ನವದೆಹಲಿ: ನೀರಿನ ಕೊರತೆ ಇತ್ತೀಚಿನ ದಿನಗಳಲ್ಲಿ ಇಡಿ ವಿಶ್ವವನ್ನು ಆತಂಕಕ್ಕೀಡುಮಾಡಿರುವ ವಿಷಯವಾಗಿದೆ. ಹೊಸ ಅಧ್ಯಯನ ವರದಿ ಪ್ರಕಾರ ವಿಶ್ವದ ಹಲವು ಪ್ರದೇಶಗಳಲ್ಲಿ ಊಹೆಗೂ ಮೀರಿದಷ್ಟು ನೀರಿನ ಕೊರತೆ ಎದುರಾಗಿದೆ.
ಪ್ರಪಂಚದಾದ್ಯಂತ 4 ಬಿಲಿಯನ್ ಜನರು ಅತಿ ಹೆಚ್ಚು ನೀರಿನ ಕೊರತೆ ಎದುರಿಸುತ್ತಿದ್ದಾರೆ ಎಂದು ಅಧ್ಯಯನ ವರದಿ ತಿಳಿಸಿದೆ. ಸೈನ್ಸ್ ಅಡ್ವಾನ್ಸಸ್ ಜರ್ನಲ್ ನಲ್ಲಿ ಪ್ರಕಟವಾದ ಅಧ್ಯಯನ ವರದಿ ಪ್ರಕಾರ ನೀರಿನ ಕೊರತೆ ಎದುರಿಸುತ್ತಿರುವ 4 ಬಿಲಿಯನ್ ಜನರ ಪೈಕಿ 1 ಮಿಲಿಯನ್ ಜನರು ಭಾರತದಲ್ಲಿ ವಾಸಿಸುತ್ತಿದ್ದರೆ, 900 ಮಿಲಿಯನ್ ಚೀನಾದಲ್ಲಿ ವಾಸಿಸುತ್ತಿದ್ದಾರೆ. ಇನ್ನು ನೀರಿನ ಕೊರತೆ ಎದುರಿಸುತ್ತಿರುವ 130 ಮಿಲಿಯನ್ ಜನರು ಅಮೆರಿಕ ಹಾಗೂ ಇನ್ನಿತರ ಪಶ್ಚಿಮ ರಾಷ್ಟ್ರಗಳಲ್ಲಿದ್ದಾರೆ.
ಭಾರತ ಹಾಗೂ ಚೀನಾದಲ್ಲಿ ಇಬ್ಬರು ವ್ಯಕ್ತಿಗಳಲ್ಲಿ ಒಬ್ಬ ವ್ಯಕ್ತಿ ವರ್ಷದಲ್ಲಿ ಒಂದು ತಿಂಗಳಾದರೂ ನೀರಿನ ಅಭಾವ ಎದುರಿಸುತ್ತಾನೆ. ಅಷ್ಟೇ ಅಲ್ಲದೇ ವರ್ಷದಲ್ಲಿ ಒಂದು ತಿಂಗಳಾದರೂ ಪ್ರಪಂಚದ ಶೇ.66 ರಷ್ಟು ಜನಸಂಖ್ಯೆ ನೀರಿನ ಕೊರತೆ ಎದುರಿಸುತ್ತಾರೆ ಎಂದು ಅಧ್ಯಯನ ವರದಿ ತಿಳಿಸಿದೆ.
