ಏಪ್ರಿಲ್ ನಲ್ಲಿ 10 ತೆರಿಗೆ ಬಾಕಿದಾರರ ವಿರುದ್ಧ ಚಾರ್ಚ್‌ಶೀಟ್ ಸಲ್ಲಿಸಲಿರುವ ದೆಹಲಿ ಸರ್ಕಾರ

ನವದೆಹಲಿ: ದೊಡ್ಡ ಮೊತ್ತದ ತೆರಿಗೆ ಬಾಕಿ ಉಳಿಸಿಕೊಂಡಿರುವವರ ವಿರುದ್ಧ ಪೊಲೀಸರು ಕೈಗೊಳ್ಳುತ್ತಿರುವ ಕ್ರಮದಿಂದ ತೃಪ್ತಿ ಹೊಂದದ ದೆಹಲಿ ಸರ್ಕಾರ, ಖುದ್ದಾಗಿ ತಾನೇ ಕ್ರಮ ಕೈಗೊಳ್ಳಲು ಮುಂದಾಗಿದೆ. 

ದೊಡ್ಡ ಮೊತ್ತದ ತೆರಿಗೆ ಬಾಕಿ ಉಳಿಸಿಕೊಂಡಿರುವವರ ಬಗ್ಗೆ ದೆಹಲಿ ಸರ್ಕಾರದ ವ್ಯಾಪಾರ ಮತ್ತು ತೆರಿಗೆ ಇಲಾಖೆ ತನಿಖೆ ಆರಂಭಿಸಿದ್ದು, ಮುಂದಿನ ತಿಂಗಳು 10 ಮಂದಿ ವಿರುದ್ಧ ಚಾರ್ಚ್ ಶೀಟ್ ಸಲ್ಲಿಸಲಿದೆ ಎಂದು ಮೂಲಗಳು ತಿಳಿಸಿವೆ.

ಇದೇ ಮೊದಲ ಬಾರಿಗೆ ದೆಹಲಿಯ ವ್ಯಾಪಾರ ಮತ್ತು ತೆರಿಗೆ ಇಲಾಖೆ ಈ ಕ್ರಮಕ್ಕೆ ಮುಂದಾಗಿದೆ. ಇಲಾಖೆ ಶಿಫಾರಸು ಮಾಡುತ್ತಿದ್ದ ಕೆಲವು ತೆರಿಗೆ ಪ್ರಕರಣಗಳ ಕುರಿತು ತನಿಖೆ ನಡೆಸುವಲ್ಲಿ ಕೆಲ ದೆಹಲಿ ಪೊಲೀಸರು ಅಸಡ್ಡೆ ವರ್ತನೆ ನಡೆಸುತ್ತಿದ್ದರು. ಇದರಿಂದ ಅನೇಕರ ವಿರುದ್ದ ಸರಿಯಾದ ಕ್ರಮಕೈಗೊಳ್ಳಲು ಸಾಧ್ಯವಾಗುತ್ತಿರಲಿಲ್ಲ. ಈ ಹಿನ್ನಲೆಯಲ್ಲಿ ತೆರಿಗೆ ಇಲಾಖೆಯೇ ಖುದ್ದಾಗಿ ತನಿಖೆ ನಡೆಸಿ, ಚಾರ್ಚ್ ಶೀಟ್ ಸಲ್ಲಿಸಲು ಮುಂದಾಗಿದೆ. 

ಸೆಕ್ಷನ್ 92ರ ಕಾಯ್ದೆ ಅಡಿ ತೆರಿಗೆ ಆಯುಕ್ತರು ತನಿಖಾ ಅಧಿಕಾರಿಯನ್ನು ನೇಮಿಸಬಹುದಾಗಿದೆ. ಪೊಲೀಸ್ ಅಧಿಕಾರಿಗೆ ಇರುವ ಹಕ್ಕು ಈ ತನಿಖಾಧಿಕಾರಿಗೆ ಇರುತ್ತದೆ. ಇತ್ತೀಚೆಗಷ್ಟೇ ತೆರಿಗೆ ಆಯುಕ್ತರು ತನಿಖಾಧಿಕಾರಿಯನ್ನು ನೇಮಿಸಿದ್ದು, ಈಗಾಗಲೇ ತನಿಖೆ ಪ್ರಾರಂಭಗೊಂಡಿದೆ. ಮುಂದಿನ ತಿಂಗಳು ದೊಡ್ಡ ಮೊತ್ತದ ತೆರಿಗೆ ಬಾಕಿದಾರರ ವಿರುದ್ಧ ಚಾರ್ಜ್ ಶೀಟ್ ಸಲ್ಲಿಸಲು ನಿರ್ಧರಿಸಲಾಗಿದೆ ಎಂದು ವರದಿಗಳು ಹೇಳಿವೆ.