆ ಬೇಗ ತಲುಪುವ ಅನೇಕ ಪ್ರಯಾಣಿಕರು ಮೆಟ್ರೋ ರೈಲು ಹತ್ತಲು ಗಂಟೆಗಟ್ಟಲೆ ಕಾಯುತ್ತಾರೆ... ವೀಕೆಂಡ್ ಸಮಯದಲ್ಲಿ ಬೆಳಿಗ್ಗೆ 7 ಗಂಟೆ ಮುಂಚಿತವಾಗಿ ಮೆಟ್ರೋ ರೈಲುಗಳ ಸಂಚಾರ ಕಲ್ಪಿಸಬಹುದಲ್ಲವೇ?
ಪ್ರಯಾಣಿಕರ ಸಂಖ್ಯೆ ಹೆಚ್ಚಾಗದಿದ್ದರೆ, ಅದು ಆದಾಯದ ಮೇಲೆ ಹೊಡೆತ ಬೀಳುತ್ತದೆ. ಹೆಚ್ಚಿನ ಆದಾಯ ಬಂದರೆ ಇದನ್ನು ಪರಿಗಣಿಸಬಹುದು. ಈ ಕುರಿತು ಚಿಂತನೆ ನಡೆಸಲಾಗುತ್ತದೆ.

ಮೆಟ್ರೋದಲ್ಲಿ ಹೆಚ್ಚು ಜನರು ಸಂಚರಿಸುವಂತೆ ಮಾಡಲು ಯಾವ ರೀತಿಯ ತಂತ್ರ ರೂಪಿಸಲಾಗುತ್ತದೆ?
ಬೈಕ್ ಹಾಗೂ ಆಟೋಗಳಲ್ಲಿ ಪ್ರಯಾಣಿಸುವ ಜನರ ಮೇಲೆ ನಮ್ಮ ಗಮನ ಕೇಂದ್ರೀಕೃತವಾಗಿದೆ. ದ್ವಿಚಕ್ರ ವಾಹನಗಳು ಸುರಕ್ಷಿತ ಸಾರಿಗೆ ವಿಧಾನವಲ್ಲ ಎಂದು ಜಾಗೃತಿ ಅಭಿಯಾನಗಳನ್ನು ನಡೆಸುತ್ತೇವೆ. ಏಕೆಂದರೆ ಗರಿಷ್ಠ ರಸ್ತೆ ಸಾವುಗಳು ಬೈಕ್ ಗಳಲ್ಲಿಯೇ ಸಂಭವಿಸುತ್ತವೆ. ಸಾಂಕ್ರಾಮಿಕ ರೋಗ ಸಂದರ್ಭದಲ್ಲಿ ಅಪಘಾತ ಸಂಖ್ಯೆಗಳು ಸಾಕಷ್ಟು ಕಡಿಮೆಯಾಗಿತ್ತು. ಮೆಟ್ರೋ ರೈಲುಗಳನ್ನು ಬಳಸುವಂತೆ ಐಟಿ ಮತ್ತು ವಸತಿ ಸಂಕೀರ್ಣಗಳೊಂದಿಗೆ ಮಾತುಕತೆ ನಡೆಸುತ್ತಿದ್ದೇವೆ. ವೈಟ್‌ಫೀಲ್ಡ್‌ನಲ್ಲಿ ಕನಿಷ್ಠ 100 ಫ್ಲಾಟ್‌ಗಳನ್ನು ಹೊಂದಿರುವ ಐಟಿ ಪಾರ್ಕ್‌ಗಳು ಮತ್ತು ಅಪಾರ್ಟ್‌ಮೆಂಟ್‌ಗಳಲ್ಲಿ ಮೆಟ್ರೋ ಫೀಡರ್ ಬಸ್‌ಗಳ ನಿಯೋಜಿಸಲಾಗುತ್ತದೆ. ಈ ಬಸ್‌ಗಳು ಅವರ ಗೇಟ್‌ನಲ್ಲಿಯೇ ನಿಲ್ಲುತ್ತವೆ. ಎಸಿ ಬಸ್‌ಗಳ ವ್ಯವಸ್ಥೆ ಕಲ್ಪಿಸಲೂ ಪ್ರಯತ್ನಿಸುತ್ತಿದ್ದೇವೆ. ನೌಕರರಿಗೆ ಕ್ಯಾಬ್ ಸರ್ವಿಸ್ ಗಳ ಬದಲಿಕೆ ಮೆಟ್ರೋ ರೈಲುಗಳ ಪಾಸ್ ನೀಡುವಂತೆಯೂ ಕಂಪನಿಗಳೊಂದಿಗೆ ಮಾತುಕತೆ ನಡೆಸುತ್ತಿದ್ದೇವೆ.  ITPLನಂತೆಯೇ ಕ್ಯಾಂಪಸ್‌ಗಳ ಒಳಗೆ ಸಂಪರ್ಕವನ್ನು ಒದಗಿಸುವ ಪ್ರಯತ್ನ ಮಾಡಲಾಗುತ್ತಿದೆ.

ಮೆಟ್ರೋ ಬಳಕೆಯಿಂದ ರಸ್ತೆಗಳಲ್ಲಿ ಸಂಚಾರ ದಟ್ಟಣೆ ಕಡಿಮೆಯಾಗಲಿದೆ. ಹೊಸ ಮೆಟ್ರೋ ನಿಲ್ದಾಣದಿಂದ 28 ಸಾವಿರ ಜನರು ಮೆಟ್ರೋ ರೈಲುಗಳ ಬಳಕೆ ಮಾಡುತ್ತಿದ್ದಾರೆ. ಇದರಿಂದಾಗಿ ವೈಟ್‌ಫೀಲ್ಡ್ ನಲ್ಲಿ ಈ ಹಿಂದೆ ಇದ್ದಷ್ಟು ಸಂಚಾರದಟ್ಟಣೆಗಳು ಎದುರಾಗುತ್ತಿಲ್ಲ. ಕೆಆರ್ ಪುರಂ-ಬೈಯಪ್ಪನಹಳ್ಳಿ ಮಾರ್ಗ ಸಂಪರ್ಕಗೊಂಡರೆ ಸುಮಾರು ಒಂದು ಲಕ್ಷ ಜನರು ಮೆಟ್ರೋ ಬಳಕೆ ಮಾಡಲು ಆರಂಭಿಸುತ್ತಾರೆ. ಇದರಿಂದ ವೈಟ್‌ಫೀಲ್ಡ್‌ನ ರಸ್ತೆಗಳಲ್ಲಿ ಸಂಚಾರ ದಟ್ಟಣೆ ಮತ್ತಷ್ಟು ಕಡಿಮೆಯಾಗಲಿವೆ. ನಾವು ಮೆಟ್ರೋ ನಿಲ್ದಾಣಗಳ ಒಳಗೆ ಅಂಗಡಿಗಳನ್ನು ಸ್ಥಾಪಿಸುವ ಪ್ರಯತ್ನಗಳೂ ನಡೆಯುತ್ತಿವೆ. ಇದರಿಂದ ಜನರು ನಿಲ್ದಾಣದಲ್ಲಿಯೇ ದಿನಸಿ ಹಾಗೂ ಆಹಾರ ಪದಾರ್ಥಗಳನ್ನೂ ಖರೀದಿ ಮಾಡಬಹುದು. ನಾಲ್ಕು ತಿಂಗಳ ಹಿಂದೆ ಸಣ್ಣಪುಟ್ಟ ಮಳಿಗೆಗಳಿಗೂ ಟೆಂಡರ್ ಕರೆಯಲಾಗಿದೆ, ಆದರೆ ಬಿಎಂಆರ್‌ಸಿಎಲ್‌ನ ಬಾಡಿಗೆ ಹೆಚ್ಚಾಗಿರುವುದರಿಂದ ಪ್ರತಿಕ್ರಿಯೆಗಳು ಬಂದಿಲ್ಲ. ಹೀಗಾಗಿ ಬಾಡಿಗೆಯನ್ನು ಶೇ.50ರಷ್ಟು ಕಡಿಮೆ ಮಾಡಿದ್ದೇವೆ. 1,50,000 ಚದರ ಅಡಿ ಪ್ರದೇಶವನ್ನು ಈ ಮಳಿಗೆಗಳಿಗೆ ನೀಡುತ್ತಿದ್ದೇವೆ.

ನಾವು ಟ್ರಾನ್ಸಿಟ್ ಓರಿಯೆಂಟೆಡ್ ಡೆವಲಪ್‌ಮೆಂಟ್‌ನಲ್ಲಿ ಕೆಲಸ ಮಾಡುತ್ತಿದ್ದೇವೆ, ಇದು ಮೆಟ್ರೋ ಕಾರಿಡಾರ್ ಅನ್ನು ಸಾಂದ್ರೀಕರಿಸುವುದು ಮತ್ತು ವಸತಿ ಮತ್ತು ವಾಣಿಜ್ಯ ಗುಣಲಕ್ಷಣಗಳಂತಹ ಮಿಶ್ರ ಅಭಿವೃದ್ಧಿಯನ್ನು ಅನುಮತಿಸುತ್ತದೆ ಆದ್ದರಿಂದ ಮೆಟ್ರೋ ಎಲ್ಲವನ್ನೂ ಸಂಪರ್ಕಿಸುತ್ತದೆ. ನಾವು ಮೆಟ್ರೋ ನಿಲ್ದಾಣಗಳ ಒಳಗೆ ಅಂಗಡಿಗಳನ್ನು ಸಹ ಪ್ರಚಾರ ಮಾಡುತ್ತಿದ್ದೇವೆ ಆದ್ದರಿಂದ ನೀವು ದಿನಸಿ ಮತ್ತು ಆಹಾರವನ್ನು ಖರೀದಿಸಬಹುದು. ನಾವು ನಾಲ್ಕು ತಿಂಗಳ ಹಿಂದೆ ಚಿಲ್ಲರೆ ಮಳಿಗೆಗಳಿಗೆ ಟೆಂಡರ್ ಕರೆದಿದ್ದೇವೆ, ಆದರೆ ಬಿಎಂಆರ್‌ಸಿಎಲ್‌ನ ಬಾಡಿಗೆ ನಿರೀಕ್ಷೆ ಸಾಕಷ್ಟು ಹೆಚ್ಚಿದ್ದರಿಂದ ಯಾವುದೇ ಪ್ರತಿಕ್ರಿಯೆ ಬಂದಿಲ್ಲ. 50ರಷ್ಟು ಕಡಿಮೆ ಮಾಡಿದ್ದೇನೆ. ನಾವು 1,50,000 ಚದರ ಅಡಿ ವಾಣಿಜ್ಯ ಜಾಗವನ್ನು ನೀಡುತ್ತಿದ್ದೇವೆ.

ನಿಮ್ಮನ್ನು ಬೆಂಬಲಿಸುವ ಅತ್ಯುತ್ತಮ ವ್ಯವಸ್ಥೆಯಲ್ಲಿ ಟ್ರಾಫಿಕ್ ಪೊಲೀಸ್ ಕೂಡ ಒಬ್ಬರು. ಅವರ ಬೆಂಬಲ ಹೇಗಿದೆ?
ಟ್ರಾಫಿಕ್ ಪೊಲೀಸರೊಂದಿಗೆ ನಿಕಟ ಸಂಬಂಧವಿದೆ. ಇತ್ತೀಚೆಗೆ ಬಿಎಂಆರ್'ಸಿಎಲ್ ನೆರವಿನೊಂದಿಗೆ ಐದು ನಿಲ್ದಾಣಗಳಲ್ಲಿ ಪ್ರಿಪೇಯ್ಡ್ ಆಟೋಗಳನ್ನು ಪ್ರಾರಂಭಿಸಲಾಯಿತು. ನಿರ್ಮಾಣದ ಸಮಯದಲ್ಲಿ, ಟ್ರಾಫಿಕ್ ಪೊಲೀಸರು ನಮ್ಮ ಬೆನ್ನೆಲುಬಾಗಿದ್ದರು. ಸಂಚಾರ ದಟ್ಟಣೆ ಇರುವ ಪ್ರದೇಶದಲ್ಲಿ ಮೆಟ್ರೋ ನಿರ್ಮಾಣ ಮಾಡುವುದು ನಮಗೆ ಎದುರಾಗಿರುವ ದೊಡ್ಡ ಸವಾಲಾಗಿದೆ. ಹೊರ ವರ್ತುಲ ರಸ್ತೆಯಲ್ಲಿ ಮೆಟ್ರೋ ನಿರ್ಮಾಣ ದುಃಸ್ವಪ್ನವಾಗಿ ಪರಿಣಮಿಸಿದೆ. ಈ ಸಂದರ್ಭದಲ್ಲಿ ಸಂಚಾರ ಪೊಲೀಸರು ನಮಗೆ ನೆರವಾಗುತ್ತಿದ್ದಾರೆ. ಟ್ರಾಫಿಕ್ ಪೊಲೀಸರು, ಬಿಬಿಎಂಪಿ ಮತ್ತು ಬಿಎಂಆರ್‌ಸಿಎಲ್ ನಡೆಸಿದ ಚಿಂತನ-ಮಂಥನ ಅಧಿವೇಶನದ ಪರಿಣಾಮವಾಗಿ ಕೆಆರ್ ಪುರಂ ಜಂಕ್ಷನ್‌ನಲ್ಲಿ ಕಾಯುವ ಸಮಯ ಸುಮಾರು 12 ನಿಮಿಷದಿಂದ 3 ನಿಮಿಷಕ್ಕೆ ಇಳಿದಿದೆ.

ಶ್ರೇಣಿ -2 ನಗರಗಳಲ್ಲಿ ಹೇಗೆ ನೋಡುತ್ತೀರಿ? ಹುಬ್ಬಳ್ಳಿ-ಧಾರವಾಡ ಮತ್ತು ಮೈಸೂರು ಮತ್ತು ಇತರ ನಗರಗಳು ವೇಗವಾಗಿ ಬೆಳೆಯುತ್ತಿವೆ. ಅಲ್ಲಿ ನಮ್ಮ ಮೆಟ್ರೋ ಆರಂಭದ ಬಗ್ಗೆ ಏನು ಹೇಳುತ್ತೀರಿ?
20 ಲಕ್ಷ ಜನಸಂಖ್ಯೆ ತಲುಪದ ಹೊರತು, ಮೆಟ್ರೋ ಕಾರ್ಯಾಚರಣೆ ಬಗ್ಗೆ ಆಲೋಚನೆಗಳು ಬಾರದು. ಚಾಲನೆಯ ವೆಚ್ಚವು ಹೆಚ್ಚಾಗಿರುತ್ತದೆ. ಮೈಸೂರಿನಂತಹ ಸಣ್ಣ ನಗರದಲ್ಲಿ ಅಥವಾ ಹುಬ್ಬಳ್ಳಿ-ಧಾರವಾಡದಲ್ಲಿ ನಮ್ಮ ಮೆಟ್ರೋ ಯಶಸ್ವಿಯಾಗುವುದಿಲ್ಲ. ಇದರ ಬದಲಿಗೆ ಉಪನಗರ ಜಾಲಗಳ ಮೂಲಕ ಹೊಸಕೋಟೆ, ದೇವನಹಳ್ಳಿ ಅಥವಾ ಬಿಡದಿಯಂತಹ ಪ್ರದೇಶಗಳಿಗೆ ಸಾರಿಗೆ ಕೊಂಡೊಯ್ಯುವತ್ತ ಗಮನಹರಿಸಬೇಕು.

ಮುಂಬರುವ ಉಪನಗರ ರೈಲಿನೊಂದಿಗೆ ಮೆಟ್ರೋ ಸಂಪರ್ಕ ಸಂಯೋಜಿಸುವ ಕುರಿತು ಚಿಂತನೆಗಳಿವೆಯೇ?
ಆ ಎಲ್ಲಾ ಹಂತಗಳಲ್ಲಿ ನಾವು FOB ಅನ್ನು ಹೊಂದಿದ್ದೇವೆ. ಕೆಆರ್ ಪುರಂ, ಯಶವಂತಪುರ ಮತ್ತು ವೈಟ್‌ಫೀಲ್ಡ್ ರೈಲು ನಿಲ್ದಾಣಗಳೊಂದಿಗೆ ಮೆಟ್ರೋ ಸಂಪರ್ಕ ಕಲ್ಪಿಸಲು ಪ್ರಯತ್ನಿಸುತ್ತಿದ್ದೇವೆ. ಕೆಎಸ್ಆರ್''ಟಿಸಿ ಮತ್ತು ಬಿಎಂಟಿಸಿ ನಿಲ್ದಾಣಗಳೊಂದಿಗೆ ಮೆಟ್ರೋ ಸಂಪರ್ಕಿಸುವ ಪ್ರಯತ್ನಗಳ ನಡೆಸಲಾಗುತ್ತಿದೆ.

ಮೆಟ್ರೋಗೆ ಶಕ್ತಿ ತುಂಬುವಲ್ಲಿ ಸೌರಶಕ್ತಿಯ ಪಾತ್ರವೇನು?
ಬೆಸ್ಕಾಂನಿಂದ ಸ್ವತಂತ್ರವಾಗಲು ಪ್ರಯತ್ನಿಸುತ್ತಿದ್ದೇವೆ. ಮೊದಲು ಕೇವಲ 1 ಮೆಗಾವ್ಯಾಟ್ ಸೋಲಾರ್ ಪ್ಲಾಂಟ್‌ನೊಂದಿಗೆ ಕಾರ್ಯ ಪ್ರಾರಂಭಿಸಲಾಗಿತ್ತು. ಈಗ 20 ಮೆಗಾವ್ಯಾಟ್‌ನಷ್ಟು ಕಾಮಗಾರಿ ನಡೆಯುತ್ತಿದೆ. ಹಂತ-I ಮೆಟ್ರೋ ನಿಲ್ದಾಣಗಳ ಮೇಲ್ಛಾವಣಿಗಳನ್ನು ಸೋಲಾರ್ ಪ್ಯಾನಲ್ ಗಳಿಂದ ಮುಚ್ಚಲಾಗುತ್ತಿದೆ. ಭವಿಷ್ಯದ ಮೆಟ್ರೊ ನಿಲ್ದಾಣಗಳು ಮೇಲ್ಭಾಗದಲ್ಲಿ ಸೌರ ಫಲಕಗಳನ್ನು ಹೊಂದಿರುತ್ತವೆ. ಇದರಿಂದ ನಮ್ಮ ಶೇ.30-35ರಷ್ಟು ಅವಶ್ಯಕತೆಗಳು ಉಪಯೋಗವಾಗುತ್ತಿದೆ. ಇದರ ಜೊತೆಗೆ ಬ್ರೇಕ್ ಎನರ್ಜಿ' ಎಂಬ ಉಪಕ್ರಮವನ್ನ ಆರಂಭಿಸಿದ್ದೇವೆ. ರೈಲಿನ ಬ್ರೇಕ್ ಹಾಕಿದಾಗಲೆಲ್ಲಾ ಘರ್ಷಣೆಯು ಶಕ್ತಿಯನ್ನು ಉತ್ಪಾದಿಸುತ್ತದೆ. ಅದನ್ನು ಶೇಖರಿಸಲಾಗುತ್ತದೆ. ನಂತರ ಅದನ್ನು ಫೀಡರ್'ಗೆ ಹಿಂತಿರುಗಿಸಲಾಗುತ್ತಿದೆ. ಈ ಪುನರುತ್ಪಾದಕ ಶಕ್ತಿಯ ಮೂಲಕ ನಮ್ಮ ವಿದ್ಯುತ್ ಬಿಲ್ ಶೇ.20 ರಷ್ಟು ಕಡಿಮೆಯಾಗುತ್ತದೆ ಎಂದು ಹೇಳಿದ್ದಾರೆ.