ನವದೆಹಲಿ: ನೌಕರರ ಭವಿಷ್ಯ ನಿಧಿ ಮತ್ತು ಇತರ ಪಿಂಚಣಿ ಯೋಜನೆಗಳ ಹಣ ಮರಳಿ ಪಡೆಯುವಾಗ ಶೇಕಡಾ 60ರಷ್ಟು ಮೊತ್ತದ ಮೇಲೆ ತೆರಿಗೆ ವಿಧಿಸಲು ಕೇಂದ್ರ ಸರ್ಕಾರ ತೆಗೆದುಕೊಂಡಿರುವ ನಿರ್ಧಾರವನ್ನು ಹಿಂಪಡೆಯುವಂತೆ ಆಗ್ರಹಿಸಿ ಅಖಿಲ ಭಾರತ ಮಹಿಳಾ ಕಾಂಗ್ರೆಸ್ ಸಂಘಟನೆ ಶನಿವಾರ ಪ್ರತಿಭಟನೆಗಿಳಿದಿದೆ.
ಕಾಂಗ್ರೆಸ್ ನಾಯಕಿ ಶೋಭಾ ಒಝಾ ಅವರ ನೇತೃತ್ವದಲ್ಲಿ ಪ್ರತಿಭಟನೆ ನಡೆಯುತ್ತಿದ್ದು, ಬಿಜೆಪಿ ನೇತೃತ್ವದ ಎನ್ ಡಿಎ ಸರ್ಕಾರದ ವಿರುದ್ಧ ಪ್ರತಿಭಟನಾ ನಿರತ ಕಾರ್ಯಕರ್ತರು ಘೋಷಣೆಗಳನ್ನು ಕೂಗುತ್ತಿದ್ದಾರೆ. ಅಲ್ಲದೆ ಪ್ರಧಾನಮಂತ್ರಿ ನರೇಂದ್ರ ಮೋದಿಯವರು ಪ್ರತಿಕೃತಿ ದಹಿಸಿ ಕೇಂದ್ರ ಸರ್ಕಾರವನ್ನು ಸೂಟು ಬೂಟು ಸರ್ಕಾರ ಎಂದು ಕೂಗುತ್ತಿದ್ದಾರೆ.
ಇಂದು ದ್ವಿಗುಣ ತೆರಿಗೆಯಾಗಿದ್ದು, ಸಾಮಾನ್ಯ ಜನರಿಗೆ ಅನ್ಯಾಯವಾಗುತ್ತಿದೆ. ಹೀಗಾಗಿ ಕೇಂದ್ರ ಸರ್ಕಾರ ಇಪಿಎಫ್ ಬಗೆಗಿನ ತನ್ನ ನಿಲುವನ್ನು ಹಿಂಪಡೆಯಬೇಕು. ಸೂಟು ಬೂಟು ಸರ್ಕಾರ ಕೇವಲ ಶ್ರೀಮಂತರ ಕುರಿತಂತೆ ಚಿಂತನೆ ನಡೆಸುತ್ತದೆಯೇ ವಿನಃ ಸಾಮಾನ್ಯ ಜನರು ಹಾಗೂ ಬಡಜನರ ಕುರಿತಂತೆ ಆಲೋಚಿಸಿರುವುದಿಲ್ಲ ಎಂದು ಶೋಭಾ ಓಝಾ ಅವರು ಹೇಳಿದ್ದಾರೆ.
ಪ್ರತಿಭಟನೆಯಲ್ಲಿ ನಿರತರಾಗಿದ್ದ ಮತ್ತೊಬ್ಬ ವ್ಯಕ್ತಿ ಮಾತನಾಡಿ, ಈ ಬಾರಿಯ ಬಜೆಟ್ ಸಾಮಾನ್ಯ ಜನರ ಪರವಾಗಿರಲಿಲ್ಲ. ಹೀಗಾಗಿ ನಾವು ಸರ್ಕಾರದ ವಿರುದ್ಧ ಪ್ರತಿಭಟನೆ ನಡೆಸುತ್ತಿದ್ದೇವೆಂದು ಹೇಳಿದ್ದಾರೆ.
