ಭಾರತದ ವರನ ಜತೆ ವಿವಾಹಕ್ಕೆ ವೀಸಾ ಸಿಗದೆ ಆತಂಕಕ್ಕೀಡಾಗಿದ್ದ ಪಾಕ್ ವಧುಗೆ ಸುಷ್ಮಾ ಅಭಯ

ಜೋಧ್​ಪುರ: ಭಾರತ ಯುವಕನಿಗೆ ಹಾಗೂ ಪಾಕಿಸ್ತಾನಿ ಯುವತಿ ಮದುವೆಗೆ ದಿನಗಣನೆ ಶುರುವಾಗಿದೆ. ಆದರೆ ಪಾಕಿಸ್ತಾನ-ಭಾರತ ನಡುವಿನ ಉದ್ವಿಗ್ನ ಪರಿಸ್ಥಿತಿಯಿಂದಾಗಿ ಯುವತಿ ಕಡೆಯವರಿಗೆ ವೀಸಾ ಸಿಗದೆ ಭಾರತಕ್ಕೆ ಬರಲು ನೆರವು ನೀಡಿ ಎಂದು ಕರಾಚಿ ವಧು ಮಾಡಿಕೊಂಡಿರುವ ಮನವಿಗೆ ವಿದೇಶಾಂಗ ವ್ಯವಹಾರಗಳ ಸಚಿವೆ ಸುಷ್ಮಾ ಸ್ವರಾಜ್ ಸ್ಪಂದಿಸಿದ್ದು, ವೀಸಾ ವ್ಯವಸ್ಥೆ ಮಾಡುವುದಾಗಿ ಭರವಸೆ ನೀಡಿದ್ದಾರೆ. 

ಕರಾಚಿಯ ಪ್ರಿಯಾ ಬಚ್ಚಾನಿ ಹಾಗೂ ರಾಜಸ್ಥಾನದ ಜೋಧಪುರದ ನರೇಶ್ ತೇವಾನಿ ಅವರ ವಿವಾಹಕ್ಕೆ ಇನ್ನೊಂದು ತಿಂಗಳು ಬಾಕಿ ಇದ್ದು, ಕಳೆದ ಮೂರು ತಿಂಗಳ ಹಿಂದೆ ಪ್ರಿಯಾ ಕುಟುಂಬಸ್ಥರು ವೀಸಾಗಾಗಿ ಅರ್ಜಿ ಸಲ್ಲಿಸಿದ್ದು ಇದಕ್ಕೆ ಭಾರತೀಯ ರಾಯಭಾರ ಕಚೇರಿಯಿಂದ ಯಾವುದೇ ಪ್ರತಿಕ್ರಿಯೆ ಬಂದಿರದ ಕಾರಣ ಆತಂಕಕ್ಕೀಡಾಗಿದ್ದ ಪ್ರಿಯಾ ಸುಷ್ಮಾ ಸ್ವರಾಜ್ ಅವರಿಗೆ ಟ್ವೀಟರ್ ನಲ್ಲಿ ತಮ್ಮ ಸಮಸ್ಯೆಯನ್ನು ವಿವರಿಸಿದ್ದರು. 

ಪ್ರಿಯಾರ ಮನವಿಗೆ ಕೂಡಲೇ ಸ್ಪಂಧಿಸಿದ ಸುಷ್ಮಾ ಸ್ವರಾಜ್ ಆತಂಕ ಪಡುವ ಅಗತ್ಯವಿಲ್ಲ. ನಿಮಗೆ ಶೀಘ್ರ ವೀಸಾ ವಿತರಿಸಲಾಗುವುದು ಎಂದು ಉತ್ತರ ನೀಡಿದ್ದಾರೆ.