ಮೈಸೂರು: ಮಂಗವೊಂದು ಸಲೂನ್ಗೆ ನೇರವಾಗಿ ಬಂದು ಗ್ರಾಹಕನಂತೆ ಕುಳಿತು ‘ಹೇರ್ಕಟ್’ ಮಾಡಿಸಿಕೊಂಡ ಅಪರೂಪದ ಘಟನೆ ಚಾಮರಾಜನಗರ ಜಿಲ್ಲೆಯ ಸಂತೇಮರಹಳ್ಳಿ ಗ್ರಾಮದಲ್ಲಿ ನಡೆದಿದೆ. ಈ ಘಟನೆಯ ವೀಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್ ಆಗಿದೆ.
ಸಲೂನ್ ಮಾಲೀಕ ದೇವರಾಜು ಹೇಳುವಂತೆ, ಕಳೆದ ಕೆಲವು ದಿನಗಳಿಂದ ಕೆಲವು ಮಂಗಗಳು ಅಂಗಡಿ ಸುತ್ತಮುತ್ತ ತಿರುಗಾಡುತ್ತಿದ್ದು, ಗುರುವಾರ ಅವುಗಳಲ್ಲಿ ಒಂದು ಮಂಗ ನೇರವಾಗಿ ಅಂಗಡಿಯೊಳಗೆ ಬಂದಿತು. ಕನ್ನಡಿಯ ಮುಂದೆ ನಿಂತು ಕೆಲ ನಿಮಿಷಗಳ ಕಾಲ ತನ್ನನ್ನು ನೋಡಿಕೊಳ್ಳುತ್ತಿತ್ತು. ಇದನ್ನು ನೋಡಿ ಮೊದಲಿಗೆ ನನಗೆ ಭಯವಾಯಿತು. ಆದರೆ, ಅದು ತುಂಬಾ ಶಾಂತವಾಗಿರುವುದು ನೋಡಿ ಆಶ್ಚರ್ಯವಾಯಿತು.
ನಂತರ ಮಂಗ ಸಲೂನ್ ಕುರ್ಚಿಯ ಮೇಲೆ ಕುಳಿತುಕೊಂಡಾಗ ನಿಧಾನವಾಗಿ ತಲೆಗೆ ಮಸಾಜ್ ಮಾಡಿದೆ. “ಮೊದಲು ಭಯವಿತ್ತು. ಆದರೆ ಅದಕ್ಕೆ ಮಸಾಜ್ ತುಂಬ ಇಷ್ಟವಾಯಿತು ಇರಬೇಕು. ಕೆಲ ಹೊತ್ತು ಕಣ್ಣು ಮುಚ್ಚಿಕೊಂಡೇ ಕುಳಿತಿತ್ತು.
ಅದಾದ ಬಳಿಕ ಮಂಗವೇ ಹೇರ್ಕಟ್ ಮಾಡಿಸಿಕೊಳ್ಳುವಂತೆ ಸಂಜ್ಞೆ ನೀಡಿದಂತೆ ಕಂಡುಬಂದಿತು. ಇದರಿಂದ ಕತ್ತರಿ, ಬಾಚಣಿಕೆ ಹಿಡಿದು ಅದರ ಕೂದಲು ಸರಿಪಡಿಸುವಂತೆ ನಟಿಸಿದೆ ಎಂದು ಹೇಳಿದ್ದಾರೆ.
ಅಚ್ಚರಿಯ ಸಂಗತಿ ಏನೆಂದರೆ, ಮಂಗ ಸಾಮಾನ್ಯ ಗ್ರಾಹಕನಂತೆ ಶಾಂತವಾಗಿ ಕುಳಿತುಕೊಂಡೇ ಸಹಕರಿಸಿತು. ಅಂಗಡಿಯಲ್ಲಿದ್ದ ಇತರರು ಓಡಿಸಲು ಯತ್ನಿಸಿದರೂ, ‘ಗ್ರೂಮಿಂಗ್ ಸೆಷನ್’ ಮುಗಿಯುವವರೆಗೆ ಅದು ಅಲ್ಲಿಂದ ತೆರಳಲಿಲ್ಲ ಎಂದು ತಿಳಿಸಿದ್ದಾರೆ.
ಈ ದೃಶ್ಯಗಳನ್ನು ದೇವರಾಜು ಸ್ನೇಹಿತರು ಮೊಬೈಲ್ನಲ್ಲಿ ಸೆರೆಹಿಡಿದಿದ್ದು, ಈ ಕುರಿತ ವಿಡಿಯೊ ಮತ್ತು ಫೋಟೋಗಳು ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿವೆ.
Advertisement
