ಈ ಹಿಂದೆ ಸೀಮಿತ ದಾಳಿ ನಡೆದಿಲ್ಲ ಎಂಬ ಪರಿಕ್ಕರ್ ಹೇಳಿಕೆಗೆ 'ಕೈ' ಆಕ್ರೋಶ, ಕ್ಷಮೆಗೆ ಆಗ್ರಹ

ನವದೆಹಲಿ: ಈ ಹಿಂದೆ ಯಾವತ್ತೂ ಗಡಿ ನಿಯಂತ್ರಣ ರೇಖೆ(ಎಲ್ಒಸಿ) ದಾಟಿ ಹೋಗಿ ಸೀಮಿತ ದಾಳಿ ನಡೆಸಿಲ್ಲ. ಭಾರತೀಯ ಸೇನೆ ಇದೆ ಮೊದಲ ಬಾರಿ ಅಂತಹ ದಾಳಿ ನಡೆಸಿದೆ ಎಂಬ ರಕ್ಷಣಾ ಸಚಿವ ಮನೋಹರ್ ಪರಿಕ್ಕರ್ ಅವರ ಹೇಳಿಕೆಗೆ ತೀವ್ರ ಆಕ್ಷೇಪ ವ್ಯಕ್ತಪಡಿಸಿರುವ ಕಾಂಗ್ರೆಸ್, ಈ ಸಂಬಂಧ ರಕ್ಷಣಾ ಸಚಿವರು ಕ್ಷಮೆ ಕೇಳಬೇಕು ಎಂದು ಬುಧವಾರ ಆಗ್ರಹಿಸಿದೆ.

ಇಂದು ಪತ್ರಿಕಾಗೋಷ್ಠಿಯನ್ನು ಉದ್ದೇಶಿಸಿ ಮಾತನಾಡಿದ ಕಾಂಗ್ರೆಸ್ ಮುಖ್ಯ ವಕ್ತಾರ ರಂದೀಪ್ ಸುರ್ಜೆವಾಲಾ ಅವರು, ರಕ್ಷಣಾ ಸಚಿವರು ಈ ಹಿಂದೆ ಸೀಮಿತ ದಾಳಿ ನಡೆದಿಲ್ಲ ಎಂದು ಜನತೆಗೆ ತಪ್ಪು ಮಾಹಿತಿ ನೀಡುತ್ತಿದ್ದಾರೆ ಮತ್ತು ರಾಜಕೀಯ ಲಾಭಕ್ಕಾಗಿ ಸೇನೆಯ ಬಲಿದಾನವನ್ನು ದುರ್ಬಲಗೊಳಿಸುತ್ತಿದ್ದಾರೆ ಎಂದು ಆರೋಪಿಸಿದ್ದಾರೆ.

ಬಿಜೆಪಿಯ ಈ ಅಸಹ್ಯಕರ ಹೇಳಿಕೆ ಮತ್ತು ಪ್ರಧಾನಿ ನರೇಂದ್ರ ಮೋದಿ ಅವರ ಗೌರವ ಹೆಚ್ಚಿಸಲು ಮನೋಹರ್ ಪರಿಕ್ಕರ್ ಅವರು ಗೋವಾ, ಲಖನೌ ಹಾಗೂ ಆಗ್ರದಲ್ಲಿ ರಾಷ್ಟ್ರೀಯ ಭದ್ರತೆಯನ್ನು ಒಂದು ಕಾರ್ಯಕ್ರಮವಾಗಿ ಪರಿವರ್ತಿಸುತ್ತಿರುವುದು ದುರದೃಷ್ಟಕರ ಎಂದು ಸುರ್ಜೆವಾಲಾ ಹೇಳಿದ್ದಾರೆ.

ಪರಿಕ್ಕರ್ ಅವರೇ ಸೀಮಿತ ದಾಳಿಯ ಎಲ್ಲಾ ರೀತಿಯ ಗೌರವ ಭಾರತೀಯ ಸೇನೆ ಸಲ್ಲಬೇಕು. ಆದರೆ ನೀವು ಏಕೆ ಜನರ ದಾರಿ ತಪ್ಪಿಸುತ್ತಿದ್ದೀರಿ? ಮತ್ತು ಈ ಹಿಂದಿನ ಸೀಮಿತ ದಾಳಿಯನ್ನು ಕಡೆಗಣಿಸುವ ಮೂಲಕ ಸೇನೆಯನ್ನು ಏಕೆ ದುರ್ಬಲಗೊಳಿಸುತ್ತಿದ್ದೀರಿ? ಎಂದು ಪ್ರಶ್ನಿಸಿದ್ದಾರೆ.