ರಾಜೌರಿ ಶಾಸಕ ರಾಜೀನಾಮೆ ನೀಡಿದ್ದು ಜನರ ಅಸಮಾಧಾನಕ್ಕೆ ಕಾರಣವಾಯಿತು: ಮನೀಷ್ ಸಿಸೋಡಿಯಾ

ನವದೆಹಲಿ: ರಾಜೌರಿ ವಿಧಾನಸಭಾ ಕ್ಷೇತ್ರದಲ್ಲಿ ಆಮ್ ಆದ್ಮಿ ಪಕ್ಷ 3 ನೇ ಸ್ಥಾನಕ್ಕೆ ತಳಲ್ಪಟ್ಟಿರುವುದಕ್ಕೆ ಜನರ ಅಸಮಾಧಾನವೇ ಕಾರಣ ಎಂಬುದನ್ನು ಆಮ್ ಆದ್ಮಿ ಪಕ್ಷ ಒಪ್ಪಿಕೊಂಡಿದೆ. 

ಕ್ಷೇತ್ರದ ಶಾಸಕ ರಾಜೀನಾಮೆ ನೀಡಿ ಪಂಜಾಬ್ ನಿಂದ ಸ್ಪರ್ಧಿಸಿದ್ದು ದೆಹಲಿ ಜನತೆಯ ಆಕ್ರೋಶಕ್ಕೆ ಗುರಿಯಾಗಿದೆ ಎಂದು ದೆಹಲಿ ಉಪಮುಖ್ಯಮಂತ್ರಿ ಮನೀಷ್ ಸಿಸೋಡಿಯಾ ಹೇಳಿದ್ದು, ಉಪಚುನಾವಣೆಯ ಫಲಿತಾಂಶ ಮುಂಬರುವ ಸ್ಥಳೀಯ ಸಂಸ್ಥೆ ಚುನಾವಣೆಗಳ ಮೇಲೂ ಪರಿಣಾಮ ಬೀರಲಿದೆ ಆದರೆ ಅದನ್ನು ಆಮ್ ಆದ್ಮಿ ಪಕ್ಷ ಸಮರ್ಥವಾಗಿ ಎದುರಿಸಲಿದೆ ಎಂದು ಸಿಸೋಡಿಯಾ ಹೇಳಿದ್ದಾರೆ. 

ದೆಹಲಿ ಸರ್ಕಾರದ ಒಳ್ಳೆಯ ಕೆಲಸಗಳನ್ನು ರಾಜೌರಿ ಗಾರ್ಡನ್ ಜನತೆಗೆ ತಿಳಿಸುತ್ತೇವೆ ಎಂದು ಉಪಮುಖ್ಯಮಂತ್ರಿ ಮನೋಷ್ ಸಿಸೋಡಿಯಾ ಹೇಳಿದ್ದಾರೆ. 

ದೆಹಲಿಯ ಉಪಚುನಾವಣೆಯಲ್ಲಿ ಬಿಜೆಪಿ-ಅಖಾಲಿ ದಳದ ಅಭ್ಯರ್ಥಿ ಮನ್ಜೀಂದರ್ ಸಿಂಗ್ ಸಿರ್ಸಾ ಗೆಲುವು ಸಾಧಿಸಿದ್ದು ಆಮ್ ಆದ್ಮಿ ಪಕ್ಷ ಮೂರನೇ ಸ್ಥಾನಕ್ಕೆ ತಳಲ್ಪಟ್ಟಿದೆ. 

ರಾಜೌರಿ ಕ್ಷೇತ್ರದ ಶಾಸಕ ಪಂಜಾಬ್ ಚುನಾವಣೆಗೆ ಸ್ಪರ್ಧಿಸಲು ರಾಜೀನಾಮೆ ನೀಡಿದ್ದು ಕ್ಷೇತ್ರದ ಜನತೆಗೆ ಇಷ್ಟವಾಗಿರಲಿಲ್ಲ. ಕ್ಷೇತ್ರದ ಜನತೆಯ ಮನವೊಲಿಕೆ ಮಾಡಲು ಯತ್ನಿಸಿದೆವು ಆದರೆ ಅದು ಫಲಿಸಲಿಲ್ಲ ಎಂದು ಆಪ್ ಹೇಳಿದೆ.