'ಬೆಗ್' ಮಾಡಬೇಡಿ, ಇದು ಸ್ವತಂತ್ರ ಭಾರತ: ಸಚಿವರಿಗೆ ವೆಂಕಯ್ಯ ನಾಯ್ಡು ಸಲಹೆ

ನವದೆಹಲಿ: ಉಪ ರಾಷ್ಟ್ರಪತಿ ಎಂ. ವೆಂಕಯ್ಯ ನಾಯ್ಡು ಅವರು ರಾಜ್ಯಸಭಾ ಅಧ್ಯಕ್ಷರಾಗಿ ಅಧಿಕಾರ ವಹಿಸಿಕೊಂಡ ನಂತರ ನಡೆಯುತ್ತಿರುವ ಮೊದಲ ಅಧಿವೇಶನದಲ್ಲಿ ಕೆಲವೊಂದು ಬದಲಾವಣೆ ಮಾಡಿದ್ದು, ಸಚಿವರು ಹಾಗೂ ಸಂಸದರು ಮೇಜಿನ ಮೇಲೆ ಪತ್ರಗಳನ್ನು ಹಾಕುವ ಸಂದರ್ಭದಲ್ಲಿ ವಸಾಹತುಶಾಹಿ ನಿಯಮಗಳನ್ನು ಬಳಸಬಾರದು ಎಂದು ಹೇಳಿದ್ದಾರೆ.

ಚಳಿಗಾಲ ಅಧಿವೇಶನದ ಮೊದಲ ದಿನವೇ ಸಚಿವರು ಮತ್ತು ಸಂಸದರು ಮೇಜಿನ ಮೇಲೆ ಪತ್ರಗಳನ್ನು ಹಾಕುವ ಸಂದರ್ಭದಲ್ಲಿ ನಾನು ಬೇಡಿಕೊಳ್ಳುತ್ತೇನೆ(I beg to) ಎಂಬ ಪದವನ್ನು ಬಳಸಬೇಡಿ ಎಂದು ವೆಂಕಯ್ಯ ನಾಯ್ಡು ಅವರು ಸಲಹೆ ನೀಡಿದ್ದಾರೆ.

ಪಟ್ಟಿಮಾಡಿದ ಪತ್ರಗಳನ್ನು 'ನಾನು ಮೇಜಿನ ಮೇಲೆ ಇಡಲು ಬಯಸುತ್ತೇನೆ' ಎಂದು ಹೇಳಿದರೆ ಸಾಕು. ಬೇಡಿಕೊಳ್ಳಬೇಕಾದ ಅಗತ್ಯವಿಲ್ಲ ... ಇದು ಸ್ವತಂತ್ರ ಭಾರತ ಎಂದು ವೆಂಕಯ್ಯ ನಾಯ್ಡು ಅವರು ಹೇಳಿದ್ದಾರೆ. ಅಲ್ಲದೆ ಇದು ಆದೇಶ ಅಲ್ಲ. ಕೇವಲ ಸಲಹೆ ಅಷ್ಟೇ ಎಂದು ಸಹ ಅಧ್ಯಕ್ಷರು ಸ್ಪಷ್ಟಪಡಿಸಿದ್ದಾರೆ.

ಇಂದಿನಿಂದ ಸಂಸತ್ ಚಳಿಗಾಲದ ಅಧಿವೇಶನಆರಂಭವಾಗಿದ್ದು, ಮೊದಲ ದಿನ ಲೋಕಸಭೆಯಲ್ಲಿ ಅಗಲಿದ ಹಾಲಿ ಹಾಗೂ ಮಾಜಿ ಸದಸ್ಯರಿಗೆ ಸಂತಾಪ ಸೂಚಿಸಿ ಕಲಾಪವನ್ನು ಸೋಮವಾರಕ್ಕೆ ಮುಂದೂಡಲಾಗಿದೆ.

ಇನ್ನು ರಾಜ್ಯಸಭೆ ಅಧಿವನೇಶ ಮುಂದುವರೆದಿದ್ದು, ಕಾಂಗ್ರೆಸ್ ಜೊತೆ ಸೇರಿ ಪಾಕಿಸ್ತಾನ ಗುಜರಾತ್ ಚುನಾವಣೆಯಲ್ಲಿ ಹಸ್ತಕ್ಷೇಪ ಮಾಡುತ್ತಿದೆ ಎಂಬ ಪ್ರಧಾನಿ ನರೇಂದ್ರ ಮೋದಿ ಹೇಳಿಕೆ ಖಂಡಿಸಿ ಕಾಂಗ್ರೆಸ್ ಸದಸ್ಯರು ಧರಣಿ ನಡೆಸಿದರು. ಅಲ್ಲದೆ ಈ ಸಂಬಂಧ ಪ್ರಧಾನಿ ಮೋದಿ ಸ್ಪಷ್ಟನೇ ನೀಡಬೇಕು ಎಂದು ಒತ್ತಾಯಿಸಿದ್ದಾರೆ.

ನಿಗದಿಗಿಂತ ಒಂದು ತಿಂಗಳು ವಿಳಂಬವಾಗಿ ಆರಂಭವಾಗಿರುವ ಅಧಿವೇಶನ ಜನವರಿ 5, 2018ಕ್ಕೆ ಮುಗಿಯಲಿದೆ.