ನವದೆಹಲಿ: ಜನ ಲೋಕಪಾಲ ಕಾಯ್ದೆಯನ್ನು ಮಂಡಿಸುವಂತೆ ದೆಹಲಿ ವಿಧಾನಸಭೆಯಲ್ಲಿ ಬಿಜೆಪಿ ಆಗ್ರಹಿಸಿದ್ದರಿಂದ ಚಳಿಗಾಲದ ಅಧಿವೇಶನ ಗದ್ದಲಮಯವಾಗಿತ್ತು.
ಬಿಜೆಪಿ ಪಕ್ಷದ ಮೂರು ಸದಸ್ಯರ ಮುಖಂಡ ವಿಜೇಂದರ್ ಗುಪ್ತ, ಸರ್ಕಾರ ಲೋಕ ಜನಪಾಲ ಮಸೂದೆಯನ್ನು ಕೂಡಲೆ ಮಂಡಿಸಬೇಕೆಂದು ಗುಡುಗಿದ್ದಾರೆ. ಇನ್ನುಳಿದ ೬೭ ಸದಸ್ಯರು ಆಡಳಿತ ಪಕ್ಷ ಆಮ್ ಆದ್ಮಿ ಪಕ್ಷಕ್ಕೆ ಸೇರಿದವರು.
ಇದು ವಿಧಾನಸಭೆಯ ಮೊದಲ ಅಧಿವೇಶನ, ಶಾಸನಗಳನ್ನು ನಂತರ ಮಂಡಿಸಬಹುದು ಎಂದು ಸ್ಪೀಕರ್ ಹೇಳಿದ್ದಾರೆ.
ಚುನಾವಣಾ ಪ್ರಚಾರ ವೇಳೆಯಲ್ಲಿ ವಚನ ನೀಡಿದ್ದರೂ ಜನ ಲೋಕಪಾಲ ಮಸೂದೆಯನ್ನು ಜಾರಿ ಮಾಡದೆ ಇರುವುದಕ್ಕೆ ಎಎಪಿ ಸರ್ಕಾರ ಕಟು ಟೀಕೆಯನ್ನು ಎದುರಿಸುತ್ತಿದೆ.
ಸರ್ಕಾರದ ಮೂಲಗಳ ಪ್ರಕಾರ ಹೊಸ ಮಸೂದೆಯನ್ನು ಮಂಡಿಸುವ ಬದಲು ಸರ್ಕಾರ ದೆಹಲಿ ಲೋಕಾಯುಕ್ತ ಕಾಯ್ದೆಗೆ ತಿದ್ದುಪಡಿ ತರಲಿದೆ ಎನ್ನಲಾಗಿದೆ.
