ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿ ಅವರ ಸಮಯ ಪ್ರಜ್ಞೆ ದೂರದರ್ಶನದ ಛಾಯಾಗ್ರಾಹಕನ ಜೀವವನ್ನು ಉಳಿಸಿದೆ.
ಗುಜರಾತ್ ನ ಅಜಿ-3 ಅಣೆಕಟ್ಟಿನಿಂದ ನೀರು ಬಿಡುವ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದ ಪ್ರಧಾನಿ ನರೇಂದ್ರ ಮೋದಿ, ಕಾರ್ಯಕ್ರಮದ ವರದಿ ಮಾಡುತ್ತಿದ್ದ ಛಾಯಾಗ್ರಾಹಕರತ್ತ ನೀರು ರಭಸದಿಂದ ಹರಿದು ಬರುತ್ತಿದ್ದದ್ದನ್ನು ಗಮನಿಸಿದ್ದಾರೆ. ಆದರೆ ಪತ್ರಕರ್ತರಿಗೆ ಮಾತ್ರ ಇದರ ಬಗ್ಗೆ ಸುಳಿವಿರಲಿಲ್ಲ, ತಕ್ಷಣವೇ ಎಚ್ಚೆತ್ತ ಪ್ರಧಾನಿ ನರೇಂದ್ರ ಮೋದಿ ಕ್ಯಾಮರಾಗಳಿಂದ ಪಕ್ಕಕ್ಕೆ ಸರಿಯುವಂತೆ ಡಿಡಿ ಛಾಯಾಗ್ರಾಹಕನಿಗೆ ಸೂಚನೆ ನೀಡಿದ್ದಾರೆ.
ಒಂದು ವೇಳೆ ಪ್ರಧಾನಿ ನರೇಂದ್ರ ಮೋದಿ ಪತ್ರಕರ್ತರತ್ತ ನೀರು ಹರಿದುಬರುತ್ತಿದ್ದದ್ದನ್ನು ಗಮನಿಸದೆ ಇದ್ದಿದ್ದರೆ ಕಾರ್ಯಕ್ರಮದ ವರದಿ ನೀಡುತ್ತಿದ್ದ ಛಾಯಾಗ್ರಾಹಕ ನೀರಿನಲ್ಲಿ ಕೊಚ್ಚಿ ಹೋಗಿರುತ್ತಿದ್ದರು ಎಂದು ಘಟನೆಯನ್ನು ವಿವರಿಸಿರುವ ಗುಜರಾತ್ ನ ಉಪಮುಖ್ಯಮಂತ್ರಿ ನಿತಿನ್ ಪಟೇಲ್ ಹೇಳಿದ್ದಾರೆ. ಪ್ರಧಾನಿ ಸರಿಯಾದ ಸಮಯದಲ್ಲಿ ಸೂಚನೆ ನೀಡಿದ್ದಕ್ಕೆ ಪಕ್ಕಕ್ಕೆ ಸರಿದ ಪತ್ರಕರ್ತರು ಅಪಾಯದಿಂದ ತಪ್ಪಿಸಿಕೊಂಡಿದ್ದಾರೆ.
