ಮಾಜಿ ಪ್ರೇಯಸಿ ಎದುರೆ ಮಾಲ್ ನಿಂದ ಹಾರಿ ಭಗ್ನ ಪ್ರೇಮಿ ಆತ್ಮಹತ್ಯೆ!

ಥಾಣೆ: ಅತ್ಯಾಚಾರ ಪ್ರಕರಣ ದಾಖಲಿಸಿದ್ದ ಮಾಜಿ ಪ್ರೇಯಸಿ ಎದುರೆ ಮಾಲ್ ನ ಐದನೇ ಅಂತಸ್ಥಿನಿಂದ ಜಿಗಿದು ಭಗ್ನ ಪ್ರೇಮಿಯೊಬ್ಬ ಆತ್ಮಹತ್ಯೆ ಮಾಡಿಕೊಂಡಿರುವ ಘಟನೆ ಮುಂಬೈನ ಥಾಣೆಯಲ್ಲಿ ನಡೆದಿದೆ. 

ಆತ್ಮಹತ್ಯೆ ಮಾಡಿಕೊಂಡ ಭಗ್ನ ಪ್ರೇಮಿಯನ್ನು 24 ವರ್ಷದ ವೈಭವ್ ವಿಷ್ಣು ಅಝ್ಗೇಕರ್ ಥಾಣೆಯ ಬಲ್ಕುಮ್ ನ ದದ್ಲಾನಿ ಪಾಕ್ ನ ನಿವಾಸಿ ಎಂದು ತಿಳಿದುಬಂದಿದೆ. ಇತ ಕಾಲ್ ಸೆಂಟರ್ ನಲ್ಲಿ ಕೆಲಸ ಮಾಡುತ್ತಿದ್ದ 20 ಹರೆಯದ ಯುವತಿಯೊಬ್ಬಳನ್ನು ಮದುವೆಯಾಗುವುದಾಗಿ ಹೇಳಿ ಲೈಂಗಿಕವಾಗಿ ಬಳಸಿಕೊಂಡಿದ್ದು, ಈ ಸಂಬಂಧ ಯುವತಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ್ದಳು. ಪ್ರಕರಣ ಸಂಬಂಧ ವೈಭವ್ ಜೈಲಿನಲ್ಲಿದ್ದು ಬೇಲ್ ಮೇಲೆ ಹೊರ ಬಂದಿದ್ದ. 

ಇಂದು ಮಾಜಿ ಪ್ರೇಯಸಿಯನ್ನು ಭೇಟಿ ಮಾಡಿದ ವೈಭವ್ ಮದುವೆಯಾಗುವುದಾಗಿ ಪೀಡಿಸಿದ್ದಾನೆ. ಆತನ ಮನವಿಯನ್ನು ಪ್ರೇಯಸಿ ತಿರಸ್ಕರಿಸಿದ್ದಾಳೆ. ಈ ವೇಳೆ ಮನನೊಂದ ಪ್ರೇಮಿ ಮಾಲ್ ನ ಐದನೇ ಅಂತಸ್ಥಿನಿಂದ ಜಿಗಿದಿದ್ದಾನೆ. ತೀವ್ರವಾಗಿ ಗಾಯಗೊಂಡಿದ್ದ ವೈಭವ್ ನನ್ನು ಆಸ್ಪತ್ರೆಗೆ ದಾಖಲಿಸಿದ್ದಾರೆ. ಆದರೆ ಆ ವೇಳೆಗಾಗಲೇ ವೈಭವ್ ಮೃತಪಟ್ಟಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ.